Tudi Ne Bua Kupatuka Mu Buambi Babidi Babidi Anyi?

¹ Bungi bua bantu mu imue teritware budi buvula pa lukasa ne mbimueneke ne: bantu ba bungi badi bajinga kumanya kabingila ka nsombelu udi pa buloba. Tudi tumona se: dinowa ndinene ne bena mudimu mbakese bua kukumbaja mudimu wa buambi ne wa dilongesha. Lukonko ludi lujuka mu lungenyi luetu: Mmunyi mutudi mua kupeta bantu bavule dîba ditudi tudifila mu mudimu wa Bukalenge?

² Ukadiku mumone mu tshisumbu tshienu ne bamanyishi badi imue misangu ne lungenyi lua kupatuka ba bungi, pamu’apa basatu basatu ku nzubu ne ku nzubu anyi? Ukadiku mumone bamanyishi bapiluke bavule bapatuka pamue anyi? Mbualu badi baya kukumbula miaba ya njiwu anyi peshi ntshibidilu patupu tshilubuluja mu bule bua bidimu?

³ Mifundu idi ileja ne: katshia ku kale bantu batu banyisha kuenza mudimu popamue bua kusadila Nzambi. Pavua Yezu mutume bayidi makumi muanda-mutekete kumpala kuende mu imue misoko, wakabatuma babidi babidi. (Luka 10:⁠1) Pakatuadija Paulo luendu luende lua bu-misionere, wakangata Timote bua kuikalaye mumuambuluishi. (Bienz. 16:​1-3) Solomo wakamona kabidi diambuluisha dia kuikala ne mulunda; bushuwa, wakamba ne: “Mbimpe kuikala babidi, pa mutu pa kuikala nkayebe, bualu mudimu wa bantu babidi udi mua kubapetesha tshipeta tshimpe.” Ebi kabiena biumvuija ne: muntu kêna mua kupatuka nkayende mu buambi bua lumu luimpe nansha, kadi masanka mavule adi apeteka pa kupatuka ne bakuabu ne kuambuluishangana. Mu bilejilu bionso ebi badi bakula bua bena nkristo babidi badi benza mudimu popamue. Bidi bimpe kuikala ne tshibidilu tshia kupatuka basatu basatu mu mudimu wa buambi anyi?

⁴ Mudimu wetu wa Bukalenge wa mu Lumungulu 1991, dibeji dia 7, udi ufila diandamuna mu tshiena-bualu etshi: “Tuambuluishe bakuabu mu buambi.” Tudi tubala mu tshikoso tshia 1 ne 4 ne: “Tshisumbu tshia Buena-nkristo tshidi katshia ku mbangilu watshi, bulongolodi bua bamuangalaji ba lumu luimpe. Yezu mene wakashidimuna bayidi bende bua buambi ne ‘wakabatuma babidi babidi.’ (Mâko 6:7; Luka 8:⁠1) . . . Nansha kabiyi bikengedibua kuikala dîba dionso ne mukuebe mu mudimu, bavule ba kutudi mbasue kupatuka ne muntu. (Muambi 4:⁠9) . . .  Patudi tufila muntu mu buambi, tudi basue kuenza mudimu bu kasumbu. (tangila 1 Kol. 3:​6, 9.) Tudi mua kufila bonso babidi bumanyishi, tshilejilu pa kutuadija diyuki muntu wende musangu.”

⁵ Tshitudi mua kuenza ntshinyi patudi mu buambi mu miaba ya njiwu? Mudimu wetu wa Bukalenge wa Lumungulu 1991 mutela ku mutu eku udi wandamuna mu tshikoso 3 ne: “Bua dikubibua, imue misangu bidi bia meji bua kupatuka mu buambi ba bungi mu miaba mikuabu.” Bia muomumue, tudi tubala mu mukanda wa Mudimu wetu (dibeji dia 96, tshikoso 3 ne dibeji dia 103, tshikoso 2) ne: “Kabidi, bidi bimpe kutuma bamanyishi babidi nansha ba bungi bua kuyabo kuenza mudimu wabo kaba kamue mu bijengu bikuabo.” “Bikala mumanyishi wenza mudimu wende mu musoko nansha mu bijengu bidi kabiyi bimpe bua kudienzelaye mudimu eu nkayende, ne bikalabio bikengedibua bua mumanyishi mukuabu kuyaye kumufila, bubidi buabo nebabale mêba, bu bikala yonso wa kudibo ufila bumanyishi.”

⁶ Bilondeshile malu mafunda ku mutu eku, tudi bumvue se: bamanyishi badi ne bua kuya ku biibi nkayabu peshi babidi babidi. Mu imue miaba ya njiwu, nebikale bimpe kuya mu buambi babidi babidi; imue misangu bidi mua kuikala mene bia meji bua kuikala ba bungi. Bitu bienzeka kabidi ne: muanetu wa balume kampanda afile muanetu wa bakaji ukena muena dibaka nende peshi mulela wa pabuipi. Bua nunku, kasumbu kadi mua kuikala ka bantu basatu. Pa kumbusha bilejilu bikese ebi, netulonde ngenzelu mushiya kudi Mukalenge wetu Yezu Kristo ne bayidi bende ba kumpala, netuenze madikolela bua kupatuka mu buambi babidi babidi, pikalaku mushindu, anyi muntu nkayende, pamutu pa kuikala basatu basatu.​—⁠1 Pet. 2:⁠21.