Yezu uvua wamba ne: Bukalenge bua Nzambi ntshinyi?

‘Wakendakana mu bimenga ne mu misoko mikese wenda ne lumu luimpe lua bukalenge bua Nzambi.’​—LUKA 8:1.

TUTU basue kuakula malu a mushinga adi atutangila, atutu banange bikole. Yezu wakamba ne: “Mukana mudi muamba anu malu adi matambe kuvulangana mu mutshima.” (Matayo 12:34) Patudi tukonkonona malu avua Yezu muakule pavuaye uyisha, tudi mua kuamba ne: Bukalenge bua Nzambi mbualu buvua ne mushinga wa bungi kudiye.

Bukalenge bua Nzambi ntshinyi? Bukalenge mbulamatadi udibu bakokesha kudi mukalenge kampanda. Nunku, Bukalenge bua Nzambi mmbulamatadi udi Nzambi muenze. Yezu wakakula bikole bua Bukalenge bua Nzambi ebu. Bobu ke buvua tshiena-bualu tshia diyisha diende. Kudi miaba mipete pa 110 mu mukanda wa Matayo, wa Mâko, wa Luka ne wa Yone mudiye wakula bua Bukalenge ebu. Kadi Yezu kavua uyisha amu ne mukana tshianana to. Bivuaye wenza bivua kabidi bilongesha bantu malu a bungi a Bukalenge bua Nzambi ne tshialuabu kuenza.

Mukalenge wa Bukalenge bua Nzambi nnganyi? Bantu ki mbadi belela Mukalenge wa Bukalenge bua Nzambi tukanda bua kumusungula to. Nzambi nkayende ke udi mumusungule. Yezu wakaleja ne: yeye ke uvua Nzambi musungule bua kuikala Mukalenge au.

Yezu uvua mumanye ne: Bible uvua mulaye ne: Masiya uvua ne bua kuikala Mfumu wa Bukalenge buvua ne bua kushala tshiendelele. (2 Samuele 7:12-14; Danyele 7:13, 14; Matayo 26:63, 64) Uvuluke ne: Yezu wakamba patoke muvuaye Masiya uvuabu balaye au. Nunku, uvua mumanye ne: yeye ke Mukalenge uvua Nzambi musungule. (Yone 4:25, 26) Ke bualu kayi Yezu uvua ubikila Bukalenge bua Nzambi imue misangu ne: ‘Bukalenge buanyi.’​—Yone 18:36.

Yezu wakalongesha kabidi ne: kuvua bantu bakuabu bavua mua kukokesha nende mu Bukalenge ebu. (Luka 22:28-30) Wakababikila ne: “tshisumbu tshikese tshia mikoko,” bualu mbakese. Wakabambila ne: ‘Tatu wenu udi musue kunupa bukalenge.’ (Luka 12:32) Mu mukanda wa Buakabuluibua badi bamba ne: bantu 144 000 nebakokeshe ne Kristo.​—Buakabuluibua 5:9, 10; 14:1.

Bukalenge bua Nzambi budi penyi? Yezu wakambila Pilato ne: ‘Bukalenge buanyi kabuena bua pa buloba ebu.’ (Yone 18:36) Mbulamatadi ya bantu kayakuambuluisha Bukalenge bua Nzambi budi Kristo ulombola bua kukokesha to. Yezu wakabikila Bukalenge bua Nzambi misangu ya bungi ne: ‘mbukalenge bua mu diulu.’a (Matayo 4:17; 5:3, 10, 19, 20) Nunku, Bukalenge bua Nzambi mbulamatadi wa mu diulu.

Yezu uvua mutekemene ne dishindika dionso ne: yeye mumane kujikija tshivuaye muluile pa buloba uvua ne bua kupingana mu diulu. Wakamba ne: pavuaye upingana mu diulu, uvua ne bua ‘kulongolola muaba’ bua bantu bavua ne bua kukokesha nende.​—Yone 14:2, 3.

Mmalu kayi adi Bukalenge bua Nzambi buenza? Yezu wakalongesha bayidi bende bua kusambila bua ‘Bukalenge bua Nzambi bulue. Bua benze pa buloba mudiye musue bu mudibu benza mu diulu.’ (Matayo 6:9, 10) Disua dia Nzambi didi dienzeka mu diulu. Nzambi neakumbaje tshidiye musue kuenza ne buloba ku diambuluisha dia Bukalenge buende ebu. Bua kukumbaja disua edi, Bukalenge ebu nebushintulule malu pa buloba bikole.

Mmalu kayi enza Bukalenge bua Nzambi pa buloba? Yezu wakamba ne: Bukalenge bua Nzambi nebubutule bantu babi bua kujikijabu malu mabi. (Matayo 25:31-34, 46) Dîba adi ke diajika dikosa dia mishiku ne malu mabi onso. Yezu wakamba ne: bantu badi ne ‘mitshima mipuekele,’ bantu bakane, bena luse, “badi ne mitshima mitoke” ne bakebi ba ditalala nebapiane buloba.​—Matayo 5:5-9.

