Nutshidi Amu Bapika Ba Bimue Bilele Bia Bankambua Anyi?

¹ Yezu Kristo wakamba ne: “Nenumanye bulelela, bulelela pabu nebunupikule.” (Yo. 8:​32, MMM) Eyowa, bulelela budi bupikula. Budi bupikula ku bitabataba ne ku malongesha a dishima, matekemena a patupu ne bienzedi bivuambudi. Pabi, anu bu mu bikondo bia kale, bena nkristo lelu’eu badi bakama bifimpakaji bua kupingana ku bilele bia bankambua.​—⁠Gal. 4:9.

² Padi muntu wangata dipangadika dia kulua Ntemu wa Yehowa, bidi anu bualu mmutuishibue ne: Bible udi bushuwa Dîyi dia Nzambi. (2 Tim. 3:16) Mmumanye kabidi ne: udi utulomba bua kuenza mashintuluka manene bua kusankisha Mutufuki. (Kolos. 3:9, 10) Mashintuluka aa mmatutangile bonso, kakuyi disunguluja bua dikoba dietu, ditunga, tshisa tshietu peshi ngelelu wetu wa meji, bualu Bible udi ujadika ne: tudi balela bonso mu mpekatu. (Lomo 3:23) Bu mutudi bapange bupuangane ne bakolele mu bienzedi, bilele ne malongesha bidi ku buenzeji bua mpekatu ne bua nzambi wa ndongoluelu’eu wa malu, mu mushindu ukena kuepuka tudi ne mashintuluka a kuenza munda muetu.

³ Mashintuluka aa adi akengela ne: tulekele bienzedi ne bilele bionso bidi bibengangane ne dilongesha dia Dîyi dia Nzambi. Dipangadika edi didi mua kutukebela dituseka peshi buluishi kudi aba badi kabayi ne ditabuja bu dietu. Ke bidi bitamba kuenzeka mu Afrike mudi pa tshibidilu bilele bivule bua madilu, malu masuikakaja ku dijiika, ne dijiika dine dia muntu. Mbimue bia ku bienzedi kayi bidi mua kutekesha ditabuja dia bena nkristo?

⁴ Didila miadi: Bilondeshile nkonga-miaku kampanda, “kudila” kudi kumvuija “kupuekesha binsonji, kubungama bua dijimina dia, kunyingalala bikole.” Badiku mu buakane mua kutompuela muntu bua dipuekesha dia binsonji peshi bua dibungama padiye mupetangane ne dikenga anyi? Bidi mua kuenzeka ne: muntu adile bua bilema biende peshi bua disama dia mubidi. Kudila ndidiumvua dia munda dia ku tshifukilu didi ku misangu disansamuna muntu mubungame. Bilondeshile Mifundu, kakuena bualu bubi nansha bumue bua kudila, bua kupuekesha binsonji peshi bua kubungama, nansha bikole mene, padi lufu lukuata muntu munanga.​—⁠2 Sam. 1:​11, 12; 18:33; Yone 11:35.

⁵ Kadi, mmunyi mutubu badila bafue bilondeshile bilele? Diakamue padi muntu upeta mukenji wa lufu mu dîku, udi ne bua kuvuula bilamba bitoke ne kuvuala bia manyanu. Bakaji badi ne bua kukutulula nsuki ne kuela kasala bua kuleja patoke dibungama diabu. Imue misangu, batu badila mu ditenda mu misambu mibuejakaja ne malongesha a dishima, bu mudi ditabuja dia dibenga kufua dia anyima. Bamue batu balomba mufue bua kabapu muoyo ne bua amone mudibu babungamija kudi lufu luende. Bikalaye mushiye bana, badi bamuebeja udiye mushile bujitu bua dîku. Mu dikonkonona mêyi aa, kabienaku biumvuija ne: badi balomba mufue bua kukumbajaye majinga a bena mu dîku diende anyi? Bikena bianyisha, bitu bienzeke ne: bamanyishi baditshipe ne batambule bapatule mêyi a mushindu eu bualu batu bamona ne bumvua bakuabu benza nunku. Mu misambu imue-imue eyi, bamue batu batuma mikenji kudi bena mu dîku bakuabu bakadi bafue.

⁶ Muena nkristo udiku mua kubuelakana mu bienzedi ebi ne kusankisha Yehowa anyi? Dîyi dia Nzambi kadiena dilongesha ne: muntu udi ne anyima ukena ufua. (Yeh. 18:⁠4) Nenku muena nkristo kêna mua kupatuila muntu mufue mêyi nansha kutenda mu misambu idi isanyika lungenyi lua dibenga kufua dia anyima. Eyowa, bidi biakanyine bua kumvua dibungama ne katuena ne bua kumvua bundu bua kudileja. Lufu lua muntu munanga ludi dijimija dinyingalaji, ditu ditusamisha mutshima bikole. Kadi, katuena bashima kudi tusumuinu tudi tuleja ne: muntu udi ne anyima ukena ufua peshi ne: udi utungunuka ne kuikala ne muoyo “ku bajangi.” Nenku tudi mua kubungama, kadi ki mbu bantu badi kabayi ne ditekemena nansha.​—⁠1 Tes. 4:13.

