Mandamuna ku nkonko yenu

▪ Ntshinyi tshitudi mua kuenza bua kufikisha bisangilu bietu ku dipatula bipeta bimpe?

Bamue badi mua kuikala bela meji ne: bakulu ne basadidi ba mudimu nkayabu ke badi ne bujitu bua dilubuluka dia bisangilu bia tshisumbu bualu badi babilombola ne benzamu midimu ya bungi. Bushuwa, buonso buetu tudi mua kutuishangana maboko bua kuenza bisangilu bidi bisankisha ne bikuatshisha. Tudi mua kuambuluisha bua kuvuija bisangilu bikale ne bipeta bimpe mu mishindu dikumi idi ilonda eyi:

Dianjila kudilongolola. Patudi tudilongolola bimpe, bisangilu bidi bikoka ntema yetu. Padi yonso wa kutudi wenza nanku, bisangilu bidi bitamba kuibaka ne kuikala ne luya. Buelamu pa tshibidilu. Padi bantu ba bungi babuela mu bisangilu, bidi bitamba kukankamija muntu yonso udimu, bikolesha dianyisha bua mushinga wa dibuelamu. Fika pa dîba. Bituikala bamane kufika ne basombe bangabanga ne programe kutuadijaye, tudi mua kuimba pamue musambu wa mbangilu ne kuteleja disambila ne nunku kusunyina masanka mavule ku tshisangilu. Tudi tupeta ku kakese ku kakese mikanda ya misambu mu miakulu ya mu teritware wetu, idibu basakidila ku ya mu Mfualansa, mu Lingala ne mu Swahili mimana kupatula. Bimue bitupa bidiku mu Kiluba, Kirundi ne Otetela. Tudi batekemene bua kuyipeta kabidi mu miakulu mikuabu. Dîba dikala mukanda wa misambu anyi tshitupa tshiawu tshipatuka mu muakulu mutumika nawu mu tshisumbu, nebikale biakanyine bua tshisumbu tshionso tshimbe mu muakulu au pamutu pa tshitupa tshia bateleji kuikala tshimba mu eu muakulu ne tshitupa tshikuabu mu muakulu mukuabu. (Lomo 15:6; 1 Kol. 14:23, 33) Ulue mudipaye bimpe. Pa kutuala Bible wetu ne mikanda ya ditumika nayi mu tshisangilu, tudi mua kulonda pamue ne kukuata bimpe malu atudi tulonga. Epuka ditanaji. Tudi mua kuteleja bimpe patudi tusomba mu milongo ya kumpala. Dinungana ne diya njila ne njila ku nkumba didi mua kutukuatshisha ditanaji tuetu ne bakuabu. Fila mandamuna. Padi bavule ba kutudi bela bianza muulu ne bafila mandamuna, mêyi abu adi aleja ditabuja adi akankamija ba bungi ne abiibaka. Fila mandamuna mu mêyi makese. Ebi bidi bipetesha ba bungi mushindu wa kuakula. Tudi ne bua kuimanyikila mandamuna etu mîpi aa anu pa malu makonkonona. Kumbaja midimu. Patudi balongi mu Kalasa ka Mudimu wa Teokrasi anyi patudi ne mudimu mu Tshisangilu tshia Mudimu, tudilongolole bimpe, tudianjile kuambulula, ne katutetshi kupumbisha. Ela bakuabu ka-lumbandi. Ambila bakuabu mushindu udi madikolela abu manyisha bikole. Kuenza nanku kudi kubiibaka ne kubasaka ku dienza kabidi bimpe bitambe mu matuku atshilualua. Kankamijanganayi. Dielangana muoyo ne mimuemue ne mayuki adi iibaka, kumpala ne panyima pa bisangilu, bidi bisakidila ku milowo ne masanka bitudi tupetela ku dibuela mu bisangilu.