Dîba adi buloba ebu nebuikale anu mudibu bunyanguke ne bintu bibi emu anyi? Tòo! Yezu wakamba ne: pikala Bukalenge bua Nzambi bukokesha, malu neashintuluke mu mushindu wa dikema. Tshilejilu, muntu uvuabu bapopele ku mutshi ku luseke lua Yezu wakamba ne: ‘Yezu, pawabuela mu bukalenge buebe, umvuluke.’ Yezu wakamuandamuna ne: ‘Bulelela, ndi nkuambila ne: wewe newikale nanyi mu Mparadizu.’ (Luka 23:42, 43) Bushuwa, Bukalenge bua Nzambi nebukudimune buloba bujima mparadizu, buloba nebulue buimpe anu bu budimi bua Edene.

Mmalu kayi makuabu alua Bukalenge bua Nzambi kuenzela bantu? Yezu kakalaya bantu anu malu enza Bukalenge bua Nzambi tshianana to, kadi wakabalejawu kabidi pavuaye wenza bishima. Yezu wakondapa bantu bikole mu tshishima bua kuleja tshianana malu a bungi alua Bukalenge bua Nzambi kuenza. Matayo udi wamba bua Yezu ne: ‘Wakendakana mu luseke luonso lua Galela, uyisha bantu mu nsunagoga yabu, ubambila lumu luimpe lua bukalenge bua mu diulu; ukolesha bantu bakadi ne mabedi ne matekete onso.’​—Matayo 4:23.

Yezu wakondapa bantu mishindu ya bungi. Tshilejilu, ‘wakatabeja mêsu a muntu mulela mufofo.’ (Yone 9:1-7, 32, 33) Wakalenga muntu uvua ne disama dia nsudi bua kumuondapaye. (Mâko 1:40-42) Bua Yezu kuleja ne: uvua ne bukole bua ‘kumvuija bakadi ne mapapa, ne kuakuisha bakadi tumama,’ wakondapa ‘muntu uvua ne mapapa, uvua kabidi ne tshikukumina.’​—Mâko 7:31-37.

Nansha lufu kaluena mua kuimana kumpala kua Mukalenge udi Nzambi muteke eu to. Kudi miaba isatu mu Mukanda wa Nzambi idibu bafunde ne: Yezu wakajula bantu ku lufu. Tshilejilu, wakabisha muana mulela umue wa mukaji mukamba, muana wa bakaji wa bidimu 12 ne mulunda wende munene Lazalo.​—Luka 7:11-15; 8:41-55; Yone 11:38-44.

Yezu wakambila mupostolo Yone malu malenga avua mindile bantu bikala mu Bukalenge bua Nzambi, wamba ne: ‘Tangilayi, nzubu wa tshilulu wa Nzambi udi munkatshi mua bantu, ne yeye neikale nabu, ne bobu nebikale bantu bende; ne Nzambi muine neikale nabu, neikale Nzambi wabu. Yeye neakupule tshinsonji tshionso ku mêsu kuabu; ne lufu kaluena luikalaku kabidi; madilu kaena ikalaku kabidi, nansha muadi, nansha kanyinganyinga kabidi; malu a kumudilu akumuka.’ (Buakabuluibua 1:1; 21:3, 4) Anji elabi meji, bantu kabatshiyi ne binsonji bia dibungama, kakuyi tunyinganyinga, kakuyi lufu! Ke dîba diakumbana mêyi aa menemene: ‘Benze pa buloba muudi musue bu mudibu benza mu diulu.’

Bukalenge bua Nzambi nebulue dîba kayi? Yezu wakamba ne: ntuadijilu wa bukokeshi buende uvua ne bua kupetangana ne tshikondo tshia pa buatshi tshidibu babikila ne: ‘dikalaku’ diende. Yezu wakatela malu a bungi avua mua kuleja tshikondo tshivua dikalaku diende bu Mukalenge wa Bukalenge bua Nzambi ne bua kutuadija. Wakatela malu makole avua mua kukuata bantu bu mudi: mvita, biyole bia nzala, bikumina, bipupu bia masama ne ditangalaka dia dishipa dia mikenji. (Matayo 24:3, 7-12; Luka 21:10, 11) Malu aa ne makuabu kabidi avua Yezu muambe akatuadija kuenzeka menemene katshia ku tshidimu tshia 1914, tshidimu tshivua Mvita ya kumpala ya buloba bujima mienzeke. Nunku, Yezu ukadi mpindieu Mukalenge. Bukalenge ebu bukadi pa kulua kukumbaja disua dia Nzambi pa buloba mu katupa emu.b

Neupete tshinyi palua Bukalenge bua Nzambi? Neupete tshiudi mutekemene bilondeshile mushindu uudi utumikila malu avua Yezu muambe.

[Mêyi adi kuinshi]