Tuikalayi ne dianyisha bua bitudi nabi
1 ‘Nzambi wakatamba kuleja luse luende kutudi mu muanda eu ne, patutshivua bantu babi Kristo wakatufuila.’ (Lomo 5:8) Mmushindu kayipu utudi buonso mua kuikala ne dianyisha bua mulambu mutambe bunene udi Yehowa ne Muanende bitabuja bua kutupa! Mashi mapongolola a Kristo adi atunzuluila njila wa ditekemena dia muoyo wa kashidi, ditekemena didi muntu nansha umue kayi mua kutupesha.
2 Mmushindu kayi utudi mua kuleja dianyisha dietu? Bantu ba bungi badi ne nyota ya dimanya dilelela didi dipeteka anu mu Dîyi dinsantu dia Nzambi. Disua dia Yehowa didi dia se: bafike ku dimanya dia bulelela. (1 Tim. 2:4) Netuleje ne: tudi tuangata ne mushinga bulelela pa ‘kuamba lumu luimpe lua Bukalenge bua Nzambi.’ (Luka 4:43) Dienza dietu dia mudimu eu ne muoyo mujima didi dileja ne: tudi bamanye bua se: Kristo mmufue bua bualu buetu ne tudi tujinga kumuidikija pa kutumikila ne lulamatu mukenji wende udi wamba bua kuenza bayidi.—Mat. 28:19, 20.
3 Mmêba kayi atudi mua kubabidila bua kuamba lumu luimpe? Tudiku mua kuenza mudimu wa bumpanda-njila buambuluishi ku tshikondo ne ku tshikondo anyi? Kunyima kua bamana kuelangana meji, bamue badi mua kutshinka se: mbakumbane bua kuenza mudimu wa bumpanda-njila bua pa tshibidilu. Ebi mmishindu mipite buimpe ya kufila mêba mavule mu dimuangalaja dia lumu luimpe lua Bukalenge. Pamu’apa tshikondo tshishale uvua ne tshipatshila tshia kuuja formilere wa dilomba bumpanda-njila, kadi bipumbishi kampanda biakakupangishisha. Misangu mikuabu nsombelu webe ukadi mushintuluke katshia pin’apu. Pikalabi nanku, ukadiku mupangadije bua kuenza mudimu wa bumpanda-njila peshi kuikala mpanda-njila muambuluishi anyi?
4 Patudi tumona malu adi enzeka ku luseke luetu, dianyisha dietu didi dikoleshibua. Tshikisu, lukinu ne mvita bidi bivula mu bulongolodi ebu. Paulo wakakula bua bikondo bietu ne: ‘mbikondo bikole.’ (2 Tim. 3:1) Kabiyi kutangila nsombelu wa dibungamija eu, tudi ne ngumu mimpe mivule ya kumanyisha bantu. Tudi ne bibejibeji bibidi bipite buimpe, Tshibumba tshia Nsentedi ne Réveillez-vous! Ngondo eu tudi mua kubifila mu buambi. Tudi kabidi ne broshire idi ne biena-bualu bivule. Mikanda eyi idi ifila disulakana dilelela kudi bayibadi. Disakidila dietu didi ne bua kutusaka ku diyimuangalaja bia bungi.—Eb. 13:16.
5 Pamu’apa mu muaba uwudi usombela, bantu badi baleja amu dijinga dikese dia kumanya bia bungi pa malu a mu nyuma. Bishilangane, imue teritware idi ne bufuke bua bungi. Batu basangana dijinga dia kumanya bia bungi kudi bisumbu bidi pa nkayabi mu teritware wetu. Biwikala ne mushindu, udiku mua kuya mu teritware udibo bakengela bikole diambuluisha diebe anyi? Mutangidi wa tshijengu tshienu neikale ne ndambu wa mamanyisha a kukupa pa bualu ebu.
6 Tubingila tua kuikala ne dianyisha bua bitudi nabi katuena tupangika to; bushuwa tudi ne malu mimpe mavule. Tudi mua kutumbisha bimpe bitambe Yehowa anu pa kumanyisha dîna diende ne malongolola ende.—Yesh.12:4, 5.