Yehowa udi ubenesha lungenyi lua budisuile

MUFUKI wetu mmupeshe bantu dipa dia mushinga dia kudisunguila malu. Kabidi, udi ubenesha bantu badi badifila ne muoyo mujima bua kuenza mudimu ne dipa edi bua kutuma ntendelelu mulelela kumpala ne badi badienzeja bua kutumbisha dîna diende dia tshijila ne kutua tshipatshila tshiende tshinene nyama ku mikolo. Yehowa ki mmusue bua muntu kumutumikila ku tshimfula muoyo bualu mbamukanyine anyi mbamuenzeje malu ku bukole to. Kadi, udi wangata didifila dia muntu muenzeja kudi dinanga dilelela ne dianyisha ne mushinga wa bungi.

Tshilejilu, pavua bena Isalele mu tshipela tshia Sinayi, Yehowa wakabambila bua kuibaka muaba wa ntendelelu. Wakamba ne: ‘Usangishe kupa kua Yehowa munkatshi muenu; muntu yonso udi witabuja mu mutshima wende, alue biende ne kupa kua Yehowa.’ (Ekes. 35:5) Muena Isalele yonso uvua mua kufila tshivuaye mukumbaje, ne dipa dionso dia budisuile nansha diodi dia mushindu kayi anyi dia mushinga kayi, divua mua kuambuluisha mu mushindu mukumbane bua kukumbaja tshipatshila tshia Nzambi. Bantu bakenza tshinyi?

‘Muntu yonso wakadi mutshima wende umuenzeja’ ne ‘wakadi tshipapayi’ wakafila mulambu wa budisuile ‘muitabuje mu mutshima wende.’ Bantu balume ne bantu bakaji bakalua ne bintu bua mudimu wa Yehowa. Bakalua ne tukanu tua ku matshi, tukanu tua ku minu, nkanu ya ku maboko, or, tshiamu tshia argent ne tshia mitaku, bilulu bia bleu ne bikunzubile ne bikunzekunzuu ne bia lin, ne bia miosa ya mbuji ne biseba bia bimpanga bitua mu mâyi makunzekunzuu, ne biseba bia nyama ya nkonga ya mu mâyi, mabaya a mitshi ya misese, mabue a mushinga mukole, bintu bia dipembu dimpe bia kuela mu manyi ne manyi. Ndekelu wa bionso, ‘bakadi ne bungi bua bintu bia kuenza nabi mudimu wonso, ne bintu bikuabu pa mutu.’—Ekes. 35:21-24, 27-29; 36:7.

Tshivua tshisankishe Yehowa bikole ndungenyi lua budisuile luvua nalu bantu bavua batue ntendelelu mukezuke nyama ku mikolo, kadi ki mbintu bivuabu bafile to. Bavua kabidi bafile dîba diabu ne benze mudimu mukole. Bible udi wamba ne: ‘Bakaji bonso bakadi ne lungenyi lule bakakuma bilulu ne bianza biabu.’ Bushuwa, ‘bakaji bonso bakadi ne lungenyi lule mu mitshima yabu bakakuma bilulu ne miosa ya mbuji.’ Kabidi, Yehowa wakapesha Besalele ‘lungenyi lule lua kuenza nalu midimu yonso.’ Nanku, Nzambi wakuuja Besalele ne Oholiaba ne dimanya dikumbane bua kuenza mudimu wonso uvuaye mubapeshe.—Ekes. 35:25, 26, 30-35.

Pavua Yehowa mulombe bena Isalele bua kufila mapa, uvua mujadike ne: muntu yonso uvua ‘mutshima wende usaka bua kufila’ uvua ne bua kutua ntendelelu mulelela nyama ku mikolo. Nunku, wakababenesha pa kubapesha lungenyi luimpe ne bulombodi ne disanka dia bungi. Nunku Yehowa wakaleja ne: padiye ubenesha lungenyi lua budisuile lua batendeledi bende mmujadike ne: badi ne bintu ne dimanya dia kukumbaja disua diende. (Mus. 34:9) Paudi wenzela Yehowa mudimu ku budisuile neabeneshe lungenyi luebe alu.

MUSHINDU UDI BAMUE BAFILA MAPA BUA MUDIMU WA PA BULOBA BUJIMA

Anu bu mu tshikondo tshia Paulo, bantu bavule lelu batu ‘bateka tshintu ku luseke’ anyi balama makuta bungi kampanda bua kuela mu tushete tua mapa a “Mudimu wa pa buloba bujima.” (1 Kol. 16:2) Ku ngondo yonso, bisumbu bitu bituma makuta aa ku biro bia Bantemu ba Yehowa bidi bitangila mudimu wa ditunga diabu. Nudi mua kutuma kabidi makuta aa buludiludi ku biro bia Bantemu ba Yehowa bidi bitangila mudimu mu ditunga dienu. Bua kumanya bulongolodi budi Bantemu ba Yehowa benza nabu mudimu mu ditunga dienu budi bumanyike kua mbulamatadi, suaku webeje Betele udi utangila midimu mu ditunga dienu. Udi mua kupeta adrese wa Betele eu ku Enternete mu site wa www.jw.org. Mapa anudi mua kutuma buludiludi ngowu aa:

DIFILA BINTU BITUDI NABI

Mapa adibu bafila adibu bela ku banke peshi karte ya kuangata nayi makuta ku banke. Mu imue Betele, batu kabidi bafila makuta aa ku diambuluisha dia site wa jw.org peshi dia site mukuabu udibu basungule.
Nudi mua kufila makuta, bilengejilu bu mudi mpeta ne bikanu bia or peshi bintu bikuabu bia mushinga mukole. Nutume makuta anyi bintu ebi ne mukanda muipi udi uleja ne: nudi babitume bua kashidi.

