Nkonko ya babadi

Yezu wakambila bantu ne: “Nuenu nuikale bakane bu mudi Tatu wenu wa mu diulu muakane.” Mmunyi mudi bantu mua kuikala bakane anyi bapuangane lelu eu?​—Mat. 5:48.

Bua kuandamuna lukonko elu, tudi ne bua kumanya mudibu bakuate mudimu ne miaku “muakane,” “buakane” anyi bupuangane mu Bible. Ki ntshintu tshionso tshidibu bambe ne: ntshiakane mu Bible tshidi tshipuangane to. Kadi Yehowa yeye udi muakane tshishiki anyi mupuangane mu malu onso. Bantu anyi bintu bidi mua kuikala biakane peshi bipuangane mu mushindu kampanda. Miaku ya mu tshiena Ebelu ne mu tshiena Greke idibu bakudimune ne: “buakane” idi misangu ya bungi yumvuija tshintu “tshijima,” “tshikumbane” anyi “katshiyi kalema” bilondeshile muntu udi mutshimanye bimpe.

Nzambi uvua mufuke Adama ne Eva bapuangane mu ngikadilu, mu nyuma ne ku mubidi. Bavua bapuangane bilondeshile mikenji ya Mufuki wabu. Kabakakumbaja mikenji ayi ne bakajimija bupuangane buabu bobu ne bua bana babu bualu bakabenga kutumikila Mufuki wabu. Nunku bantu bonso bakapiana bubi, dipanga bupuangane ne lufu kudi Adama.​—Lomo 5:12.

Anu muvua Yezu muleje patoke mu muyuki wende wa pa mukuna, nansha bantu bapange bupuangane badi mua kuikala bakane mu mushindu kampanda. Mu muyuki au wakaleja tshidi dinanga dipuangane anyi dikumbane diumvuija. Ndinanga dia buena didi nadi Nzambi bua bantu. Yezu wakamba ne: ‘Suayi badi nenu lukuna, lombelayi badi banukengesha Nzambi; nunku nenuikale bana ba Tatu wenu udi mu diulu; bualu bua yeye utu wabandishila bantu babi ne bantu bimpe dîba, yeye kabidi utu watumina bantu bakane ne bantu babi mvula.’ (Mat. 5:44, 45) Bayidi ba Yezu badi bidikija tshilejilu tshipuangane tshia Nzambi padibu bananga bantu bakuabu mushindu eu.

Lelu eu Bantemu ba Yehowa badi baditatshisha pa buloba bujima bua kunanga bantu bakuabu mushindu eu. Mbasue kuambuluisha bantu ba mishindu yonso, bisamba bionso ne bitendelelu bishilangane bua kupetabu dimanya dilelela dia mu Bible. Badi balongesha bantu badi basue malu a mu Bible bapite pa 7 000 000 mu matunga 236.

Yezu wakebeja ne: ‘Binuasua badi banusue, nenuikale ne difutu kayi? Basangishi ba mulambu mene kabatu benza nunku anyi? Binuakidila anu bana benu, nenuenze bualu budi butambe bua banga bantu kudi kunyi? Bantu ba bende kabatu benza nunku anyi?’ (Mat. 5:46, 47) Bena Kristo balelela kabatu basunguluja bantu bilondeshile bisamba biabu anyi tulasa tudibu balonge to. Kabatu bananga anu bantu badi mua kubananga pabu to. Kadi badi bambuluisha bapele ne badi basama, bakulumpe ne bana. Padibu benza nunku badi bidikija dinanga dia Yehowa ne balua bakane anyi bapuangane mu mushindu kampanda.

Netupeteku kabidi bupuangane buvua Adama mujimije anyi? Eyowa, bantu badi batumikila Nzambi ne badi baleja ditabuja diabu mu mulambu wa Yezu nebabupete mu bukokeshi bua bidimu tshinunu bua Kristo, pikala ‘Muana wa Nzambi mua kubutula midimu ya Diabolo.’​—1 Yone 3:8.