Nkonko ya babadi
Bena meji basatu bavuaku bushuwa baye kutangila Yezu patshivuabu bamulelelaku anyi?
Mikanda ya pa buloba bujima itu yakula bua diledibua dia Yezu itu ileja ne: kuvua bakalenge anyi bena meji basatu bavua batuadile Yezu bintu bimpe patshivuabu bamulelelaku. Bualu ebu mbulelela anyi? Budiku bupetangana ne malu avua menzeke anyi? Tumonayi.
Mukanda wa Matayo ne wa Luka idi ilonda muvuabu balele Yezu. Idi ileja ne: anu balami ba mikoko bapuekele bavua mu madimi pabuipi apu ke bavua balue kutangila Yezu patshivuabu bamulelelaku. Bantu batubu babikila ne: bakalenge anyi bena meji kabavua bakalenge ba bushuwa to, kadi mbamanyi ba malu a mitoto, ne Bible kena uleja bungi buvuabu to. Bobu kabavua benza luendu bua kulua kutangila Yezu ku tshikumbi pakamulelabu to, kadi bakalua kumutangila pakavuabu baye nende kumbelu. Dilua kumutangila diabu diakateka muoyo wa Yezu mu njiwu.
Tangila bimpe tshidi mukanda wa Luka wamba bua diledibua dia Yezu: ‘Mu luseke alu muakadi balami ba mikoko, balala mu mpata, balama mikoko yabu mu butuku. Muanjelu wa Mukalenge wakimana pabuipi nabu, wakabambila ne: Nenusangane muana mujingila tshilulu, mulale mu tshidilu tshia nyama. Bakalua lukasa, bakasangana Mariya ne Yosefe, ne muana mulale mu tshidilu tshia nyama.’—Luka 2:8-16.
Anu Yosefe, Mariya ne balami ba mikoko ke bavuapu patshivuabu balelelaku Yezu. Ki mbatele muntu mukuabu mu mukanda wa Luka to.
Mpindieu tangila tshidibu bambe mu Matayo 2:1-11: ‘Pakalelabu Yezu mu Beteleheme wa mu Yudaya mu matuku a mukalenge Helode, bena meji ba ku esete bakalua ku Yelushalema. Bakabuela mu nzubu, bakamona muana ne mamuende Mariya.’
Mvese eu udi wakula anu bua ‘bena meji’ patupu, kena wakula bua ‘bena meji basatu’ to. Pashishe bavua bumbukile ku esete ne bakanji kuya ku Yelushalema, ki nku Beteleheme kuvuabu balelela Yezu to. Tshikondo tshiakaluabu kufika ku Beteleheme, Yezu ukavua “muana” mubandile, katshivua muana mutoke to; ukavua mu nzubu, katshivua mu tshikumbi to.
Kabidi nansha mudi Bible wa Tshiluba ubikila bantu abu ne: ‘bena meji’, Bible mikuabu idi ibabikila ne: “bena majimbu” anyi “bena malu a mitoto.” Mukanda kampanda (A Handbook on the Gospel of Matthew) udi umvuija miaku idi mu mukanda wa Matayo udi wamba ne: tshiambilu tshidibu bakudimune ne: “Bena meji ntshifumine ku muaku wa tshiena Greke udi uleja bakuidi ba bena Pelasa bavua bamanye malu a mitoto bikole.” Nkonga miaku mukuabu udi wamba ne: Tshiambilu etshi tshidi tshiumvuija “muena majimbu, muena manga anyi muena mupongo.”—The Expanded Vine’s Expository Dictionary of New Testament Words.
Nansha mutshidiku bena majimbu ne bena malu a mitoto ba bungi lelu eu, Bible kena witaba bua tuetu kubuelakana nabu to. (Yeshaya 47:13-15) Badi munkatshi mua malu a nyuma mibi ne badi benza malu adi Yehowa Nzambi ukina. (Dutelonome 18:10-12) Ke bualu kayi muanjelu wa Nzambi nansha umue kavua mubambile bua diledibua dia Yezu. Pashishe, Nzambi wakabakandika mu tshilota bua kabapinganyi kudi mukalenge mubi Helode bua kumuambila malu avuabu bamone to, bualu uvua ukeba kushipa Yezu. Nunku, ‘bakaya kuabu mu munga njila.’—Matayo 2:11-16.
Bena Kristo balelela badiku mua kujinga bua kumuangalaja miyiki ya mafi idi ikonyangaja malu avua menzeke pavuabu balele Yezu anyi? Kabena mua kuenza nanku to.