Yehowa udi ufila bukole budi bupite bua pa tshibidilu
1 Bayidi bonso ba Yezu mbapeshibue muabi wa mushinga mukole udi musuikakaja ku mudimu wa tshijila: mudimu wa buena-nkristo. (Mat. 24:14; 28:19, 20) Pabi, bua dipanga bupuangane dia bantu ne bua ntatu ya mu ndongoluelu eu wa malu, bidi mua kutuenzekela ne: tupange kudiumvua bakumbanyine mudimu eu.
2 Padibi bituenzekela nunku, tudi mua kupetela dikankamija mu mukanda uvua mupostolo Paulo mufundile bena nkristo bela manyi ba ku Kolinto. Wakafunda ne: “Tudi ne tshiûma etshi mu mabungu a buloba.” (2 Kol. 4:7, NW) Paulo uvua ne dieyemena: “Bua bualu ebu tuetu tudi ne mudimu eu, . . . katuena [“tuteketa to,” Mukanda wa Mvidi Mukulu].” (2 Kol. 4:1) Tumanye se: ki mbipepele bua muntu nansha umue, muena nkristo muela manyi peshi wa ku “mikoko mikuabu,” bua kutungunuka ne kumanyisha lumu luimpe ne ‘kupanga kuteketa.’ Bidi bikengela bua Nzambi atupeshe dikanda, “bukole budi bupite bua pa tshibidilu.”—Yone 10:16; 2 Kol. 4:7b, NW.
3 Bidi bikankamija pa kumona se: nansha mudiku buluishi bukole, masama a munanunanu peshi nsombelu wa lupetu mupuekele, Bantemu bavule mbamuangalaji ba lukunukunu ba Evanjeliyo. Bonso tudi ne bua kumanya bimpe ne: mudimu wetu wa buambi udi ne dikuatshisha dia kudi Yehowa. Nunku, katulekedi diteketa mu maboko anyi buôwa bitekesha dipangadika dietu, kadi ‘tudikoleshe mu Mukalenge ne mu bukole buende bunene.’—Ef. 6:10; Nsu. 24:10.
4 Mushindu wa kupeta bukole bua Nzambi: Tusambile Nzambi ne tshisumi mu dimulomba dikuatshisha diende ne bukole buende. (Lomo 12:12; Filip. 4:6, 7) Pashishe, ne mutshima wetu mujima, tueyemene Yehowa, batuishibue se: neatupeshe bukole budi bupite bua pa tshibidilu. (Nsu. 3:5) Tubale miyuki ya nsombelu ya bantu milonda mu bibejibeji; idi ifila tshijadiki tshia se: Yehowa utu wambuluisha basadidi bende bua kutshimuna mateta. Tuikale tutantshila misangu mivule bana betu ba mu tshisumbu, ne katulekedi bisangilu.—Lomo 1:11, 12; Eb. 10:24, 25.
5 Tuenze muetu muonso bua kuikala bakumbanyine bua kupeta bukole bua Yehowa, bukole budi bupite bua pa tshibidilu ne buatuambuluisha bua katulekedi mudimu munene wa kumanyisha Bukalenge.