Nkonko ya babadi
Mparadizu udibu batela mu Bible udi penyi?
▪ Yezu wakalaya muntu ukavua pa kufua wakaleja ne dikima muvuaye mumuitabuje ne: ‘Wewe newikale nanyi mu Mparadizu.’ (Luka 23:43) Muntu au uvua ne bua kuya penyi? Mparadizu uvuaku mua kuikala mu diulu, pa buloba peshi muaba mukuabu udi bantu bindile dilumbuluisha anyi?
Baledi betu ba kumpala bavua mu Mparadizu. Bible udi utuambila ne: ‘Yehowa Nzambi wakakuna bintu mu budimi ku esete, mu Edene; wakatekamu mulume wakafukaye. Yehowa Nzambi wakangata mulume, wakamuteka mu budimi bua Edene bua kubuipilaye ne bua kubulama.’ (Genese 2:8, 15) Pavuabu bakudimune mêyi aa mu tshiena Greke, bavua bakudimune muaku “budimi” ne: paradeisos, kudibu bapatuile muaku wa mu Tshiluba wa “Mparadizu.”
Anu mutu mulume ne mukajende mua kualabaja dîku padibu benda balela bana, ke muvua Nzambi muambile baledi betu ba kumpala bua kualabaja Mparadizu pavua bantu benda bavulangana. Nzambi wakabambila ne: ‘Nuuje buloba tente; nubukokeshe.’—Genese 1:28.
Mufuki wetu uvua musue ne: bantu basombe mu Mparadizu pa buloba apa ne balela bana. Bavua ne bua kusomba muaba eu bua kashidi kabayi bafua. Buloba buvua ne bua kuikala muaba uvua bantu bonso mua kusomba bua kashidi. Ke bua tshinyi kabiena bikemesha patudi tumona bintu bimpe bidi pa buloba apa bidi bituenza disanka. Bavua batufuke bua kusomba pa buloba buvua ne bintu bimpe.
Nzambi mmushintululaku disua diende anyi? Tòo. Udi utujadikila ne: ‘Nunku dîyi didi dipatuka mukana muanyi nedikale muomumue; kadiena dipingana kundi patupu, kadiyi dianji kuenza muanda undi musue dienze.’ (Yeshaya 55:11) Panyima pa bidimu bipite pa 3 000 bamane kufuka muntu, Bible udi wamba bua “Nzambi mene wakafuka buloba ne wakabuenza” ne: ‘Kakabufuka bu tshintu tshia patupu, wakabufuka bua bantu bashikamapu.’ (Yeshaya 45:18) Disua dia Nzambi edi ki ndishintuluke to. Buloba nebulue kabidi Mparadizu.
Tshidi tshisankisha ntshia ne: Mvese mivule ya mu Bible idi yakula bua Mparadizu idi yumvuija anu muikala nsombelu pa buloba. Tshilejilu, mukanda wa Yeshaya udi uleja ne: ‘Nebase nzubu, nebashikamamu; nebatentule mionji ya tumuma tua mvinyo mu madimi, nebadie tumuma tuayi.’ (Yeshaya 65:21) Mpenyi batubu basa nzubu, bakuna mvinyo ne badia tumuma tuayi? Pa buloba. Mukanda wa Nsumuinu 2:21 udi wamba patoke ne: “Badi ne mitshima miakane nebashikame mu buloba.”
Yezu pende wakakula bua Mparadizu wa pa buloba. Kadi wakakula kabidi bua Mparadizu wa mu diulu uvua mulongoluela anu bantu bakese bavua basungula. (Luka 12:32) Padi bantu aba bafua badi babishibua bua kuya mu Mparadizu wa mu diulu bua kukokesha Mparadizu wa pa buloba pamue ne Yezu. (Buakabuluibua 5:10; 14:1-3) Bantu bakokesha ne Yezu mu diulu aba nebalombole Mparadizu wa pa buloba bimpe ne benza bua bantu badimu bikale batumikila mikenji ya Nzambi.
Yezu uvua mumanye ne: ke tshivua Nzambi musue bua buloba. Nzambi uvua ne Yezu mu diulu pavuaye ufuka budimi bua Edene. Bantu bonso badi baleja ditabuja nebapete muoyo mu Mparadizu pa buloba mu matuku atshilualua. (Yone 3:16) Yezu udi ulaya bantu ba nunku ne: ‘Nenuikale nanyi mu Mparadizu.’—Luka 23:43.
[Mêyi a dianyisha bua bimfuanyi mu dibeji 15]
© FORGET Patrick/SAGAPHOTO.COM/Alamy