Diandamuna dia lukonko elu didiku ne mushinga anyi?

“Pamvua ne bidimu dikumi, ngakabanga kupatuka ne bana ba balume. Kumpala, tuvua mua kukuatangana ku tshianza ne kutuangana mishiku. Pashishe, tuakabanga kulengangana miaba mibi ne bivua anu binjula dijinga dikole dia kuenza malu a busenji. Pangakakumbaja bidimu 15, meme kubanga mudimu. Bansongalume batuvua tuenza nabu mudimu bakansankidila ne kujingabu bua ngikale ndala nabu. Mvua musue anu kuikala mu dingomba diabu ne kuenza tshionso tshivuabu benza. Mvua musue bua banganyishe, bualu ebu buakamfikisha ku dienda masandi bikole.”​—SARAH,a WA MU AUSTRALIE.

BIDIKU mua kukukemesha bu wewe mua kumanya ne: Sarah uvua mukolele mu dîku dia bantu bavua badifile bikole mu malu a Nzambi anyi? Baledi bende bakaditatshisha bua kumukolesha bilondeshile bikadilu bia mu Bible. Kadi Sarah wakasungula diende disangu.

Bantu ba bungi badi mua kuanyisha tshivua Sarah muenze. Batu bamba ne: mmuenenu wa Bible bua dimanyangana dia mulume ne mukaji ukadi mupitshile matuku. Bakuabu kabena bamona dishilangana pankatshi pa kudifila bikole mu malu a ntendelelu ne kuikala ne nsombelu wa tshiendenda udi bantu bamone bu udi kayi ne bualu.

Bidiku ne mushinga bua wewe kumanya ne kutumikila tshidi Bible wamba bua dimanyangana anyi? Bible n’Dîyi didi ‘difume munda mua Nzambi bu mupuya wende ne didi ne mudimu muimpe wa kuyisha bantu.’ (2 Timote 3:16) Wewe witaba ne: Nzambi ke wakafuka bantu ne yeye ke uvua mufundishe Bible, neumone ne: bidi ne mushinga bua wewe kumanya tshidi Bible wamba bua bualu ebu.

Diakabi, bantu ba bungi batu ne tshibuejakaji bua tshidi Bible wamba bua dimanyangana. Bamfumu ba bitendelelu badi ne malongesha mashilashilangane bua tshilumbu tshia dimanyangana ne badi bamba mudiwu mangatshila onso mu Bible. Tshilumbu etshi ntshitapulule bitendelelu binene bia bungi.

Pamutu pa kulonda tshidi bakuabu bamba, kuenaku mua kukeba bua kumanya tshidi Bible wamba bua tshilumbu tshia dimanyangana dia mulume ne mukaji anyi? Tshiena-bualu tshidi tshilonda netshiandamune nkonko dikumi itu bantu batamba kudiela bua dimanyangana bilondeshile Bible. Mu tshiena-bualu atshi, neupete mandamuna mimpe bilondeshile tshidi Bible wamba bulelela. Tshiena-bualu tshia ndekelu tshia mu biena-bualu ebi netshileje bua tshinyi mapangadika atudi tuangata mu bualu ebu adi ne mushinga.

[Mêyi adi kuinshi]