Semena pabuipi ne Nzambi

‘Bukalenge buebe nebujadikibue’

2 SAMUELE 7:1-16

KATSHIA anu ku kale bamfumu ba bungi batu bumbuka mu bumfumu buabu. Kudi batu bapangila ku masungula ne bumbuka ne bakuabu pabu babumbusha ku bukole. Netuambe tshinyi bua Yezu Kristo Mfumu wa Bukalenge bua Nzambi bua mu diulu? Kudi tshintu tshidi mua kumupangisha bua kukokesha bu Mukalenge musungula kudi Nzambi anyi? Tudi tupeta diandamuna mu mêyi avua Yehowa muambile Davidi mukalenge wa Isalele adi mu 2 Samuele nshapita wa 7.

Ku ntuadijilu kua nshapita tudi tumona ne: Davidi wakumvua bibi bu muvuaye yeye muntu usombela mu nzubu muimpe, kadi mushete wa Nzambi muikale mu ntenta wa tshianana.a Davidi wakaleja dijinga diende dia kuibakila Yehowa nzubu muimpe anyi ntempelo. (Mvese 2) Kadi ki nyeye uvua ne bua kumuibaka to. Yehowa wakatuma muprofete Natana bua kumuambila ne: muanende ke uvua ne bua kuibaka ntempelo.​—Mvese 4, 5, 12, 13.

Dijinga divua nadi Davidi diakalenga Yehowa ku muoyo. Bua kuleja muvuaye muanyishe lulamatu lua Davidi ne mu diumvuangana ne milayi ikavuabu bambe, Nzambi wakadia nende tshipungidi umulaya ne: mu dîku diende muvua ne bua kupatuka muntu uvua ne bua kukokesha kashidi. Natana wakambila Davidi bualu buvua Nzambi mulaye ne muoyo mujima ebu ne: ‘Nzubu webe ne bukalenge buebe nebijadikibue ku mêsu kuebe tshiendelele; nkuasa webe wa butumbi neajadikibue tshiendelele.’ (Mvese 16) Mupianyi wa tshipungidi etshi wikala mua kukokesha bua kashidi nnganyi?​—Musambu 89:20, 29, 34-36.

Yezu wa mu Nazaleta uvua muana wa mu ndelanganyi ya Davidi. Pavua muanjelu umanyisha diledibua diende wakamba ne: ‘Mukalenge Nzambi neamupe nkuasa wa butumbi wa tatuende Davidi; neikale mukalenge wa nzubu wa Yakoba tshiendelele; bukalenge buende kabuena ne nshikidilu.’ (Luka 1:32, 33) Nunku, tshipungidi tshivua Nzambi mudie ne Davidi tshiakakumbanyina Yezu Kristo. Kena ukokesha bualu bantu mbamusungule to, kadi dilaya divua Nzambi muenze ne muoyo mujima ke didi dimupesha bukenji bua kukokesha tshiendelele. Katupu muoyo ne: malu atu Nzambi ulaya atu anu akumbana.​—Yeshaya 55:10, 11.

Tudi tulongela malu a mushinga abidi mu mukanda wa 2 Samuele nshapita wa 7. Bua kumpala, tudi ne bua kuikala bashindike ne: kakuena tshintu anyi muntu udi mua kupangisha Yezu Kristo bua kukokesha. Nunku, tuikale bajadike ne: neakumbaje malu avuaye mulaye bua kukumbaja mu bukokeshi buende, mbuena kuamba ne: neenze bua disua dia Nzambi dienzeke pa buloba anu bu mudidi dienzeka mu diulu.​—Matayo 6:9, 10.

Buibidi, muyuki eu udi utuleja bualu kampanda budi butangila Yehowa budi bulenga ku muoyo. Vuluka ne: Yehowa wakamona meji avua mu mutshima wa Davidi ne kuanyisha. Bidi bitukolesha ku muoyo patudi tumanya ne: Yehowa udi wanyisha mushindu utudi bamulamate. Imue misangu, malu atudi katuyi mua kukanda bu mudi masama anyi bukulakaje adi mua kutupangisha bua kuenza malu onso adi muoyo wetu musue kuenza mu mudimu wa Nzambi. Bikalabi nanku, tukolayi ku muoyo bualu Yehowa udi umona malu adi mu muoyo wetu ne dijinga ditudi nadi dia kumutendelela.

[Mêyi adi kuinshi]