Nkonko ya babadi
Nzambi udiku wangata bantu ba dikoba kampanda ne mushinga kupita bakuabu anyi?
▪ Tòo. Bible udi wamba bimpe ne: ‘Nzambi kena ne kansungunsungu, kadi yeye udi witabuja wa mu tshisamba tshionso udi umutshina, udi wenza malu makane.’—Bienzedi 10:34, 35.
Mmuenenu wa Nzambi mu bualu ebu mmushilangane ne wa bantu bena mapanga bikole menemene. Bantu ba bungi batu bela meji ne: dikoba kampanda (nangananga diabu) ndipite dia bakuabu. Ngelelu wa meji eu udi upetangane ne wa Charles Darwin. Wakafunda ne: “Mu bikondo kampanda kumpala eku, . . . bantu bashidimuke ba dikoba kampanda nebajikije bantu ba makoba makuabu badi benza malu bu nyama ne nebapingane pa muaba wabu.” Bia dibungama, bantu ba bungi batu bakengeshibua kudi bantu badi badimona bu badi ne dikoba dipite dia bakuabu.
Kumona dikoba dietu bu dipite dia bantu bakuabu nkuimpe anyi? Tshilejilu, bena malu a sianse badiku bajadika ne: bilondeshile mushindu mutu bantu basambulujilangana ngikadilu, amue makoba mmapite makuabu anyi? Tòo. Mulongeshi Bryan Sykes, mumanyi wa mushindu utu bantu basambulujilangana ngikadilu udi wamba ne: “Kakuena ngikadilu kampanda idi bantu bapiane idi mua kushindikila muntu ne: tshisamba anyi dikoba diende ndipite dia bakuabu to. . . . Ntu anu ndiebeja ni kutu ADN (tuntu tutu munda mua selile tutu tuambuluisha bua kusambuluja ngikadilu ya bifukibua bidi ne muoyo kudi bikuabu) wa bena Greke anyi wa bena Italie; kadi mu bulelela, katuku to. . . . Mu kuamba kuimpe, tudi anu bantu bamue.”
Malu adi bena sianse bafike ku dimanya aa adi umvuangana ne tshidi Bible wamba. Mukanda wa Nzambi udi wamba ne: Nzambi wakafuka anu muntu mulume umue ne mukaji umue; kudibu ke kudi bantu bonso ba pa buloba bafumine. (Genese 3:20; Bienzedi 17:26) Ku mêsu kua Nzambi, bantu bonso badi mushindu umue.
Yehowa katu bualu ne dikoba anyi mutu kuisu kua muntu to. Kadi kudi tshintu tshidiye wangata ne mushinga wa bungi. Tshintu atshi mmuoyo wetu anyi tshitudi munda muetu. Bible udi wamba ne: “Bantu badi batangila anu mubidi, kadi Yehowa udi utangila mu mutshima.” (1 Samuele 16:7) Kuvuluka bualu ebu kudi kutukankamija bikole. Mushindu kayi?
Bantu ba bungi ba makoba mashilashilangane kabatu anu basanka ne mutu tshimuenekelu tshiabu to; nansha nanku, tudi ne bukole bukese bua kushintulula dikala dia dikoba dietu. Kadi, tudi mua kuakaja tshidi ne mushinga wa bungi: meji ne malu adi mu muoyo wetu. (Kolosai 3:9-11) Tuetu basue anu kuamba bulelela, tutu ne lungenyi lua kudiumvua bapite kakese bantu ba dikoba kampanda anyi kudiumvua bashadile kudi ba dikoba dikuabu. Bu mudi lungenyi elu lubengangana ne meji a Nzambi, tudi ne bua kudienzeja bua kumbusha meji a nunku mu mutshima wetu.—Musambu 139:23, 24.
Bu mutudi tudienzeja bua kudimona tuetu ne bantu bakuabu mudi Yehowa utumona, tuikalayi bajadike ne: udi utuambuluisha. Dîyi diende didi dituvuluija ne: ‘Mêsu a Yehowa adi akenzakana ku nseke yonso ya buloba bua kuleja bukole buende kudi bantu badi ne mitshima miakane kudiye.’ (2 Kulondolola 16:9) Bualu ebu mbulelela nansha tuetu bikale bantu ba dikoba kayi.