Udi mua kupeta nsombelu muimpe mu matuku atshilualua​—Mushindu kayi?

MMUNYI muudi mua kupeta nsombelu muimpe? Umue wa ku mishindu ngua kukonkonona malu adi mua kukufikila mu matuku atshilualua bua mapangadika audi wangata lelu.

Kadi bidi mua kukukolela bua kuangata mapangadika adi mua kukusankisha mu nsombelu webe mujima. Bua tshinyi? Bualu bantu ba bungi mbasue kupeta masanka a lelu lelu. Tshilejilu udi mua kumona ne: kutumikila mibelu ya mu Bible kudi mua kunuambuluisha bua kushemeja malanda bimpe mu dîku dienu. (Efeso 5:22–6:4) Kadi bua wewe kuenza nanku, udi ne bua kuditatshisha bua mudimu webe wa bianza ne dijikija dia lutetuku kabikupangishi bua kupeta dîba dia kuikala kusomba ne bena mu dîku diebe. Anu mutubi mu nsombelu ya bungi, udi ne bua kusungula masanka a tshitupa tshîpi anyi a musangu mule. Mmunyi muudi mua kupeta bukole budi mua kukuambuluisha bua kusungula njila muimpe? Enza malu anayi aa.

1 Ela meji ku tshidi mua kukufikila bua mapangadika ebe

Paudi musue kuangata dipangadika, ela meji bimpe bua bipeta bidi mua kumueneka. Bible udi wamba ne: “Muntu mudimuke udi utangila dikenga diamba kumukuata, udi usokoma.” (Nsumuinu 22:3) Wewe mukonkonone bimpe malu adi mua kukufikila, nebikusake bua kuepuka njila udi pamuapa mua kukukebela njiwu. Kadi, wewe muele meji bua masanka a musangu mule adi mapangadika ebe mimpe mua kukupetesha, nebikusake bua kuangata mapangadika a meji.

Diebeje ne: ‘Mbipeta kayi bikale mapangadika anyi mua kumpetesha panyima pa tshidimu tshimue, bidimu 10 anyi 20 kubangila ku mpidieu? Ntshinyi tshikala mapangadika anyi mua kuenzela mushindu undi ndiumvua anyi makanda anyi a mubidi? Ntshinyi tshidi mapangadika anyi mua kuenzela bena mu dîku dianyi anyi bantu bakuabu?’ Nkonko ya mushinga iudi mua kudiebeja ngeyi: ‘Mapangadika andi ngangata neasankishe Nzambi anyi? Ntshinyi tshidiwu mua kuenzela malanda anyi nende?’ Bu mudi Bible mmufundisha ku nyuma wa Nzambi, udi mua kukuambuluisha bua ujingulule dipangadika didi mua kusankisha Nzambi ne udi mua kukudimuija ku malu mabi audi pamuapa ulengulula.​—Nsumuinu 14:12; 2 Timote 3:16.

2 Konkonone malu kumpala kua kuangata mapangadika

Bantu ba bungi batu basue kuidikija bantu badi babanyunguluke pamutu pa kudiangatshilabu mapangadika. Kadi nsombelu kampanda kena muimpe anu bualu bantu ba bungi badi bamulonda to. Konkonone malu kumpala kua kuangata mapangadika. Tuangate tshilejilu tshia Natalie.a Udi wamba ne: “Mvua musue kupeta dibaka dimpe. Kadi mvua mmona ne: kabivua bimpe bua meme kusedibua kudi muntu uvua ne nsombelu wa buena wanyi. Balunda banyi bonso ba mu tulasa bavua ne meji a bungi. Kadi bavua bangata mapangadika mabi. Misangu yonso bavua bashintulula bakaji anyi balume. Anu bu bobu, mvua panyi ne balume ba bungi. Nsombelu eu wakakembela ntatu ya bungi mu lungenyi.”

Natalie wakatuadija kulonga Bible ne Bantemu ba Yehowa. Udi wamba ne: “Mvua mumone munkatshi mua Bantemu bansonga bavua ne musangelu ne bantu bavua mu mabaka mimpe. Ngakatuadija kushintulula bikadilu bianyi ne nsombelu wanyi ku kakese ku kakese, nansha muvuabi kabiyi bipepele.” Bualu ebu buvua bupatule bipeta kayi? Natalie udi wamba ne: “Mvua anu musue kusedibua kudi muntu uvua unsankisha bikole. Mu kupita kua bidimu, ngakalua kusedibua kudi muntu utuvua nende mu tshitendelelu tshimue. Ndi mumone ne: Nzambi mmumpeteshe nsombelu wa mu dîku muimpe umvua tshiyi muelele meji to.”

