Mushindu uudi mua kumvua Bible

2. Bala ne meji mimpe

Mulunda webe ukadiku mukuambile malu mabi a muntu uudi kuyi mumanye anyi? Dimue dituku wewe mua kupetangana ne muntu au, malu avua mulunda webe muambe adiku akupangisha bua kumona malu mimpe ne mamanya a muntu au anyi? Ke mudibi mua kuenzeka bua Bible.

MUPOSTOLO PAULO wakadimuija bua njiwu idi mua kutufikila tuetu katuyi tubala Bible ne meji mimpe. Wakafunda bua bamue bena Yuda ba mu tshikonda tshia kale ne: ‘Ndi mumanyi wa bualu buabu ne: Badi ne lukunukunu kudi Nzambi, kadi ke ndua lungenyi lulelela.’​—Lomo 10:2.

Bamue ba ku bena Yuda ba mu bidimu lukama bia kumpala bakabenga Yezu bu Masiya nansha muvua Mifundu ya tshiena-Ebelu ileja bualu ebu patoke. Yezu wa mu Nazaleta wakakumbaja malu onso avuabu bakule mu Mifundu ya tshiena-Ebelu ne milayi ivua ileja tshivua Masiya ne bua kuenza. Kadi ngenyi mibi ivua nayi bena mu tshikondo tshiende yakabapangisha bua kumvua tshidi Bible wamba.

Bualu ebu budi butulongesha tshinyi? Mbimpe kubala Bible ne lungenyi luimpe. Ngenyi mibi idi nayi muntu idi mua kumupangisha bua kumvua bulelela budi mu Bible.

Tshilejilu, mulongeshi mukuabu wa malu a Nzambi wa mu Caroline du Nord, mu États-Unis, udi wamba bua Bible ne: “mmukanda wa bantu, udi ne ngenyi ya bantu, ngenyi idimu kayena ipetangana, kayena mene mua kutuambuluisha mu nsombelu wetu.” Bikala muntu umona Bible bu mukanda wa bantu ne wangata malu adimu bu adi kaayi afume kudi Nzambi, udi mua kufika ku dibenga kutumikila amue malu adimu bualu kaena amusankisha.

Pabi, Bible udi utukankamija bua kumulonga ne tshisumi. Bible udi wamba bua bena Beloya ba mu tshikondo tshia Paulo ne: ‘Bakitabuja dîyi ne mitshima mimane kulongolola; bakadi badikebela mu Mukanda wa Nzambi ku dituku ku dituku ne: Malu aa adi malelela.’ (Bienzedi 17:11) Anu bu bena Beloya, wewe pebe udi mua kuepuka ngenyi mibi idi mua kukupangisha bua kumvua Bible bimpe. Bala Bible ne meji mimpe, muikale ne tshisumi tshia kumanya malu mimpe adi Nzambi mufundishamu.