Muntu wa bidimu bipite pa lukama mmumanye bua tshinyi udi ne muoyo

KUDI mamu mukuabu, diende ng’ELIN. Udi umue wa ku bantu 60 badibu babale matuku mashale aa mu ditunga dia Suède badi ne bidimu 105 anyi kupita apu. Yeye udi ne bidimu 105. Nansha mukadiye musombele mu nzubu wa bakulakaje, udi anu Ntemu wa Yehowa, ne utu uyisha ngondo yonso. Utu mulue Ntemu kukadi bidimu bipite pa 60.

Padi Elin uyisha bantu bakuabu apu, udi anu ulonda tshilejilu tshia mupostolo Paulo dîba divuabu bamukuate ne bamulame mu nzubu kampanda. Paulo uvua uyisha bantu bonso bavua balua kumutangila. (Bienzedi 28:16, 30, 31) Elin pende udi wenza muende muonso bua kuyisha ba doktere ne bondapianganyi bakuabu, basukudi ba nzubu, balengeji ba nsuki ne bakoshi ba nsuki, balami ba babedi ne bantu bakuabu badiye upeta mu nzubu amu. Imue misangu bena Kristo nende ba mu tshisumbu tshiabu batu mene balomba bantu badibu balonga nabu Bible bua kuya kumutangila bua kusakidilabu dimanya pa dikuabu.

Bena mu tshisumbu tshia ba Elin batu bamuanyisha bua musangelu wende ne dijinga diende dia kumanya malu a bungi. Ntemu nende mukuabu udi wamba ne: “Mmumanye malu adi enzeka mu tshisumbu bimpe be! Tshilejilu, mmumanye mêna a bana batekete bonso ne a bantu bapiabapia bonso.” Elin utu wakidila bantu bimpe, ubela bilele; ne utu musue kuikala ne muoyo.

Kadi tshidi tshiambuluisha Elin bua kuikala amu ne disanka ntshinyi? Utu ubala ne binete. Utu ubala mvese umue dituku dionso edi mu kakanda ka Bantemu ka Tukonkononayi Mifundu dituku dionso. Utu ubala kabidi mvese bungi kampanda mu Bible dituku dionso. Utu ubala malu atu Bantemu balonga mu bisangilu biabu bia lumingu luonso. Kadi katu ne bukole bua kuyamu to. Batu bamukuatshila malu a mu bisangilu ebi mu bande bua yeye kuteleja. Nunku tuetu tubala Bible ne mikanda idi imumvuija dituku dionso, katuyi tupumbisha bisangilu bia bena Kristo, nebituambuluishe bua kuikala ne disanka ne kuikala bamanye bua tshinyi tudi ne muoyo nansha tuetu bikale ne bidimu bungi kayi.​—Musambu 1:2; Ebelu 10:24, 25.