Bua tshinyi Nzambi mmulekele malu mabi enzeka?

UDIKU pebe mumone ne: malu mabi ne makenga adi enda avulangana miaba yonso anyi? Mvita idi ishipesha basalayi ne badi kabayi basalayi. Dishipangana ne tshikisu bidi miaba yonso. Pamuapa matuku mashale aa bavua mua kuikala bakuenzele bibi kuyi ne bualu. Pa kumona malu aukadi mumone ne mutuilangane nawu, ukatuku anu mudiebeje ne: ‘Bua tshinyi Nzambi mmulekele malu mabi?’

Bantu ba bungi bakatu badiela lukonko elu. Kukadi bidimu bitue ku 3 600 mpindieu, musadidi wa Nzambi mukuabu dîna diende Yobo wakebeja ne: ‘Bua tshinyi bantu babi badi bashala ne muoyo?’ (Yobo 21:7) Muprofete Yelemiya, uvua ne muoyo mu bidimu bia 600 kumpala kua bikondo bietu ebi uvua unyingalala bikole bua malu mabi avua bantu ba mu ditunga diabu benza, ke kuebejaye ne: ‘Njila wa bantu babi udi ne diakalengele bualu kayi? Bualu kayi bonso badi basonguelangana badi ne ditalala?’ (Yelemiya 12:1) Yobo ne Yelemiya bavua bamanye bimpe ne: Nzambi udi muakane. Kadi bakadiebeja bua kumanya bua tshinyi kuvua malu mabi a bungi mushindu eu. Pamuapa utu pebe umvua bibi paudi umona malu mabi.

Bamue bantu badi bamba ne: Nzambi ke udi ukebesha malu mabi ne makenga. Bakuabu pabu badi badiebeja ne: Bikala Nzambi ngua bukole buonso, muakane ne wa dinanga, bua tshinyi kêna ujikija malu mabi ne makenga? Bua tshinyi mmulekele malu mabi enzeka too ne lelu?’ Tshiena-bualu tshidi tshilonda netshiandamune nkonko eyi ne mikuabu ya mushinga.

[Mêyi a dianyisha bua tshimfuanyi mu dibeji 3]

AP Photo/​Adam Butler