Mudi bena dîku bambuluishangana menemene​—Mu bisangilu bia tshisumbu

¹ Mêku a bena Kristo adi ne bua kuteya ntema ku dîyi-dituma dia kusangila pamue mu bisangilu bia tshisumbu. (Eb. 10:24, 25) Diambuluishangana dimpe didi mua kufikisha bonso ku dilongolola bisangilu, kubuelamu ne kufilamu mandamuna. Nsombelu mmishilangane mu mêku, kadi kudi malu adi mulume muena Kristo, mukaji muena kuitabuja anyi muledi udi nkayende mua kuenza bua kukolesha buobumue bua dîku mu malu a mu nyuma, nansha ku nzubu kuikale bana ba bungi anyi bakese ne nansha bikale bukole kayi.​—Nsu. 1:8.

² Lamayi dîba bua kudilongolola: Bena mu dîku badi bambuluishangana bua ne: muntu yonso ikale mudilongolole mudibi bikengela bua bisangilu bia tshisumbu. Ba bungi batu balongolola tshiena-bualu tshia Dilonga dia Tshibumba tshia Nsentedi dia ku lumingu. Bakuabu batu balongolola Dilonga dia Mukanda dia Tshisumbu anyi bakonkonona tshitupa tshia dibala dia Bible dia ku lumingu mu dîku. Tshipatshila ntshia kuikala bamanye ngenyi minene ya malu ambabu mu bisangilu kumpala kua kubuelamu. Pa kuenza nanku, bonso nebapetele diambuluisha dinene ku malu adibu bateleja ne nebikale badiakaje bua kufila mandamuna padiku mushindu.​—1 Tim. 4:15.

³ Dilongololayi bua kufila mandamuna: Muntu yonso mu dîku udi ne bua kuikala ne tshipatshila tshia kumanyisha ditekemena diende kumpala kua bakuabu mu diela nseka mu bisangilu. (Eb. 10:23) Kudiku muena mu dîku udi dijinga ne diambuluisha anyi dimukankamija bua kuenza nunku anyi? Ndiambuluisha kayi didi muntu yonso ukengela bua kulongolola midimu ya mu Kalasa ka Mudimu wa Teokrasi? Bakaji batu banyisha padi babayabu badipangadijila nkayabu bua kubambuluisha ne pamu’apa babapesha tshilejilu tshidi tshiakanyine muyiki wabu anyi babasunguila nsombelu muimpe wa muyiki. Baledi ki mbenzejibue bua kulongoluela bana babu batekete midimu yabu nansha. Kuenza nanku kudi mua kutekesha bana mu mikolo. Kadi baledi badi mua kuambuluisha bana babu batekete ne kuteleja padibu bambulula midimu yabu ne dîyi dikole.​—Ef. 6:4.

⁴ Dilongololayi bua kuya mu bisangilu: Bana badi ne bua kulonga patshidibu batekete bua kuvuala bilamba ne kudilongolola bua kuya mu bisangilu pa dîba. Bena mu dîku badi ne bua kuambuluishangana mu dienza midimu ya ku nzubu bua ne: kakuikadi dijanguluka to.​—Tangila ngenyi mifila mu mikanda eyi: Disanka mu dîku, dibeji 112, ne Les jeunes s’interrogent, mabeji 316-317.

⁵ Baledi ne bana babu badi mua kuela meji bimpe pa mêyi a Yoshua wakamba kale ne: ‘Meme ne ba mu nzubu muanyi netukuatshile Yehowa mudimu.’ Pashishe, bapangadije bua kuambuluishangana bua kuandamuna bimpe menemene ne kuenza midimu mikuabu mu bisangilu bia tshisumbu.​—Yosh. 24:15.