Mandamuna ku nkonko yenu

▪ Bua tshinyi bidi ne dikuatshisha bua bateleji kukebabu mvese mu Bible yabu padi ngamba-malu ubalomba bua kuyikebabu dîba didiye wenza muyuki?

Malu bu mudi tshiena-bualu tshia muyuki wende ne bikala muyuki muikale dikonkonona dia mvese umue ku umue dia tshitupa tshia mukanda kampanda ke adi mua kujadika bungi bua mvese idi ngamba-malu mua kulomba bateleji bua kukebabu.

Mbia mushinga bua kuvuluka ne: bualu bumue butudi tukebela imue mvese mbua kujadika ne: malu atudi tuamba mmangatshila mu Bible. (Bien. 17:11) Tshipatshila tshikuabu ntshia kupatula mvese ya mu Bible idi ituisha lungenyi ne ibingisha bitudi tuamba bua kukolesha ditabuja dia bateleji bonso. Padi bateleji badimuena tshidi Bible wamba dîba didibu bababadila mvese kampanda wa nshindamenu, bualu budibu bamba budi mua kutamba kushindama mu lungenyi luabu. Pa kumbusha dikeba dia mvese, kufunda amue malu a kuvuluka ne kulonda bimpe ngenyi idibu bumvuija kudi kuambuluisha.

Nansha bikala plan wa muyuki udi Société mufile mua kuikala ne mvese ya bungi, mbayifile bua kuambuluisha ngamba-malu, bua kumuambuluisha mu dilongolola diende dia muyuki. Idi mua kumuleja amue malu adi umvuangana ne muyuki ne kumuambuluisha bua kumvuaye bimpe tshidi mêyi a mu Mifundu asua kuamba ne kumanyaye mua kuenza muyuki wende bimpe. Ngamba-malu udi usungula mvese idi ne dikuatshisha bua muyuki wende ne ulomba bateleji bua bamulonde dîba didiye uyibala ne uyumvuija. Mikuabu mvese idi ne ngenyi ya muyuki, ngamba-malu udi mua kuyitela anyi kumvuija patupu ngenyi idimu, kadi apa bateleji kabena anu ne bua kuyikeba to.

Padi ngamba-malu ubala mvese idiye musungule, udi uyibala buludiludi mu Bible, ki mpa dibeji didiye muyitentuile nansha ku tshiamu nansha ku bianza to. Padiye ulomba bateleji bua kumulondabu mu yabu Bible dîba didiye ubala mvese, udi utela mukanda wa mu Bible, nshapita ne mvese biumvuike bimpe. Kuanji kuimanaku kakese bua kujula lukonko anyi kumvuija mu tshikoso bua tshinyi udi musue kubala mvese au, nekuambuluishe bateleji bua kupeta mushindu wa kukeba ne kupeta mvese au. Kutela tshiakabidi mvese au nekuambuluishe bateleji bua kumuvuluka. Kadi, ki mbimpe kutela dibeji dia muaba udi mvese to, bualu mabeji atu ashilangana bilondeshile Bible idi nayi bantu badi bateleja muyuki. Kukeba mvese padibu balomba bua kuyikeba kudi kuambuluisha bateleji bua kupetelabu dikuatshisha ku bukole bua Dîyi dia Nzambi dîba didibu benda badiumvuija mu muyuki.​—Eb. 4:12.