Tshia kuenza bua bikondo bia dilonga bikale bia disanka ne bituambuluishe
Mmunyi mutudi mua kupeta disanka divule patudi tulonga Bible? Ntshinyi tshitudi mua kuenza bua bikondo bia dilonga kutuambuluishabi bikole? Tukonkononayi mu tshikoso malu asatu a mushinga adi mua kuenza bua dilonga dietu dia Bible dituambuluishe.
1 DISAMBILA: Bualu bua kumpala butudi mua kuenza, nkusambila. (Mus. 42:8) Bua tshinyi? Tudi ne bua kumona dilonga dia Dîyi dia Nzambi bu tshitupa tshia ntendelelu wetu. Ke bualu kayi tudi ne bua kulomba Yehowa bua atupeshe lungenyi luimpe ne nyuma wende. (Luka 11:13) Muanetu mukuabu Barbara udi misionere wa bidimu bia bungi udi wamba ne: “Ntu nsambila misangu yonso kumpala kua kubala ne kulonga Bible. Pashishe ntu ndiumvua ne: Yehowa udi nanyi pabuipi ne udi wanyisha bindi ngenza.” Kusambila kumpala kua kulonga kudi kunzulula meji etu ne mutshima wetu bua kuitaba ne muoyo mujima malongesha atudi tupeta.
2 DIELANGANA MEJI: Bu mudi bantu ba bungi kabayi ne dîba, batu babala Dîyi dia Nzambi pa mutu pa mutu. Kadi padibu benza nunku badi bapangila malu mimpe avuabu mua kupeta mu dilonga dia Bible. Muanetu Carlos udi muenzele Yehowa mudimu kukadi bidimu bipite pa 50 mmufike ku dimona mudibi ne mushinga bua kukeba tshikondo tshia kuelangana meji bua dilonga diende kumuambuluishadi. Udi wamba ne: “Ndi mpindieu mbala mabeji makese a mu Bible musangu umue, mmumue ne: nseke yonso ibidi ya dibeji dimue ku dituku. Nunku ndi mua kupeta dîba dia bungi dia kuelangana meji pa malu andi mubale bua kupeta malongesha mimpe.” (Mus. 77:12) Patudi tudikebela dîba dia kuelangana meji, tudi tukolesha dimanya ne ngumvuilu wetu wa disua dia Nzambi.—Kolos. 1:9-11.
3 DITUMIKILA: Tuetu bamone mushinga udi nawu bualu kampanda, budi mua kutuambuluisha bikole. Ke mudibi kabidi bua dilonga dia Bible. Gabriel, nsongalume muena Kristo utu ne tshibidilu tshia kulonga Bible udi wamba ne: “Dilonga ndingambuluishe bua kupita bimpe ne malu a mu nsombelu ne bua kumanya mua kuambuluisha bantu bakuabu. Ndi ndienzeja bua kutumikila malu onso andi ndonga mu nsombelu wanyi.” (Dut. 11:18; Yosh. 1:8) Bushuwa, kudi dimanya dia bungi mu Dîyi dia Nzambi ditudi mua kupeta ne kutumikila.—Nsu. 2:1-5.
DIAMBULULA: Tudi ne diakalenga dia kupeta dimanya didi Yehowa muena meji onso ufila. (Lomo 11:33) Nunku wewe ujinga kulonga musangu udi ulonda, ikala mujadike ne: udi muanji kusambila Yehowa bua akupeshe lungenyi luimpe ne nyuma wende. Pashishe angata bikondo bia kuelangana meji pa biudi ubala. Utumikile malu audi ulonga mu nsombelu webe. Wewe muenze malu a mushinga aa, neumone ne: dilonga diebe dia Bible nedikale dikusankisha ne dikuambuluisha.