Mandamuna ku nkonko yenu

▪ Padi bisumbu bivule bitumika ne Nzubu wa Bukalenge umuepele, mmunyi mudibu mua kushintulula mêba a bisangilu padi tshimue tshia kudibi tshipeta dikumbula dia mutangidi wa tshijengu?

Mu Tshiena-bualu: “Tunemekayi bakuabu,” mu Mudimu wetu wa Bukalenge wa Kashipu 1995 bavua bambe ne: “Ku musangu ne ku musangu, nebikengele bua se: tshisumbu ne tshisumbu tshishintulule dilondangana diatshi dia bisangilu, nangananga mu dikumbula dia mutangidi wa tshijengu.” Bilondeshile mutubi bilongolola, dikumbula dia mutangidi wa tshijengu ditu dituadija mu Dibidi ne dijika mu Dia lumingu. Mu Dibidi dilolo, tshisumbu tshijima tshidi tshidisangisha bua Kalasa ka Mudimu wa Teokrasi ne Tshisangilu tshia Mudimu, tshisangilu tshionso tshienza minute 30 pa kumbusha disambila ne misambu. Mutangidi wa tshijengu udi ujikija ne muyuki wa mudimu wa minute 30. Mbilombibue bua se: bisangilu ebi bienzeke mu Dibidi dia dikumbula dia mutangidi wa tshijengu.

Mu Disatu too ne mu Disambombo, badi mua kulongolola dilonga dia mukanda ne muyuki wa mudimu wa mutangidi wa tshijengu. Ki mbambe ne: bienzeke anu mu Dinayi. Mu Dia lumingu ke mutu pa tshibidilu mutangidi wa tshijengu wenza muyuki wa patoke mulonda kudi dilonga dipidija dia Tshibumba tshia Nsentedi ne muyuki wa ndekelu wa mutangidi wa tshijengu. Kadi, ki mbifundibue bua kuenza bisangilu ebi anu pa dîba 8:00 nansha. Bidi mua kuenzeka pa dîba kayi dionso dia mu dinda anyi mu mapingaja mu Dia lumingu, pamu’apa mene ku dilolo.​—Tangila Bien. 20:7.

Pa nanku, bikala tshisumbu tshimue tshipete dikumbula dia mutangidi wa tshijengu, bikuabu bisumbu bitu bibuela mu Nzubu wa Bukalenge umue-umue eu nebileje kanemu pa kushintulula bua tshikondo etshi ndongamu wabi wa bisangilu bua kumona mua kupetesha tshisumbu tshikumbula mushindu wa kudisangisha mu Dibidi dilolo. (1 Kol. 10:24) Tshiena-bualu tshitela ku mutu eku tshivua tshisakidila ne: “Nunku bakulu [ba mu tshisumbu tshikumbula] badi ne bua kumanyisha kumpala kua dîba bena mu tshisumbu anyi bikuabu bisumbu bua kumonabu mua kumanyisha bamanyishi kumpala kua dîba.” Kadi, bua matuku makuabu a mu lumingu kabiena anu bikengela bua bisumbu kushintululabi ndongamu yabi ya bisangilu bua tshisumbu tshidi tshipeta dikumbula dia mutangidi wa tshijengu.​—1 Kol. 14:40; Filip. 4:5.