TSHIENA-BUALU TSHINENE: NTSHINYI TSHITUDI TULONGELA KUDI MOSE?
Mose uvua nganyi?
Udi wela meji ku tshinyi paudi umvua bakula bua Mose? Udi umumona bu:
muana udi mamuende mumusokoke mu tshisaka ku muelelu wa musulu wa Nile anyi?
nsongalume uvuabu bakoleshe mu nsombelu muimpe mu Ejipitu kudi muana wa bakaji wa Palô, kadi kayi mupue muoyo ne: uvua muena Isalele anyi?
muntu uvua mulame mikoko mu Midiyana bidimu 40 anyi?
muntu uvua muyukile ne Yehowaa kumpala kua tshipuka tshitema kapia anyi?
muntu uvua muimane kumpala kua mukalenge wa Ejipitu ne dikima ulomba bua kulekelabu bena Isalele ku bupika anyi?
muntu uvua mumanyishe ku bulombodi bua Nzambi bipupu Dikumi bivua ne bua kukuata Ejipitu pavua mukalenge wa Ejipitu mutombokele Nzambi mulelela anyi?
muntu uvua mulombole bena Isalele mubapatule mu Ejipitu anyi?
muntu uvua Nzambi mukuate nende mudimu bua kutapulula Mbuu Mukunze anyi?
muntu uvua mupeshe bena Isalele Mikenji dikumi ya kudi Nzambi anyi?
MOSE uvua muenze malu onso aa ne makuabu a bungi. Kabiena bikemesha bua mudi bena Kristo, bena Yuda ne ba-mizilman banemeka Mose bikole.
Kakuyi mpata, Mose uvua muprofete uvua ‘muenze malu a kukema.’ (Dutelonome 34:10-12) Uvua mulekele Nzambi bua enze nende mudimu mu mushindu wa dikema. Kadi Mose uvua muntu bu tuetu. Anu bu muprofete Eliya uvua mumueneke ku luseke luende mu tshikena kumona patshivua Yezu pa buloba, Mose uvua “muntu bu tuetu.” (Yakobo 5:17; Matayi 17:1-9) Mose uvua mutuilangane ne amue malu a bungi a buena atudi tutuilangana petu nawu lelu eu, kadi wakaatantamena bimpe menemene.
Udiku musue kumanya muvuaye muatantamene anyi? Konkonona ngikadilu mimpe isatu ivua Mose muleje ne tshitudi mua kulongela ku tshilejilu tshiende.
a Bible udi uleja ne: dîna dia Nzambi n’Yehowa.