Mandamuna Ku Nkonko Yenu
◼ Tshia kuenza ntshinyi padi tshipupu tshifikile buludiludi bana betu?
Bikala tshipupu tshienzeke mu rejon wenu: Kanupapuki ne buôwa nansha. Ikalayi ne muoyo mukole ne tabalelayi nangananga tshidi tshikengela ntema bushuwa: muoyo, ki mbintu bia ku mubidi nansha. Filayi diambuluisha dia bintu bia ku mubidi didi dîku dienu nadi dijinga dîba adi. Pashishe numanyishe bakulu nsombelu wenu ne muaba unudi nusanganyibua.
Bakulu ne basadidi ba mudimu badi ne mudimu munene mu dilongolola dia bintu bia diambuluisha. Bikala tshipupu tshidianjila kumanyisha, bu mutubu benza bua tshipepele tshikole, bana betu aba nebajadike se: bantu bonso badi muaba mujalame, ne bikalabu ne dîba, nebasumbe biakudia ne kubiabanya.
Pashishe, balombodi ba Dilonga dia Mukanda dia Tshisumbu nebikale ne bua kumanya muaba udi dîku dionso ne kukeba bua kumanya nsombelu wadi. Nebikale ne bua kumanyisha Mutangidi-muludiki peshi mukulu mukuabu nsombelu wa dîku dionso, nansha bikala malu onso enda bimpe. Bikala muntu mutapike, bakulu nebadienzeje bua kuangata mapangadika bua kuondopibuaye. Nebafile kabidi bintu bionso bidi bikengedibua: tshilejilu, biakudia, bilamba, muaba wa kulala ne bintu bia disukula ne dilongolola nabi nzubu. (Yone 13:35; Gal. 6:10) Bikalabi bikengela bua kumbuka mu musoko, bu muvuabi bienzeke musangu mushale ku Est kua Zaïre, nebitambe buimpe bua bana betu bikale pamue, ku bulombodi ne bukubi bua umue wa ku bakulu. Kabiena bia meji bua mêku ikale mapanduluke ne matangalake. Bakulu ba mu musoko nebapeteshe tshisumbu dikuatshisha dia mu nyuma ne dia ku muoyo ne nebadienzeje bua kulongolola tshiakabidi bisangilu padi mushindu umueneka. Panyima pa dikonkonona malu ne lubatshi, mukulu kampanda, mu dîna dia kasumbu, neikale ne bua kumonangana ne mutangidi wa tshijengu bua kumumanyisha bikalaku bantu batapike, bintu binyanguke ku Nzubu wa Bukalenge peshi ku nzubu ya bana betu, ne makengela makuabu. Mutangidi wa tshijengu neele nshinga ku filiale bua kufila luapolo pa bualu ebu. Bikalabi bikengela kuangata mapangadika manene, filiale nealombole malongolola menza bua kufila diambuluisha.
Bikala tshipupu tshienzeke mu rejon mukuabu: Tuvuluke bana betu ba balume ne ba bakaji mu masambila etu. (2 Kol. 1:8-11) Bituasua kubatumina diambuluisha dia mfranga, tudi mua kutuma mapa etu kudi Société udi muikale ne tshibutshilu tshia diambuluisha tshilongolola bua malu a nunku. Mona adrese: Association “ Les Témoins de Jéhovah ”, B.P. 634, Limete, Kinshasa. (Bien. 2:44, 45; 1 Kol. 16:1-3; 2 Kol. 9:5-7; tangila Tshibumba tshia Nsentedi tshia mu dia 1 Tshisua-munene 1985, mab. 20-2) Kanutumi bintu mu muaba udi tshipupu, anu bikala bana betu badi batangila malu a diambuluisha banulombebi mu mushindu musunguluke. Nenku, diambuluisha nedifidibue mu mushindu mulongame, ne bintu nebiabanyibue bimpe. (1 Kol. 14:40) Anyishayi bua kubenga kuela Société nshinga tshianana tshianana, bualu bidi mua kupatshisha nshinga ìdì ikengedibua bua mikenji idi ifuma mu muaba udi tshipupu kufikayi.
Panyima pa bamane kukonkonona biakane nsombelu eu, Société neajadike bikalabi bikengela kuenza komité wa diambuluisha. Nebamanyishe bana betu bapeshibua bujitu ebu. Muntu yonso udi ne bua kukuatshishangana ne bakulu badi baludika malu aa bua majinga a bana betu onso akumbajibue bu mudibi bikengela.—Tangila mukanda wa Les Témoins de Jéhovah : Prédicateurs du Royaume de Dieu, mab. 310-15.