DILAMISHA MAKUTA

Muntu udi mua kufila bintu biende nansha makuta bua balue kumupingajila pikalaye nawu dijinga.
Muntu udi mua kufunda mukanda udi uleja ne: bintu ebi mbia kupingaja.

MAPA MALONGOLOLA

Pa kumbusha mapa a makuta ne bintu bietu bia mushinga mukole, kudi mishindu mikuabu ya kufila bintu bua mudimu wa Bukalenge udi wenzeka pa buloba bujima. Mbaleje mishindu eyi kuinshi eku. Nansha wewe musungule mushindu kayi bua kufila mapa aa, suaku wanji kuebeja Betele udi utangila midimu ya mu ditunga dienu bua kumanya mishindu idiku idibu bakuata nayi mudimu mu ditunga dienu. Bu mutu mikenji ne bitadi bishintuluka, mbimpe kuebeja bantu badi bamanye bimpe malu a bitadi ne mikenji kumpala kua wewe kusungula mushindu muimpe wa kufila mapa.

Makuta a tshieya: Mmapa adi muntu mua kupesha bumue bua ku malongolodi budi Bantemu ba Yehowa benza nabu mudimu ne kuleja mudi bulongolodi ebu ne bukenji bua kuangata makuta ende a tshieya anyi a pansio.

Konte ya ku banke: Muntu udi mua kufundisha konte yende ya ku banke, mikanda ya makuta matekesha ku banke anyi konte yende ya makuta a pansio mu dîna dia bumue bua ku malongolodi budi Bantemu ba Yehowa benza nabu mudimu bilondeshile mikenji ya banke ya muaba udiye.

Bukenji bua kupeta bintu ne makuta masombesha: Muntu udi mua kupesha bumue bua ku malongolodi budi Bantemu ba Yehowa benza nabu mudimu bukenji bua kupeta bintu ne makuta masombesha anyi bukenji bua kuangata bua kashidi padiye ufua.

Mpangu ne nzubu: Muntu udi mua kufila lupangu anyi nzubu wende kudi bumue bua ku malongolodi budi Bantemu ba Yehowa benza nabu mudimu bua kashidi, kadi bikalaye musombele mu lupangu elu, udi mua kutungunuka ne kusombelamu too ne muafuaye.

Dipa dia kufuta ku tshidimu: Mmakuta anyi mikanda bidibu bapesha bumue bua ku malongolodi budi Bantemu ba Yehowa benza nabu mudimu, bumvuangana ne muntu udi ubifila anyi muntu udiye musungule bua kutuadija kupeta makuta bungi kampanda tshidimu tshionso patshidiye ne muoyo. Tshidimu tshidi muntu ufila dipa edi badi bamupuekeshila mushinga wa bitadi bituye ufuta.

Testama ne bintu bilamisha: Muntu udi mua kushila bumue bua ku malongolodi budi Bantemu ba Yehowa benza nabu mudimu bintu anyi makuta ende, peshi kubupa bukenji bua kuangata bintu bidiye mulamishe. Kuenza nunku kudi mua kukepeshisha mushinga wa bitadi.

Anu mudi tshiambilu “mapa malongolola” tshileja, mapa a mushindu eu atu alomba bua muntu adianjile kudilongolola. Bua kuambuluisha bantu badi bajinga kukuatshisha mudimu udi Bantemu ba Yehowa benza pa buloba bujima ne mapa malongolola, mbapatule kakanda ka mu Anglais ne mu tshiena Espagne kadi ne tshiena-bualu tshia ne: Charitable Planning to Benefit Kingdom Service Worldwide (Mapa malongolola bua kukuatshisha mudimu wa Bukalenge wa pa buloba bujima). Mbenze kakanda aka bua kuleja mishindu mishilashilangane idi bantu mua kufila mapa ne bintu bia bumpianyi mpindieu nansha padibu bafua. Malu adibu baleje mu kakanda aka kaena anu mua kuikala akutangila wewe bilondeshile bitadi ne mikenji idi mu ditunga dienu to. Nunku, paudi ubala kakanda aka, udi kabidi ne bua kuebeja bantu badi bamanye mikenji ne malu a bitadi bia mu ditunga dienu. Bantu ba bungi badi benze mudimu ne mishindu ya difila mapa eyi mbafike ku dikuatshisha mudimu wa Nzambi ne kuambuluisha mudimu wa pa buloba bujima, ne mbabakepeshile bungi bua makuta a bitadi avuabu bafuta. Bikala kakanda aka mu ditunga dienu, udi mua kukalombesha kudi sekretere wa mu tshisumbu tshienu.

Bua kumanya malu makuabu, udi mua kubikila anyi kufundila Betele udi utangila mudimu mu ditunga dienu.