Ke tshikondo tshiakanyine mpindieu
1 Pakafundilaye bena Kolinto mukanda wende muibidi, mupostolo Paulo wakabavuluija muvuabo bapangadije bua kukumbaja mudimu mulenga wa diambuluisha bua bena kuitabuja nabo ba ku Yeruzaleme. Kadi, tshidimu tshikavua tshipite, ne kabavua banji kumana mudimu ukavua mutuadijibue. Nanku Paulo kubasonsolaye mu miaku eyi: “Tungunukayi . . . ne jikijayi mudimu au. Nutekeku muoyo mulenga bua kuujikija anu bu munuvua bawuleje kabidi mu diangata dipangadika.”—2 Kol. 8:11, Français courant.
2 Bikadi bitufikile dimue dituku anyi dikuabo bua kudifundila bipatshila. Pamu’apa tuvua bapangadije bua kuvudija didifila dietu mu buambi, bua kumanyangana bimpe ne bana betu, bua kukumbaja ngikadilu milomba bua kupeshibua disanka kampanda dia mudimu, anyi bua kutshimuna butekete kampanda. Pabi, kabiyi bu mutuvua ne ngenyi milenga ku ntuadijilu, pamu’apa katuena bananukile too ne ku ndekelu. Mbingu, ngondo, bidimu e kupita ne tuetu batshikale amu kaba kamue kamue. Pamu’apa bidiku bikengela bua tuetu kuangata ne mushinga mubelu wa ‘kutungunuka ne kujikija’ bitukavua batuadije anyi?
3 Tufikayi ku bipatshila bietu: Kuangata dipangadika dia muntu pa nkayende mbualu bumue, kudikumbaja mbualu bukuabo. Bitualadikija bionso, katuakulubuluka nansha. Bidi bikengela kuangata dipangadika ne kukanga muoyo bua kudikumbaja kakuyi dijingakana. Bua bualu ebu, bidi bikengela kuikala ne bulongame. Bidi bia mushinga bua kudilamina dîba didi dikengedibua bua kukumbaja mudimu eu mudifundila ne kutabalela bua kutumika nadi bilenga bua tshipatshila etshi. Monayi lungenyi-luludiki luimpe: tudifundile dituku ne dîba dijalame, pashishe, ne didilanga peshi didibela nkayetu, tubinemeke.
4 Padibi bitukolela bua kukumbaja tshipatshila tshietu, tudi mua kudiambila ne: ‘Nembuenze pashishe.’ Kadi katuena bamanye tshiatufikila makelela. Nsumuinu 27:1 udi wamba ne: “Kuditumbishi bua makelela, bualu kuena mumanye tshidi dituku kampanda mua kulela.” Mulongi Yakobo wakadimuija muvuabi njiwu bua kuikala ne dieyemena dipite mu matuku atshilualua, bualu ‘katuena nansha bamanye muikala nsombelu wetu makelela . . . Nanku bikala muntu mumanye kuenza tshidi tshiakane, kadi kayi utshienza, kudi mpekatu buende yeye.’—Yak. 4:13-17.
5 Bintu bia bungi bidi mua kutubueja mu ditanaja, ne bantu bavule badi mua kutulobesha mu mushindu udibi mua kulua bipepele bua bipatshila bietu kupanga kukumbajibua. Bidi bikengela kuenza madikolela bua kubenga kupua bipatshila bietu muoyo. Bidi bia mushinga bua kubitela misangu yonso mu masambila etu. Pamu’apa tudi mua kupeta diambuluisha pa kulomba balela betu bua kutuvuluija ne kutukankamija. Tufunde pa kalandrié; nebikale diambuluisha bua kutuvuluija bua tuetu kumona dilubuluka dietu. Bidi bitukengela kuangata dipangadika bua ‘kuenza bu mutudi bapangadije mu mutshima wetu.’—2 Kol. 9:7.
6 Ngondo wa Tshisanga udi utupetesha tshikondo tshilenga tshia kushindamija lungenyi pa bipatshila bietu. Netufile mukanda wa Udi mua kuikala ne muoyo wa kashidi pa buloba bukudimuna mparadizu ne broshire. Tudiku mua kudifundila bimue bipatshila biakane anyi? Bua tshinyi kubenga kuteta bua kushiya mikanda ya bungi mu teritware? Nebikale bia meji bua bavule kupangadija bua kuenza bipitshidile mu makumbula mapiamapia ne kutuadija dilonga dia Bible.
7 Kabiena bia meji bua kutamba kuladikija bidi ne mushinga, bu mudi “bulongolodi ebu ne bua kujimina.” (1 Yone 2:17) Masanka a mudimu ne mabenesha a pa buawu mu mudimu wa Yehowa bidi bitutekela kumpala mpindieu. Katuapangidi!