Kuenzela bantu malu mimpe kudi kubatalaja tshiji

MAMU mukulakaje mukuabu diende Rie kavua musue pavua Bantemu babidi ba mu ditunga dia Pays-Bas, George ne Manon balue kumuambila lumu luimpe lua Bukalenge to. Bantemu aba bakalua kumanya ne: mamu au uvua mufuishe balume misangu ibidi ne muanende wa balume, ne uvua kabidi ne disama dia binyoka. Nansha muvuaye ubateleja ndambu pavuabu bamuyisha, kavua anu musue to.

George wakambila Manon ne: bamupinganyine musangu mukuabu ne bamutuadile bilongo bualu uvua umueneka kayi ne muntu wa kumusamba ne mubungame. Pakenzabu nanku, biakakemesha Rie ne wakasanka bikole. Kadi, kavua ne dîba bua bobu kuyukila to; nunku, bakumvuangana bua kulua kupetangana musangu mukuabu. Pakapingana George ne Manon, kabakapeta muntu kumbelu to. Nansha muvuabu bamupinganyine misangu ya bungi, kabavua anu bamupeta to. Bakatuadija kuela meji ne: uvua ubanyema.

Dimue dituku, George wakasangana Rie kumbelu. Rie wakalomba luse bua muvuaye kayi munemeke tshipungidi ne kulejaye ne: uvua mubuele mu lupitadi. Wakamba ne: “Udiku mumanye tshimvua muenze panuvua banshiye anyi? Ngakatuadija kubala Bible.” Bakayukila bimpe ne kutuadijabu kulonga Bible.

Pavua Rie ulonga Bible, wakashintuluka, kulekelaye dibungama ne kulua muntu wa disanka ne malu malenga. Nansha muvuaye musombele anu kumbelu, wakatuadija kuyisha muntu yonso uvua ulua kumutangila. Bua masama, kavua ukumbana bua kuya mu bisangilu pa tshibidilu to; kadi, uvua usanka pavua bena Kristo nende balua kumutangila. Pakakumbajaye bidimu 82, wakabuela mu mpuilu wa tshijengu, kutambulaye batismo bua kuleja muvuaye mudilambule kudi Nzambi.

Panyima pa ngondo mikese tshianana wakafua ne bakasangana mukanda kampanda uvuaye mufunde. Mu mukanda au uvua muleje lutatu lua bunkaya bua bukulakaje ne kuleja mushinga wa kuenzelangana malu ne bulenga. Manon udi wamba ne: “Pamvua mubale mukanda au, biakandenga bikole. Ndi ne disanka bua muvua Yehowa mutuambuluishe bua kuenzela mamu au malu ne bulenga.”

Bushuwa, tshilejilu tshia Yehowa tshidi tshitusaka bua kuleja bantu bakuabu dinanga ne kubenzela malu ne bulenga. (Ef. 5:1, 2) Netupatule bipeta bimpe mu mudimu wetu patudi ‘tudimanyisha bu bena mudimu ba Nzambi mu bulenga.’​—2 Kol. 6:4, 6.