Mandamuna ku nkonko yenu

◼ Ntshinyi tshitudi ne bua kutuala mu bisangilu?

Mu bisangilu bietu bia ku lumingu tudi tupeta dilongesha ne makankamija atudi tubabidila. (Yesh. 48:17; Eb. 10:24, 25) Pabi, netupetelamu masanka mavule anyi makese bilondeshile didilongolola dietu.

Bidi bimpe bua muena mu dîku yonso ikale ne mikanda yalongibue ne bintu kayi bionso bidi bikengedibua bua bisangilu, tshilejilu Bible, mukanda wa misambu, mukanda umue peshi mikuabu kayi yonso idi ne tshia kulongibua, kayé ka difundila, ne katshi-kûme anyi mutshi wa mukanda.

Mu tshisangilu tshia kalasa ka mudimu wa teokrasi, bidi bikengela kuikala ne Programe wa kalasa ka mudimu wa teokrasi ne mukanda wa Manuel pour l’École du ministère théocratique. Bidi bituambuluisha bua kuvuluka tshiena-bualu tshia miyuki mienza kudi balongi ne kuteya ntema ku mibelu ya mutangidi wa kalasa. Tudi mua kutumika nkayetu ne ngenyi mifila, bikale ne tshipatshila tshia kulengeja mushindu wa kuenza miyuki yetu ne diakula dietu mu mudimu wa buambi. Biangatshile mu Tshiongo 1996, miyuki mivule ya ndongeshilu neyishindamene pa mukanda wa Les Témoins de Jéhovah—Prédicateurs du Royaume de Dieu. Imue misangu kabiena biakanyine bua muena mu dîku yonso kutualaye wende mukanda nkayende; tudi mua kuangata umue bua kuelamu dîsu pamue ne bena mu dîku dietu.

Mu tshisangilu tshia mudimu, tudi tukengela kuikala ne Mudimu wetu wa Bukalenge ne mukanda wa Comment Raisonner. Tuangate mikanda yonso yatumikabo nayi mu tshisangilu, tshilejilu mikanda yatumikabo nayi mu manaya a tshilejilu. Bakulu badi ne bua kuikala ne mukanda wa Badilongolole bua kuenza mudimu wetu bimpe.

Baledi badi ne bua kuenza muabu muonso bua se: bana babu basombe ne ditalala ne bateye ntema dîba dia bisangilu. Buobu mua kupeshibua Tshibumba tshia Nsentedi ne mikanda mikuabu, nansha kabayi banji kumanya kubala, dijinga diabu dia kumanya bia bungi nedisonsolodibue. Padi bana balongeshibue bua kunemeka mikanda ne kutumika nayi, badi bapeta bibidilu bimpe bia mu nyuma bialamabu mu nsombelu wabu mujima.

Disanka ne dianyisha bipetela mu bisangilu bia mu tshisumbu bidi bivula patudi tubuelamu ne bidi bikengedibua. (2 Tim. 3:17) Ke mushindu mupite buimpe wa kudijadikila se: tudi ‘bûjibue ntente ne kumanya kua disua diende [dia Nzambi], mu meji wonso ne dijingulula bia mu nyuma.’—Kolos. 1:9.