Muena mu Kasumbu kaludiki mupiamupia

MU DINDA dia Disatu dia 24/1/2018, bena mu dîku dia Betele dia mu États-Unis ne dia mu Canada bakasanka pakumvuabu dimanyisha dia pa buadi dia ne: muanetu Kenneth Cook uvua mulue muena mu Kasumbu kaludiki ka Bantemu ba Yehowa.

Muanetu Cook uvua muledibue ne mukolele mu Pennsylvanie mu États-Unis. Wakapetela bulelela kudi mulongi wabu pakavuaye pa kujikija tulasa tua bikadilu, ne wakapeta batismo mu dia 7/6/1980. Wakatuadija bumpanda-njila mu dia 1/9/1982. Panyima pa bidimu bibidi bia bumpanda-njila, bakamubikila ku Betele wa Wallkill mu New York, kutuadijaye mudimu mu dia 12/10/1984.

Mu bidimu 25 biakalonda, muanetu Cook wakenza midimu mishilashilangane ku dipatula dia mikanda ne ku tshibambalu tshidi tshitangila malu a bena ku Betele. Wakasela mukajende Jamie mu 1996, kutuadijaye kuenza nende mudimu ku Betele wa Wallkill. Mu ngondo wa 12 mu 2009, bakatuma muanetu Cook ne mukajende Muaba wa tulasa tua Watchtower, ku Patterson mu New York. Bakapesha muanetu Cook mudimu mu Tshibambalu tshia difundilangana mikanda. Muanetu Cook ne mukajende bakapingana ku Betele wa Wallkill, matuku makese pashishe, mu ngondo 4 mu 2016, bakabatuma ku Brooklyn mu New York. Panyima pa ngondo itanu, bakaya ku Biro bietu bia pa buloba bujima ku Warwick mu New York. Mu ngondo wa kumpala mu 2017, muanetu Cook wakalua muambuluishi wa Kasumbu kaludiki mu Komite wa difunda.