MANDAMUNA A NKONKO YA MALU A MU BIBLE

Bua tshinyi tudi ne bua kuvuluka lufu lua Yezu?

Bantu ne disanka mu buloba bukudimune mparadizu — Lufu lua Yezu nelupeteshe bantu tshinyi mu matuku atshilualua?—Yeshaya 25:8; 33:24

Mu malu a bantu, lufu lua Yezu luvua bualu bua mushinga mukole, bualu wakafua bua kupingaja bantu ku nsombelu uvuabu ne bua kuikala nende. Muntu kavua mufukibue bua kuenza malu mabi, kusama anyi kufua to. (Genese 1:31) Kadi, bubi buakabuela mu bantu bua Adama muntu wa kumpala. Yezu wakafila muoyo wende bua kutusungila ku bubi ne ku lufu.—Bala Matayi 20:28; Lomo 6:23.

Nzambi wakaleja dinanga dia pa buadi pakatumaye Muanende pa buloba bua kutufuila. (1 Yone 4:9, 10) Yezu wakambila bayidi bende bua kuenza tshibilu ne diampa ne mvinyo bua kuvuluka lufu luende. Patudi tuenza nunku ku tshidimu tshionso, tudi tuleja dianyisha bua dinanga didi Nzambi ne Yezu batuleje.—Bala Luka 22:19, 20.

Nnganyi udi ne bua kudia diampa ne kunua mvinyo?

Pavua Yezu wambila bayidi bende bua kuvuluka lufu luende, wakakula bua tshipungidi kampanda. (Matayi 26:26-28) Tshivua tshibapesha bobu ne bantu bakuabu bakese ditekemena dia kulua bakalenge ne bakuidi pamue nende mu diulu. Nansha mudi bantu miliyo ya bungi bavuluka lufu lua Yezu, anu aba badi mu tshipungidi etshi ke badi badia diampa ne banua mvinyo.—Bala Buakabuluibua 5:10.

Yehowa ukadi mutuadije kusungula bantu aba kukadi bidimu bitue ku 2 000. (Luka 12:32) Patudi tubufuanyikija ne bantu bapeta muoyo wa tshiendelele pa buloba, bungi buabu mbukese be!—Bala Buakabuluibua 7:4, 9, 17.

Bua kumanya malu makuabu, bala nshapita 5 wa mukanda wa Bible utu ulongesha tshinyi menemene? mupatula kudi Bantemu ba Yehowa

Udi kabidi mua kuupeta mu www.jw.org