“Mvua mmunemeka bua dinanukila diende dikole”

GÜNTER GRASS mufundi muena Allemagne ne uvua mupete difutu dia Nobel mu malu a difunda mu 1999, wakafunda mukanda uvua wakula bua malu a mu nsombelu wende mu 2006. Mu mukanda amu, wakakula bua tshikondo tshivuabu bamuenzeje bua kubuela mu tshisumbu tshia bampulushi tshia mu Allemagne. Wakakula kabidi bua muntu mukuabu uvua mumukemeshe bikole ne uvuaye mushale uvuluka too ne bidimu 60 panyima. Muntu au uvua mumanyike bikole bua ditabuja diende pavuabu bamukengesha.

Panyima pa Grass mumane kufunda mukanda wende, bakamuela nkonko idibu bafunda mu tshibejibeji kampanda tshia bena Allemagne. (Frankfurter Allgemeine Zeitung) Wakakula kabidi bua muntu au uvua mumukemeshe bikole uvua ubenga bua kubuela mu busalayi. Grass wakamba ne: muntu au “kavua mu bisumbu bivua bimanyike bikole bu mudi bia bena Nazi, bena Komunisme ne bena Sosialisme. Uvua Ntemu wa Yehowa.” Tshidibi, Grass kêna uvuluka dîna dia Ntemu au to. Kadi uvua umubikila ne: Katutu-tuenza-malu-a-nunku-to. Mu makebulula menza kudi Bantemu ba Yehowa, mbasangane ne: muntu au uvua Joachim Alfermann. Bavua bamututa misangu yonso ne bamufuisha bundu, ne pashishe bamukangila kaba ka nkayende. Kadi kavua walukila tshianyima ne wakabenga kubuela mu busalayi.

Grass wakamba ne: “Mvua mmunemeka bua dinanukila diende dikole. Mvua ndiebeja ne: Mmushindu kayi uvuaye unanukila malu au onso? Uvua wenza bishi?” Alfermann wakatantamena malu onso avuabu bamuenzele bua kunyanga ditabuja diende ne pashishe kumutumabu mu buloko bunene bua Stutthof mu ngondo muibidi wa tshidimu tshia 1944. Bakamulekela mu ngondo muinayi mu 1945 ne wakashala ne lulamatu too ne pakafuaye mu 1998.

Alfermann uvua munkatshi mua Bantemu batue ku 13 400 bavua bakenge bua ditabuja diabu mu Allemagne ne mu matunga makuabu avua ku bukokeshi bua bena Nazi. Bavua balonde tshidi Bible wamba bua kubenga kubuelakana mu malu a tshididi ne a busalayi. (Matayo 26:52; Yone 18:36) Bakela Bantemu batue ku 4 200 mu maloko manene ne 1 490 bakafua. Nansha lelu, lulamatu luabu lutu lukemesha bantu badi kabayi Bantemu, kadi badi babanemeka bua ditabuja diabu.

[Tshimfuanyi mu dibeji 32]

Joachim Alfermann