“Mukanda wa mushinga mukole”

KE TSHIVUA kavula-mbedi wa kale wa ditunga dia Belgique muambe bua mukanda wa Muntu Mutambe Bunene wa katshia ne katshia.a Muena mutumba nende mukuabu wakaya kumutangila ne kumupesha mukanda eu, kuwangataye. Pashishe wakafunda mukanda bua kumuela tuasakidila wamba ne: “Ndi ne disanka dia bungi bua muuvua mulue kuntangila, ne bua mukanda wa mushinga mukole wa ‘Muntu Mutambe bunene’ uuvua mumpeshe.”

Pakajikijaye kubala mukanda eu wakamba ne: “Bu bantu mua kubala malu adi mu Matayo, Mâko, Luka ne Yone ne kutumikila mibelu ya Yezu Kristo idimu, malu avua mua kuikala mushindu mukuabu lelu eu. Katuvua mua kuikala dijinga ne kasumbu ka bulongolodi bua Matunga Masanga kadi katangila malu a ditalala pa buloba; kakuvua mua kuikala bantu badi bashipangana ne bombe bua kukumbaja bipatshila bia malu a tshididi ne kakuvua mua kuikala tshikisu pa buloba.” Nansha muvuaye umona malu aa bu adi kaayi mua kuenzeka, wakangata tshivua mutumba nende mumuenzele atshi ne mushinga.

Wakatungunuka wamba ne: “Udi munkatshi mua bantu ba muoyo muimpe badi kabayi batamba kuanyisha malu a pa buloba anyi batamba kuabipisha, kadi buenu nuenu, nsombelu nealengele pa buloba.”

Bantemu ba Yehowa badi bitaba ne: anu Nzambi ke walua kulengeja nsombelu pa buloba, ki mbionso bidi bantu benza ebi to. Badi badienzeja bua kuidikija Yezu Kristo uvua muntu mutambe bunene. Bantemu mbalue kukutangilaku matuku aa anyi? Bobu balue, udi mua kuyukila nabu malu a muntu mutambe bunene wa katshia ne katshia. Nebikale ne disanka dia kukupesha mukanda uvua mukemeshe kavula-mbedi wa kale au.

[Mêyi adi kuinshi]