Badi bakeba mandamuna

Mufundi kampanda wakamba ne: “Bantu ba bungi badi ne mmuenenu mishilangane bua Yezu. Nansha tuetu bikale ne ditabuja dikole peshi katuyi nadi, tuetu bonso tutu tudikonka ne: ‘muntu eu nnganyi?’”​—STAN GUTHRIE.

BANTU batu basue kumanya tshidi Yezu. Mikanda idi yakula bua bualu buende idi ya bungi mu bantu. Filme yende mmimanyike bikole mu miaba ya bungi. Kadi, bantu ba bungi batshidi anu badiela nkonko bua bualu bua Yezu. Badi ne mmuenenu mishilashilangane bua tshivua Yezu muikala menemene.

Kukadi bidimu ndambu, bakamona-kamba babidi bakela bantu nshinga babalomba bua kuandamuna lukonko elu: “Yezu uvua nganyi?” Amue a ku mandamuna avua bantu bafile ng’wowu aa:

● “Bidi bimueneka ne: uvua labi (mulongeshi) wakafila tshilejilu tshimpe tshia kumvuilangana luse mu nsombelu wende.”

● “Uvua muntu anu bu bantu bonso aba, kadi uvua ne nsombelu wa pa buende.”

● “Kakuena tshidi tshileja ne: Yezu uvuaku to.”

● “Yezu udi Muana wa Nzambi wakaledibua, kufuaye ne kubishibua ku lufu bua kutujimijila mibi yetu. Udi ne muoyo lelu ne nealue pa buloba kabidi.”

● “Ndi ngitabuja ne: Yezu Kristo udi muana umuepele wa Nzambi; yeye umuepele au muikale muntu ne nzambi kabidi.”

● “Kuitaba miyuki ya malu a Yezu mbuana.”

Mbimueneke patoke ne: mmuenenu mishilangane eyi kayena anu yonso milelela to. Kudiku muaba kampanda muimpe utudi mua kupetela mandamuna malelela a nkonko ya malu adi atangila Yezu anyi? Bafundi ba tshibejibeji etshi badi bitabuja ne: Bible n’Dîyi dia Nzambi ne anu yeye nkayende ke udi utuambila bulelela buonso budi butangila Yezu.a​—2 Timote 3:16.

Mu tshiena-bualu tshidi tshilonda, netumone mandamuna adi Bible ufila bua imue nkonko itu bantu batamba kudiela bua Yezu. Yeye muine wakamba ne: njila wa lupandu mmunzuluila ‘muntu yonso wamuitabuja.’ (Yone 3:16) Tudi tukulomba bua ukonkonone mandamuna au, pashishe udiangatshile dipangadika biwikale ujinga kumanya malu a bungi adi atangila Yezu ne mushindu uudi mua kuleja ne: udi mumuitabuje.

[Mêyi adi kuinshi]