Malubuluka Ebe Amueneke Patoke!
1 Vuluka musangu wa kumpala uwakateleja mukenji wa Bukalenge. Malelela mapepele akasonsola nyota yebe ya kumanya ne kumvua. Pa kumona se: njila ya Yehowa idi mitambe kutumbuka ku yebe, kuakajanguluka bua kujingulula se: uvua ne bua kushintulula nsombelu webe. (Yesh. 55:8, 9) Wakalubuluka, wakalambula muoyo webe kudi Nzambi ne wakatambuishibua.
2 Nansha panyima pa mumane kuenza malubuluka kampanda mu nyuma, kutshivua anu kukushadile amue mapanga a kutshimuna. (Lomo 12:2) Imue misangu uvua uya mu buambi ne muoyo mujoboke, bualu uvua utshina bantu. Peshi uvua ne lutatu bua kudiundisha mamuma a spiritu wa Nzambi. Kadi kuakalekela nansha, bualu uvua mupangadije bua kulubuluka pa kudifundila bipatshila bia teokrasi.
3 Katshia wadilambula kudi Nzambi, imue misangu bidimu bivule bikadi bipite. Paudi utangila kunyima, mmalubuluka kayi audi mua kumanyisha? Udiku mukumbaje bimue bia ku bipatshila biebe anyi? Udi amu ne lukunukunu ‘luuvua nalu ku tshibangidilu anyi’? (Eb. 3:14) Pakamuambila Paulo ne: ‘Unanukile kuikala mu malu aa, udifile ne mutshima webe wonso kudiwu, bua kudiunda kuebe kumueneke kudi bonso,’ Timote ukavua muena nkristo mupie uvua ne bidimu bivule bia dimonamona malu.—1 Tim. 4:15.
4 Tudikonkononayi. Bu wewe mua kutangila ku tshivua nsombelu webe too ne ku lelu, ntshinyi tshiudi ubambisha? Utshidi amu ne amue mapanga auvua nawu ku tshibangidilu anyi? Udi mupambuke ne mulekele bipatshila biebe anyi? Bikalabi nanku, mbua tshinyi? Imue misangu uvua ne ngenyi mimpe, kadi muikale uyipingaja kule panyima. Anyi udi mulekele tunyinganyinga tua mu nsombelu tutekesha luendu luebe.—Luka 17:28-30.
5 Bushuwa, katuena mua kualukila mu tshikondo tshikadi tshipite, kadi tudi mua kubabidila matuku adi kumpala. Dikonkonone wewe muine mu bululame, sunguluja matekete ebe, pashishe enza madikolela bua kudilengeja. Imue misangu bidi bikukengela kutamba kuleja bimpe mamuma a spiritu wa Nzambi, tshilejilu didikanda, bupole-malu, anyi muoyo-mule. (Gal. 5:22, 23) Biwikala ne lutatu bua kumvuangana ne bakuabu peshi bua kueleshangana maboko ne bakulu, bidi bikengela bua udime budipuekeshi bua mu lungenyi.—Fil. 2:2, 3.
6 Malubuluka ebe neatambe kabidi kumueneka biwikala uvua wipatshila masanka a mudimu anyi? Kakuyi mpata, bana betu ba balume badi mua kulua basadidi ba midimu peshi bakulu, buobu mua kuenza amue madikolela a pa mutu. Bamue ba kutudi badi ne mushindu wa kulua bampanda-njila ba pa tshibidilu. Bua bavule bakuabu mudimu wa bumpanda-njila buambuluishi ntshipatshila tshipepele bua kufikaku. Bakuabu kabidi badi mua kudienzeja bua kulengeja ngikadilu wa dilonga diabu, bua kuandamuna bivule mu bisangilu bia tshisumbu peshi bua kuikala bamanyishi badi batamba kupatula bipeta bilenga.
7 Bushuwa, muntu nkayende ke udi umona malu adiye ukengela kulubulukamu. Umanye se: neutambe kuvudija disanka ne kutamba kupatula bipeta bilenga mu tshisumbu biwadienzeja ne muoyo umue bua ‘kuya kumpala mutangile ku dikola.’—Eb. 6:1.