Udiku mua kuenza mudimu muaba udi dijinga dia bungi anyi?

¹ Ukadiku muele meji a kuya muaba udibu dijinga ne bamanyishi ba Bukalenge ba bungi anyi? Buobu bakulombe bua ‘kuya kuambuluisha’ muaba kampanda, newitabe bu muakitaba mupostolo Paulo anyi? (Bien. 16:9, 10, NW) Mu bisumbu bia bungi badi dijinga ne mêku a bantu bashindame mu nyuma, bampanda-njila bua kumona mua kuyisha kujikija teritware mujima, badi kabidi dijinga ne bakulu ne basadidi ba mudimu bashindame bua dilombola dia malu kabukabu mu bisumbu. Teritware udi mua kuikala ne misoko miashila palepale ku madimi. Nzubu wa Bukalenge udi mua kuikala mutantshi mule ne miaba eyi. Bidi mua kuikala bikole bua kupeta midimu. Miunya ne mvula bidi mua kuikala bipite bukole. Udi mua kuitaba bua kuyaku nansha kuoku kuikala ntatu ya mushindu eu anyi? Bidi bikengela tshinyi bua kufika ku dienza mudimu eu bimpe?

² Ditabuja ne dieyemena bidi ne mushinga: Ku dilomba dia Nzambi, Abalama wakumbuka mu tshimenga tshiabu tshia Ula muvuaye mukolele, kuenzaye luendu lua kilometre 1 000, mutangile ku Halana yeye ne mukajende, ne muana wa muanabu, ne tatuende Tela ukavua mukulakaje. (Gen. 11:31, 32; Neh. 9:7) Kunyima kua lufu lua Tela, Yehowa wakambila Abalama (pinapu ne bidimu 75) bua kumbukaye ku Halana yeye ne balele bende, bua baye mu ditunga divua Nzambi ne bua kumuleja. Abalama, Salai ne Lota ‘bakaya.’ (Gen. 12:1, 4, 5) Bushuwa, Abalama kavua muenze luendu elu bua kuya muaba uvua dijinga dia bungi dia bantu bavua mua kuenza mudimu wa Nzambi to. Kadi luendu luende luvua lumulomba bualu kampanda. Mbualu kayi abu?

³ Bivua bikengela ditabuja ne ditekemena bua Abalama kufikaya ku dienza luendu lua nunku. Ngelelu wende wa meji ne nsombelu wende bivua ne bua kushintuluka. Uvua ne bua kushiya nsombelu muimpe uvuaye nende munkatshi mua balele bende. Kadi uvua mushindika se: Yehowa neamukube yeye ne dîku diende. Bantu ba bungi lelu’eu mbeyemene kabidi Yehowa mu mushindu wa muomumue.

⁴ Midimu ya tshikondo tshîpi: Ukadiku mulabule mabenesha mavule adi muntu mua kupeta padiye uyisha mu teritware udi muntu mukuabu kayi muanji kuenzela mudimu anyi? Tshidimu tshishale mu États-Unis (mu provense 48), bamanyishi 5 699 bakayisha mu teritware 163 ya ku 174 ivuabu kabayi banji kupesha bamanyishi. Bamanyishi bakuabu 5 676 bakambuluisha bisumbu 380 bua kuyisha kujikija mu teritware ivua bisumbu abi biya kuyishamu anu mu mpukapuka. Bua bamue ba ku bamanyishi aba, bivua bikengela benze ngendu mile. Bivua ne mushinga anyi?