⁷ Dilala pambelu: Mu bisamba bivule pa buloba, mudi bilele bivule bisuikakaja ku dijiika dia bafue. Bena madilu batu misangu mivule bapitshisha butuku bujima, dituku dimue anyi pamu’apa matuku mavule, kumbelu kua mufue, kudi mudilu wa nkunyi mutemesha ne musonsola dîba dionso. Bena dîku, balunda, bena mutumba nansha kabidi bantu bavua kabayi bamanye mufue eu pavuaye ne muoyo, badi badisangisha muaba udi mufue eu bua dilala dia pambelu too ne mudibu butshia. Didisangisha edi didi dinenga matuku onso atshidi tshitalu panshi, nangananga bikala mufue eu uvua muntu wa mushinga mukole. Imue misangu, bena mu dîku diende batu bamba mêyi makese kumpala kua bantu bua kuleja ne: ki mbamanye lufu lua muntu eu. Ngenzelu mivule ya bampangano idi mua kuenzeka. Aba batu badituamu batu misangu mivule benza nunku bua ditshina dia mufue, bua ‘kumuleja’ muvuabu bamunange ne mudibu banyingalala bua lufu luende. Kadi, muntu udi ujinga kusankisha Mumufuki udi ne bua kuikala ne mmuenenu kayi?

⁸ Dîyi dia Nzambi didi dilongesha ne: bafue kabena ne muoyo, kabena mua kumona, kumvua, kuakula peshi kuela meji. (Muam. 9:5, 6, 10) Nenku kabena mua kutatshisha badi ne muoyo nansha. Kabatu biimana ku luseke lua tshitalu, batangila tshidibu benza natshi. Bikale ne dimanya edi, katuenaku ne bua kudilama ku dibuelakana mu dilala pambelu dia madilu anyi? Bushuwa, dilala edi didi ne tshipatshila tshia “kulongoluela mufue njila” ne kumupetesha mushindu wa kufikaye kudi bafue bakuabu. Dilonda bilele ebi kadienaku mumue ne ditendelela bafue anyi?

⁹ Bamue bakajinga kumanya bikalaku bualu bubi bua kulala pambelu kakuyi misekelelu ne mikiya mikuabu. Kadi bikala muntu mufuile ku lupitadi, kakuenaku mushindu wa kuya nende diakamue ku nkita anyi? Tshinuapeta ntshinyi bua kuanji kulua ne tshitalu kumbelu? Ne bikala muntu mufuile kumbelu, kabenaku mua kumujiika pa lukasa anyi? Bidi bualu buimpe butambe bikala tshitalu tshiya natshi diakamue ku nkita. Kabiena amu bikuba bantu ku tuishi tua masama tudi mua kubambulukila, kadi bidi biepula kabidi bantu ku misekelelu ya dilala pambelu. Mu misoko mudi kamuyi mikenji ya mbulamatadi ya kulonda, bua tshinyi kubenga kujiika mufue ku dilolo? Tuvuluke se: nansha mubidi wa Yezu kawakatshisha nansha. Nenku, kabiyi kutangila bilele kayi bionso bia rejon kampanda peshi bia ditunga kansanga, tudi tujinga kuambika Yehowa bunême, yeye udi mutupikule ku mîdima, pa kulekela tshienzedi kayi tshionso tshisuikakaja ku ntendelelu wa bafue.

¹⁰ Bidi mua kuenzeka ne: bikengela bua kulama tshitalu kumbelu bualu muntu mmufue ku dilolo. Mu bimenga binene, bitu dijinga dimpe ne dia mankenda bua kulamisha tshitalu ku tshilaminu tshiabi. Bikalaku kakuyi mushindu wa kuenza nanku, badi mua kulongolola bua tusumbu tuvule tua bana betu ba balume tupinganangane butuku bua kulama tshitalu. Mu nsombelu eu, bana betu nebikale ne bua kuleja bushindame buabu, bua bena mu bulongolodi ebu kabenji bilele bia bankambua muaba udi tshitalu nansha. Muanjelu-mfumu Mikaele kakalekela bua Diabolo kunayaye ne tshitalu tshia Mozese nansha.​—⁠Yuda 9.

