Mandamuna ku nkonko yenu
▪ Mmunyi mutudi mua kusekelela Tshivulukilu tshia lufu lua Kristo mu bunême?
1 Butuku buvuaye ne bua kukuatshibua, Yezu wakabanjija Tshivulukilu tshia lufu luende wamba ne: “Tungunukayi ne kuenza nunku bua kumvuluka.” (Luka 22:19, NW) Mmunyi mutudi ne bua kumuvuluka? Bituikala basue bua kuenza malu bu bayidi ba Yezu, bidi bikengela bua muntu yonso ajingulule bua tshinyi Yezu wakatuma dîyi edi, ne tshididi diumvuija buende yeye ne bua matuku ende atshilualua.
2 Imue misangu bamue bena Kristo batu benza difesto dituku dia Tshivulukilu. Mikuabu misangu bansonga batu benza diabu difesto pa bule ne bakulumpe diabu pabu. Badi badikuatshisha foto bua “kuvuluka” tshibilu etshi. Baledi badi bapesha bana babu bilamba bipiabipia ne tudo tukuabu. Bamue badi belangana muoyo dituku adi bamba ne: “Bone fete!” Eu ke mushindu uvua Yezu musue bua tuetu kumuvuluka anyi?
3 Mupostolo Paulo wakafunda ne: “Misangu yonso inudi nudia diampa edi ne nunua dikopo edi, nudi numanyisha lufu lua Mfumu too ne papinganaye.” (1 Kol. 11:26, MMM) Nenku, Tshivulukilu tshidi tshikoka ntema yetu yonso ku mushinga mukole udi nawu lufu lua Yezu mu dikumbaja dia dilongolola dia Yehowa. Lufu lua Yezu ndupeteshe mushindu wa kupikula ndelanganyi ya Adama ne wa kupesha aba badi baleja ditabuja mushindu wa kuikala ne muoyo wa kashidi mu buloba bukudimuna mparadizu. (Yone 3:16; Gen. 1:28) Bua ditabuja diabu mu mashi a Kristo mela panshi, Yehowa udi umona “mikoko mikuabu” mikezuke. Nenku badi ne diakalenga ditambe bunene dia kukuatshila Nzambi “mudimu wa tshijila munya ne butuku mu ntempelo wende.” (Buak. 7:14, 15, NW) Tshivulukilu tshidi tshibavuluija kabidi ne: badi ne ditekemena dilenga dia kulua bantu bapuangane ne bakane dîba dikala Yezu ne bua kupingaja Bukalenge kudi Tatuende.—Sef. 2:2, 3; 1 Kol. 15:24.
4 Pakambaye ne: “Tungunukayi ne kuenza nunku bua kumvuluka,” Yezu uvua musue bua tuetu kuela meji ku dinanga didi Yehowa mutuleje pa kutupesha Muanende eu uvua wende wa pa muoyo, ne ku dinanga divua Yezu muine muleje pa kufila anyima wende bu tshia-bupikudi bua bantu bonso bavua ne bua kuleja ditabuja. (Luka 22:19, NW) Uvua musue kabidi bua se: tuele meji tshiakabidi ku masanka adiku mpindieu ne atshilualua ikala mulambu wa muoyo wende ne bua kututuadila. (Yone 3:16; Lomo 5:8; 1 Tim. 2:5, 6) Nenku dituku dia Tshivulukilu ntshikondo tshia pa buatshi tshia kuelangana meji ne dianyisha pa malu onso aa.
5 Pa nanku, padi bena Kristo bangata tshikondo tshia Tshivulukilu bua kuenza mafesto anyi kupa bana babu tudo, badi bajimija tshidi tshibilu etshi tshiumvuija ne batshipesha diumvuija didi kadiyi dia tshijila. Tshikadilu tshia mushindu’eu tshidi tshivuija Tshivulukilu mushindu umue ne mafesto a bampangano bu mudi Bunana ne Nowele; tshidi tshivuija tshikondo etshi tshia ‘kulongoluela mibidi malu bua kumana nkuka yayi’ pamutu pa kuikalatshi tshikondo tshia kuelangana meji pa malu a mu nyuma. (Lomo 13:14; tangila Yeshaya 5:12.) Muyidi mulelela wa Yezu Kristo nansha umue kêna ne bua kunyanga mushindu’eu tshibilu etshi tshia mushinga mukole mutambe. Tudi basue kutshisekelela mu bunême buonso pa kuelangana meji pa dinanga dia Yehowa ne dia Yezu Kristo, ne pa masanka adiku mpindieu ne atshilualua adi mashi a Kristo mela panshi atupetesha.—Mus. 116:12, 13.