Ndongamu mupiamupia wa mpuilu wa tshijengu
Ndikuatshisha kayi diakanyine diudi nadi mpindieu bua muudi wenda ne Yehowa? Mmunyi muudi mua kukandamena diteta dia kushila bipatshila bidi kabiyi bia teokrasi muaba bua kutshiamakanabi kumpala kua bipatshila bia Bukalenge mu nsombelu webe? (Mat. 6:33) Bitu bikukolela bua kusunguluja tshidi tshimpe ne tshibi mu bukua-panu budi buvuija malu mabi amueneka mimpe anyi? (Eb. 5:14) Malu aa nebaumvuije mu mpuilu wa tshijengu wa: “Tupetayi dikuatshisha mpindieu mu diendela mu njila ya Nzambi,” watuadija mu Kabitende 1999.—Mus. 128:1.
Bualu bupiabupia buikalaku mu Disambombo dia mpuilu eu wa tshijengu ndienza Tshisangilu tshia Mudimu tshia tshilejilu. Mutangidi wenu wa tshijengu neamanyishe bisumbu malu adi malongolola bua ne: bantu bonso balue badiakaje bua kulonda tshishiki ndongamu eu.
Tshitupa tshidi ne tshiena-bualu tshia: “Bampanda-njila—dimukayi bikole bua mushindu unudi nuenda,” netshituleje mushindu wa kuikala ne meji ne nkatshinkatshi bua kumona mua kudisumbila tshikondo tshiakanyine bua mudimu wa bumpanda-njila. (Ef. 5:15-17) Tshiena-bualu tshia: “Dimukilayi njila idi imueneka ku mêsu bu miakane,” netshitulongeshe mua kujadika tshidi Nzambi wanyisha mu tshitupa tshionso tshia nsombelu wetu. Muyuki wa: “Mushindu udi milayi ikadi mikumbane mikale ne buenzeji kutudi,” newambuluishe bua kuuja dinanga dia Dîyi dia Nzambi mu lungenyi luetu ne mu mitshima yetu. Muyuki wa patoke wa: “Njila ya Nzambi—idi ne dikuatshisha bushuwa!” newele kashonyi pa dikuatshisha diakanyine ditudi tupeta patudi tuenda balamate mêyi makane a Yehowa.
Udiku ne dijinga dia kuleja patoke mu ditambula mu mâyi ne: udi musue kuendela mu njila ya Nzambi bu musadidi wende mudilambule anyi? Nunku wambile mutangidi-muludiki bua alongolole malu adi akengedibua.
Angata dipangadika dia kubenga kupumbisha mpuilu wa tshijengu eu udi wenzeka mu tshikondo tshiakanyine. Wikaleku mu ndongamu mujima wa matuku abidi eu, bualu ‘disanka didi kudi muntu yonso udi unemeka Yehowa, udi wenda mu njila yende.’—Mus. 128:1.