Mubadi musuibue

TUDI ne disanka dia kunumanyisha ne: kubangila ku tshibejibeji etshi, nekuikale amue malu adibu bashintulule mu dipatuka dia Tshibumba tshia Nsentedi. Kumpala kua kunumvuija malu adibu bashintulule, tuanji tuakule bua malu adi kaayi mashintuluke.

Dîna dia tshibejibeji etshi, Tshibumba tshia Nsentedi tshidi tshimanyisha Bukalenge bua Yehowa, ki ndishintuluke to. Nunku, Tshibumba tshia Nsentedi netshitungunuke ne kutumbisha Yehowa Nzambi mulelela ne kusamba bantu badi batshibala ne lumu luimpe lua Bukalenge buende. Biena-bualu bidi mu dibeji 5 too ne mu dia 9 mu tshibejibeji etshi bidi bileja tshidi Bukalenge bua Nzambi ne dîba dikalabu ne bua kulua. Pashishe, Tshibumba tshia Nsentedi netshitungunuke ne kukolesha ditabuja mu Yezu Kristo, kuakula bua bulelela budi mu Bible, ne kumvuija malu adi enzeka pa buloba ku diambuluisha dia milayi ya mu Bible, anu bu mudibi bienzeke kukadi bidimu bipite pa lukama.

Kadi mmalu kayi adibu bashintulule? Mpindieu tumonayi malu mimpe mapiamapia ikala mu Tshibumba tshia Nsentedi tshionso tshikala tshipatuka musangu umue panyima pa ngondo isatu.a

Tshibejibeji etshi netshikale ne biena-bualu bielesha bantu meji bikole. Tshilejilu, tshiena-bualu tshia “Utu mumanye anyi?” netshikale ne malu a mushinga adi umvuija bimpe bualu bua mu Bible budibu basungule. Tshiena-bualu tshia “Semena pabuipi ne Nzambi” netshikale tshituleja tshidi mvese kampanda ya mu Bible itulongesha pa bidi bitangila Yehowa. Tshiena-bualu tshia “Nkonko ya babadi” netshikale tshiandamuna nkonko ya malu a mu Bible itu bantu batamba kuela. Tshilejilu, bantu ba bungi batu badiebeja ne: “Bukalenge bua Nzambi budi mu mitshima yetu anyi?” Nenupete diandamuna mu dibeji dia 13.

Nekuikale kabidi biena-bualu bikala bipatuka bua kuambuluisha bena mu mêku. Tshilejilu, nekuikale tshiena-bualu tshia “Malu ambuluisha dîku dienu.” Netshikale tshiakula bua bilumbu bitu bijuka mu mêku, ne netshikale tshileja mudi mêyi a mu Bible mua kuambuluisha benamu bua kubijikija. Nekuikale kabidi tshiena-bualu tshidi baledi ne bua kubala pamue ne bana babu tshia “Longesha bana bebe.” Tshiena-bualu tshidi tshiamba ne: “Buenu nuenu bansonga” netshikale tshiotshi mua kuleja mudi bansonga mua kudilongela Bible.

Nekuikale biena-bualu bikuabu bikala bipatuka mu tshibejibeji etshi. Tshiena-bualu tshia “Widikije ditabuja diabu” netshituambuluishe bua kuidikija muntu kampanda wa mu Bible. Tshilejilu, mu dibeji dia 18 too ne dia 21 mu tshibejibeji etshi, nenubale muyuki udi ulenga ku muoyo wa muprofete Eliya ne nenumone mushindu unudi mua kuidikija ditabuja diende. Tshiena-bualu tshia “Mukanda mufumine . . .” netshikale ne malu adibu balonda kudi bamisionere ne bantu bakuabu ba miaba mishilangane. Tshiena-bualu tshia “Malu atudi tumanyina kudi Yezu” netshikale ne malongesha a mushinga a mu Bible mafunda mu mushindu mupepele.

Tudi bashindike ne: Tshibumba tshia Nsentedi netshitungunuke ne kusankisha babadi ba miaba yonso badi banemeka Bible ne badi basue kumanya tshidi mukanda eu ulongesha menemene. Tudi batekemene ne: tshibejibeji etshi netshinuambuluishe bua kujikija nyota inudi nayi ya kumanya malu a mu Bible.

BAFUNDI

[Mêyi adi kuinshi]