3 Ela meji bua tshidi mapangadika ebe mua kukuenzela mu matuku atshilualua

Bua kutantamena meji a kujinga nsombelu wa lelu lelu, udi ne bua kumanya bimpe nsombelu wa matuku atshilualua uudi ujinga ne tshiudi mua kuenza bua kumupeta. (Nsumuinu 21:5) Kuimanyinyi ne ngelelu webe wa meji pa bidimu 70 anyi 80 bidi muntu mua kuenza pa buloba to. Kadi, ela meji bua masanka awikale nawu kashidi mu matuku atshilualua anu mudi Bible uleja.

Bible udi uleja ne: ku diambuluisha dia mulambu wa Yezu Kristo udi upikula, Nzambi mmulongolole malu bua bantu bapete muoyo wa tshiendelele. (Matayi 20:28; Lomo 6:23) Nzambi mmulaye ne: mu katupa kîpi emu, neakumbaje malu onso adiye mulongolole bua kuenzela bantu pa buloba. Bantu badi banange Nzambi nebapete muoyo wa kashidi pa buloba bulengeja bimpe menemene. (Musambu 37:11; Buakabuluibua 21:3-5) Bua wewe kuikala ne nsombelu wa buena eu anu wewe umuenena malu kule.

4 Enza muebe muonso bua kukumbaja bipatshila biebe

Mmunyi muudi mua kupeta nsombelu muimpe wa matuku atshilualua udi Nzambi mulaye? Tuadija kulonga bua kupeta dimanya dia malu a Nzambi. (Yone 17:3) Dimanya dijalame dia mu Bible nedikuambuluishe bua kuitaba ne: malu adi Nzambi mulaye bua matuku atshilualua neakumbane bulelela. Ditabuja dia mushindu eu didi mua kukusaka bua kushintulula nsombelu webe bua Nzambi akuanyishe.

Tuakule bua tshilejilu tshia Michael. Udi wamba ne: “Ngakatuadija kukuatshika maluvu ne diamba pantshivua ne bidimu 12. Ngakabuela mu dingumba dia bantomboji ne mumanye ne: nemfue kumpala kua kukumbaja bidimu 30. Tshiji tshimvua natshi tshivua tshinsaka misangu ya bungi bua kudishipa. Mvua ngela meji ne: mvua ne malu a bungi a kuenza mu nsombelu wanyi, kadi tshivua ne mushindu wa kuenza to.” Patshivua Michael mu tulasa, mulunda wende mukuabu uvua pende ntomboji wakatuadija kulonga Bible ne Bantemu ba Yehowa. Michael wakitaba pende bua kulonga Bible.

Malu a mu Bible avua Michael mulonge avua mashintulule muvuaye umona matuku atshilualua. Michael udi wamba ne: “Mvua mulonge ne: mu matuku atshilualua buloba nebulue mparadizu, ne bantu nebasombe mu ditalala kakuyi ntatu to. Ngakatuadija kumona nsombelu eu bu ungikale nende mu matuku atshilualua. Meme kudifundila tshipatshila tshia kukolesha malanda anyi ne Yehowa. Kadi kabivua anu bipepele bua meme kusankisha Yehowa misangu yonso to. Nansha pankavua mutuadije kulonga Bible, mvua nkuatshika imue misangu. Musangu mukuabu meme kufika too ne kudienda masandi ne nsongakaji kampanda.”

Mmunyi muakafika Michael ku ditantamena lutatu luende elu ne kutuadija kuenza malu mu mushindu muimpe? Udi wamba ne: “Mulongeshi wanyi wa Bible wakankankamija bua kuikala kubala Bible dituku dionso ne kudia bulunda ne bantu badi basue kusankisha Nzambi. Ngakalua kujungulula ne: balunda banyi ba kale abu batshivua anu bansaka ku malu mabi. Nansha mutukavua bibidilangane nabu bikole, ngakalekela kubuela mu dingumba diabu.”

Michael wakadifundila bipatshila bia kukumbaja mu matuku makese, biakalua kumuambuluisha bua kukumbaja tshipatshila tshiende tshinene tshia kuenza malu adi umvuangana ne disua dia Nzambi. Udi pebe mua kuenza nanku. Funda tshipatshila tshiudi ujinga kukumbaja panyima pa matuku a bungi ne malu audi mua kuenza bua kutshikumbaja. Leja bantu bakuabu badi mua kukuambuluisha bipatshila biebe, ne ubalombe bua bakuleje tshiudi mua kuenza bua kuya kumpala.

Kuladikiji malu bua kulonga malu a Nzambi ne kutumikila mikenji yende mu nsombelu webe. Enza malu adi mua kukuambuluisha bua kunanga Nzambi bikole ne Bible Dîyi diende. Dîyi dia Nzambi didi diamba bua muntu udi utumikila mikenji ya mu Bible ne: “Malu onso adiye wenza adi atuta diakalengele.”​—Musambu 1:1-3.

[Mêyi adi kuinshi]