¹¹ Bidi kabidi mua kutufikila ne: tuikale ku madilu a mulela kampanda uvua kayi mutendeledi wa Yehowa. Bikala bujitu bua madilu butueyeka, katuakulekela bua bantu kudifilabu mu ntendelelu wa bafue ku bulombodi buetu nansha. Bishilangane, bikala bujitu kabuyi butueyeka, katuakubambidika bantu bua kutumikilabu mêyi-maludiki a mu Bible nansha.

¹² Tshibawu, tudi ne bua kutshifuta anyi? Imue misangu, tshilele tshitu tshilomba bua kufuta tshibawu kampanda. Ngenzelu eu udi umvuija ne: eu udibu balomba bua kufuta tshibawu ke udibu bamone bu mumanye lufu lua muntu. Pabi, Dîyi dia Nzambi didi dileja ne: lufu ndufume ku mpekatu wa Adama. Nenku, muena nkristo yonso udi muakanyine dîna edi kêna ne bua kunemekela tshilele etshi nansha. (Lomo 5:12) Eyowa, bena mu dîku dietu badi mua kubenga kuanyisha dipangadika dietu, kadi tudi ne bua kuleja bushindame buetu ne kuitaba bua kuakama buluishi kayi buonso bua bena mu dîku.​—⁠Mat. 10:​35-37.

¹³ Tudi mua kukumbula bantu badi mu madilu bua kubasamba. Imue misangu, tudi mua kufila diambuluisha mu disumba dia mushete peshi dia tshilamba tshia kubuikila mufue, peshi kabidi bua kumbuisha lukita. Ebu mbualu bua kutemba. Kadi, tudi ne bua kuikala bajadike se: diambuluisha dietu kadiena dikuatshisha mu ditula dia mfranga bua misekelelu ya bampangano. Ke bua tshinyi mbiakanyine kufila diambuluisha dietu anu mu bianza bia muanetu udi mufuishe.​—⁠Mat. 6:​2-4.

¹⁴ Dikezula: Bimue bilele bitu biangata muntu udi mufuishe muena dibaka nende bu udi ne bukoya. Bilondeshile bilele ebi, muntu eu kêna ne bua kuowa mâyi mu matuku bungi kampanda, nansha munkatshi mua ngondo mivule. Kêna ne bua kuela tshisaku mu nsuki ne udi ne bua kuvuala bilamba bifiike. Bangabanga ne kupinganaye mu nsombelu wa pa tshibidilu, badi ne bua kumukezula. Dituku dia dimukezula, badi bamukungula mu mutu ne bamuvuadika bilamba bitoke. Imue misangu, batu bambila mukaji wa mu lufuila bua kuangatanganaye ne umue wa ku ba bayende-tshina peshi mulela mukuabu wa muntu mufue. Neikale mua kupeta bukenji bua kusedibua tshiakabidi anu panyima pa misekelelu eyi ya diupula lufuila. Ngenzelu eu útú kabidi bua bantu balume, badi bamba ne: utu ukezula mukaji wa mu lufuila peshi mulume mufuishe mukaji mu dimuipatshila “mukishi” wa mufue. Pabi, bu muakaleja mukalenge Davidi, badi mua kuditatshisha bua muntu anu patshidiye ne muoyo kadi ki mpadiye ufua nansha. (2 Sam. 12:21-23) Nenku, tudi ne bua kudileja bashilangane ne bulongolodi ebu pa kubenga bilele bia dikezula muntu mufuishe.​—⁠Ef. 4:​17, 18.

¹⁵ Diibaka nkita ne mêyi mambila bafue: Diibaka nkita ditu misangu mivule dikeba misekelelu mikuabu ya bumpangano. Kumpala kua dijiika mufue, batu imue misangu bamuambila ne: “Mona nzubu webe. Mpindieu tudi tukulomba bua umuangate.” Bu mudi bafue kabayi bumvua peshi bamanye bualu, bena nkristo balelela kabakulonda tshilele tshidi tshilomba bua kuakula nabu. (Mua. 9:​5, 6) Bikala muena nkristo mudifile mu tshimue tshia ku bilele kayi bionso bisuikakaja ku ditendelela bafue ne kayi ulekela, udi mua kuipatshibua mu tshisumbu bua ditendelela dia mpingu.​—⁠1 Kol. 5:11; Dut. 18:​10, 11.

¹⁶ Tuikale ne muoyo mu ditekemena dia dibiishibua dia bafue ne tulekele mikiya ya mu bulongolodi ebu budi mu mîdima. Tudime dikina dia malu onso akena asankisha Yehowa. (Eb. 1:9) Ebi nebitukube mu bikondo bia mateta. Tushale mu muaba wa bukubi bua mu nyuma wa Yehowa mu diepuka dienza bilele bia bankambua bidi bibengangane ne Mifundu. Nenku netuanyishibue ku mêsu kua Yehowa, Nzambi wa bulelela.​—⁠Mus. 31:⁠5.