⁵ Muanetu wa mu Californie wakaya mu provense wa Utah wakafunda ne: “Ngakelakana musangu wa kumpala wakandombabu bua kupatuka ne bantu mu buambi mu teritware eu utu bamanyishi baya kuyishamu anu mu mpukapuka. Kadi ku ndekelu ngakitaba bua kuya. Tshitu muanji kunyingalala nansha kakese bua mudimu au to, kabidi wakashintulula nsombelu wanyi. Ndi ngela Yehowa tuasakidila dituku dionso bua mudiye mumpesha mushindu wa kuenza luendu elu ne bakuabu.” Muanetu mukuabu wa mu Floride wakaya mu provense wa Tennessee wakamba ne: mbualu buvuaye kayi mua kupua muoyo bua mu bidimu 20 bikadiye nabi mu bulelela! Nsongalume mukuabu wa mu provense wa Connecticut uvua muye mu Virginie Occidentale wakamba yeye ne: “Etshi tshivua bualu butambe buimpe bua mu matuku anyi a muoyo!” Bamanyishi ba bungi badi bitaba se: kusadila nansha bua tshikondo tshîpi muaba udi dijinga dia bungi, nkuvudije dinanga diabu bua mudimu eu. Yukila ne bantu bakadi benze mudimu eu. Neumone ne: biakabavudijila makanda abu a mu nyuma ne badi bajinga pamu’apa bua kuenza tshiakabidi mudimu eu bu mushindu mua kumueneka kabidi.

⁶ Kuitaba mudimu wa tshikondo tshîpi ne kuya kusadila muaba udi dijinga dia bungi kudi mua kufikisha muntu ku tshintu tshikuabu. Badi benza nanku badi mua kufika ku dimanya amue malu a mushinga adi mua kubambuluisha bua “kubala mushinga” bangabanga ne kumuangala bua kuya kuasa muaba mukuabu wa mu ditunga.​—Luka 14:28.

⁷ Yehowa mmusue bua lumu luimpe luambibue mu “bantu bonso ba pa buloba” bangabanga ne nshikidilu kuluaye. (Mat. 24:14) Bu muudi mumanye bualu ebu, udiku mua kuitaba bua kuya muaba udi dijinga dikale dia bungi anyi wewe muikale ne mushindu anyi? Kudi dijinga miaba ya bungi.

⁸ Tuye miaba idi dijinga dikale dia bungi: Ukadi muangate pansio ku mudimu anyi? Udi ne mudimu kuudi udiila anyi? Bikalabi kabiyi nanku, udiku mua kudienzela webe wa nkayebe anyi? Udiku mua kukokesha bua kusombela muaba kayi wonso anyi? Biwikala wewe kuyi ne mushindu wa kuya muaba mukuabu, udiku mua kuambuluisha muena mu dîku dienu umue bua kuyaye kuenza mudimu muaba mukuabu anyi?

⁹ Wewe mumane kuela meji ne muoyo mujima ne musambile bua bualu ebu ne mumone se: kudi mushindu wa wewe kumuangala ne kuya muaba udi dijinga dikale dia bungi, uyikile bualu ebu ne bena mu dîku dienu ne bakulu ba mu tshisumbu tshienu. Pashishe, ufunde mukanda ulejamu dijinga diebe edi ne uupeshe bakulu bua basakidile abu mêyi ne bidibu bajinga kumanyisha bangabanga ne kuutuminabu biro bia filiale.

¹⁰ Mmalu kayi audi ne bua kufunda mu mukanda webe au? Bidimu biebe, dituku diuvua mutambule, midimu iudi nayi mu tshisumbu, kumanyisha ni udi musele anyi mujike, ne ni udi ne bana bautshidi ukolesha. Leja muaba uudi ukeba bua kuya kuenzela mudimu bilondeshile ebe majinga. Tshilejilu, udi mua kusomba muaba utu luya ne mvula iloka bikole anyi? Udi mua kukumbana bua kusombela muaba udi pa mikuna mile anyi? Udi mumanye muakulu kampanda muenyi anyi?

¹¹ Udi ne lukunukunu ne udiku mua kuangata dipangadika dia kuenza mudimu eu anyi? Nsombelu uudi nende udi mua kukupesha mushindu wa kuenza mudimu muaba udi dijinga dikale dia bungi anyi? Bikalabi nanku, teta bua udimuene mushindu udi Yehowa utungunuka ne kuitshikijila badi bamueyemena mabenesha a bungi bualu badi ne lungenyi lua didifila!​—Mus. 34:8; Mal. 3:10.