MANDAMUNA A NKONKO YA MALU A MU BIBLE

Bua tshinyi tudi ne bua kusambila?

Yehowa Nzambi mmusue bua tuikale tuyukila nende, tumuambila malu adi matutonde badilekelele. (Luka 18:1-7) Udi ututeleja bualu udi uditatshisha bua bualu buetu. Bu mudi Tatu wetu wa mu diulu utulomba ne muoyo mujima bua kumusambila, katuenaku mua kumona ne: kuitaba dilomba diende edi ndiakalenga dinene anyi?​—Bala Filipoyi 4:6.

Kusambila kakuena kumvuija anu kulomba diambuluisha to. Kadi, kudi kabidi kutuambuluisha bua kusemena pabuipi ne Nzambi. (Musambu 8:3, 4) Patudi tuleja Nzambi majinga etu, tudi tukolesha malanda etu nende.​—Bala Yakobo 4:8.

Mmunyi mutudi mua kusambila?

Patudi tusambila, Nzambi kena ulomba bua tumusambile ne miaku milengeja bimpe anyi tuambulule masambila makuata ku muoyo to. Kena nansha ulomba bua wikale mosombe anyi muimane mu mushindu kampanda musunguluke bua kumusambila to. Yehowa udi utulomba bua kumusambila ne mêyi adi afuma mu muoyo wetu. (Matayi 6:7) Tshilejilu, mu Isalele wa kale, Hana uvua usambila bua lutatu kampanda luvuaye nalu mu dîku diende. Pashishe, kanyinganyinga kende kakakudimuka disanka, wakela Nzambi tuasakidila mu disambila dienza ne muoyo mujima.​—Bala 1 Samuele 1:10, 12, 13, 26, 27; 2:1.

Ndiakalenga dinene ditudi nadi! Tudi mua kuleja Mufuki malu adi matutonde. Tudi petu mua kumutumbisha ne kumuela tuasakidila bua malu adiye wenza. Bushuwa, katuena ne bua kulengulula diakalenga dimpe dia mushindu eu to.​—Bala Musambu 145:14-16.