Mandamuna Ku Nkonko Yenu
◼ Mmushindu kayi muakanyine wa kutumika ne miaku “muanetu wa balume” ne “muanetu wa bakaji”?
Mu ngumvuilu mulelela, miaku “muanetu wa balume” ne “muanetu wa bakaji” idi yumvuija bantu badi ne baledi bamue. Ku malanda aa a ku tshifukilu, kutu kufumina pa tshibidilu dilamatangana diondoke; ne kabidi, disuangana didi pankatshi pa bantu aba ndikolesha kudi bisuikidi bia mu mutshima ne kudi muanda wa se: mbafumine mu nsangilu wa bantu umue ne mu tshitupa tshimue.
Yezu wakalongesha bayidi bende bua kubikila Yehowa mu disambila bamba ne: “Tatu wetu.” Tuetu bena nkristo tudi tutumika ne tshiambilu etshi; tudi buonso buetu mu tshiota tshimue mutudi tupetela malanda a mu nyuma a mushinga mukole. Ke tshiakela Yezu kashonyi pakambilaye bayidi bende ne: “Nudi bonso bana ba muntu umue.”—Mat. 6:9; 23:8.
Tudi tusanka bua malanda mashême a mu nyuma atudi nawu mu nzubu wa Nzambi ne ke bua tshinyi tudi tubikilangana ne: “muanetu wa balume” ne “muanetu wa bakaji,” nangananga patudi mu bisangilu bia tshisumbu. Eu udi ulombola tshisangilu udi ufunkuna bantu bakadi batambule badiye wela nkonko pa kuteka kumpala kua dîna diabu [dia mu dîku] muaku “muanetu wa balume” anyi “muanetu wa bakaji” pamutu pa kutela dîna dikena dia mu dîku (prénom). Tshilejilu: muanetu wa balume FULANI (Jacques), pamutu pa muanetu wa balume Jacques. Muanetu wa bakaji FULANI (Jacqueline), pamutu pa muanetu wa bakaji Jacqueline.
Tshia kuenza ntshinyi padi muntu udi kayi muanji kutambula usua kufila mandamuna mu bisangilu? Pakadi muntu pabuipi ne diditshipa ne muikale utantshila tshisamba tshia Yehowa kukadi ndambu wa matuku, udiangata yeye muine bu Ntemu wa Yehowa, kakuena bualu budi butukandika bua kutela dîna diende pa kusakidila kumpala kuadi miaku “muanetu wa balume” anyi “muanetu wa bakaji.” Ebi mbikumbanyine nangananga aba badi bamanyishi bakena batambule.
Kadi, bantu badi ne dijinga dia kumanya bia bungi batshidi batuadijilaku kubuela mu bisangilu ki mbanji kuenza bidia bidi bibasunguluja bu bena mu nzubu wa Nzambi. Katuakubabikila ne: “muanetu wa balume” anyi “muanetu wa bakaji,” bualu kabena ne malanda adi masuikakaje bena dîku dia Nzambi. Ke bua tshinyi, dîba dia bisangilu, netubabikile mu mushindu udi kauyi uleja dibidilangana divule pa kudianjila kuteka, tshilejilu, muaku “mukalenge,” kumpala kua dîna diende [dia mu dîku].
Pa kutumika ne miaku “muanetu wa balume” ne “muanetu wa bakaji” dîba dia bisangilu bia tshisumbu, tudi tuleja malanda mashême ne a mushinga mukole kupita patudi tutumika anu ne mêna akena a mu dîku patupu (tshilejilu bu Jacques, Jacqueline). Ebi bidi bituvuluija ne: tudi ne malanda a mushinga mukole mu dîku dia mu nyuma didi Tatu muikale Yehowa Nzambi. Tudi tuela kabidi kashonyi pa dinanga diondoke ne disuangana bitudi nabi bamue kudi bakuabu.—Ef. 2:19; 1 Pet. 3:8.