Spiritu wa Yehowa udi netu
1 Mutudi Bantemu ba Yehowa, tudi ne mudimu munene wa dikema. Yezu wakamba ne: “Nebambile bisamba bionso lumu luimpe diambedi.” (Mâko 13:10) Bua mmuenenu wetu wa bumuntu, ebi bidi mua kumueneka bu bualu budi kabuyi mua kuenzeka, kadi ki mmuomu to. Tudi ne bukole butambe onso mu bukua bifukibua budi butukuatshisha—spiritu wa Nzambi.—Mat. 19:26.
2 Tshijadiki tshia mu siekele wa kumpala: Mu ditumika ne mulayi wa Yeshaya buende yeye muine Yezu wakamba ne: ‘Nyuma wa Nzambi udi pambidi panyi bua kuamba lumu luimpe.’ (Luka 4:17, 18) Bangabanga ne kubandaye mu diulu, wakambila bapostolo bende ne: nebapete bia muomumue bukole bua spiritu munsantu bua kuyisha ‘too ne ku mfudilu kua buloba.’ Pashishe, spiritu munsantu wakalombola Filipe bua kuyisha munene wa mu lubanza lua Mukalenge wa Etiyopiya, spiritu wakatuma Petelo kudi munene wa basalayi muena Roma, ne wakatuma Paulo ne Bânaba bua kuyisha bena bisamba bia Bampangano. Nnganyi uvua mua kuela meji ne: bantu ba nsombelu wa nunku bavua mua kuitaba bulelela? Kadi bakabuitaba.—Bien. 1:8; 8:29-38; 10:19, 20, 44-48; 13:2-4, 46-48.
3 Tshijadiki tshia mu matuku etu aa: Mukanda wa Buakabuluibua udi wela kashonyi pa buenzeji bua spiritu munsantu mu mudimu wa bumanyishi wa lelu’eu pa kuamba ne: “Spiritu ne mukaji musela mbatungunuke ne kuamba ne: ‘Vuaku!’ . . . Muntu yonso udi musue angate mâyi a muoyo kaayi kusumba.” (Buak. 22:17, NW) Spiritu mmusake kasumbu ka mukaji musela wa Kristo ne balunda babu “mikoko mikuabo” bua kuyisha lumu luimpe kudi bisamba bionso. (Yone 10:16) Tudi ne bua kuikala ne dikima mu diyisha dietu, katuyi tuelakana bua kuyukila ne bantu ba mishindu yonso, bikale anu ne dieyemena dia se: spiritu wa Nzambi neatuambuluishe. Annuaire 1998 udi ufila tshijadiki tshidi tshituisha tshia se: spiritu wa Nzambi udi utungunuka ne kuikala ne basadidi ba Nzambi. Tangilayi diandamuna! Mu bidimu bia mudimu bibidi biapitshi ebi, muayene wa bantu 1 000 bavua batambula dituku dionso.
4 Ikalayi batuishibue se: spiritu wa Nzambi neatungunuke ne kuikala netu patudi tuyisha mukenji wa Bukalenge mu bualabale budi Yehowa muanyishe. Dimanya edi didi ne bua kutukankamija ne kutusaka bua tutungunuke ne kudienzeja ne makanda onso mu mudimu mutambe bunene wa Bukalenge.—1 Tim. 4:10.