“Bua tshinyi tudi ne muoyo?”

ELIE WIESEL uvua mupete Difutu dia Nobel ne mupanduke ku Dishipangana dinene dia bena Nazi wakamba bua lukonko kampanda ne: “Lukonko lua mushinga mukole ludi muntu yonso ne bua kudiela.” Ndukonko kayi alu? Lukonko lua ne: “Bua tshinyi tudi ne muoyo?”

Ukadiku mudiele lukonko elu anyi? Bantu ba bungi bakatu anu badiebeje, kadi kabatu banji kupeta diandamuna. Arnold Toynbee, mufundi wa malu a kale muena Grande-Bretagne wakateta bua kuleja mushinga wa muoyo ne kufundaye ne: “Tshipatshila tshia ndekelu tshia muntu yonso ntshia kutumbisha Nzambi ne kusanka bua bualu buende too ne kashidi.”

Bualu budi bukoka ntema mbua se: kukadi bidimu bipite pa binunu bisatu, Mukalenge Solomo uvua mumanyike bua dikonkonona diende dia malu a mu nsombelu wa bantu, ukavua mupete diandamuna dia nshindamenu. Wakamba ne: ‘Eu nshikidilu wa malu onso; malu onso adi mumvuike. Utshine Nzambi, utumikile mikenji yende; ebu mbualu buonso budi muntu ne bua kuenza.’​—Muambi 12:13.

Yezu Kristo Muana wa Nzambi wakatua ku tshivua Mukalenge Solomo muambe etshi. Pavua Yezu pa buloba, wakenza muende muonso bua kutumbisha Tatuende wa mu diulu. Kuenzela Mufuki wende mudimu kuvua kuvuija muoyo wa Yezu ne mushinga. Kuvua kumuambuluishe, kufikaye too ne ku diamba ne: “Bidia bianyi bidi kuenza mudi wakuntuma musue.”​—Yone 4:34.

Nunku bua tshinyi tudi ne muoyo? Anu bu Yezu, Solomo ne basadidi bakuabu ba Nzambi, muoyo wetu newikale ne mushinga ne netuikale ne disanka dia kashidi tuetu tuenza disua dia Nzambi. Udiku musue kumanya mushindu wa kutendelela Nzambi “mu nyuma ne mu bulelela” anyi? (Yone 4:24) Bantemu ba Yehowa ba muaba uudi musombele nebasanke bua kukuambuluisha bua kuandamuna lukonko elu ne: “Bua tshinyi tudi ne muoyo?”