Eyemena Yehowa bua kupeta bukole
1 Kudi malu a bungi adi aleja mudibi bikengela bua tueyemene Yehowa. Kuyisha ‘bantu bonso ba pa buloba’ lumu luimpe mmudimu wa lutatu lua bungi. (Mat. 24:14) Pa tshibidilu tutu tuluangana ne mubidi wetu wa mpekatu. (Lomo 7:21-23) Kabidi ‘diluangana dietu dia bibula ndia kufuilangana ne bamfumu [badi batambe bantu ku makanda] ba mîdima ba buloba ebu.’ (Ef. 6:11, 12) Bushuwa, tudi dijinga ne diambuluisha. Tshia kuenza ntshinyi bua kupeta bukole bua kudi Yehowa?
2 Tudi ne bua kusambila: Yehowa utu upesha basadidi bende nyuma munsantu wende wa bukole padibu bamulombaye. (Luka 11:13) Udi udimona kuyi ukumbana bua kuyisha ku nzubu ne ku nzubu, mu misesu peshi ku telefone anyi? Utu ne buôwa bua kuyisha mu mpukapuka anyi? Dibenga kuteleja dia bantu ba mu teritware webe ndikepeshe lukunukunu luebe mu mudimu anyi? Ntshinyi tshiwenza bikalabu bakuenzeja bua wewe kulekela ditabuja diebe anyi lulamatu luebe? Eyemena Yehowa. Umulombe bua akupeshe bukole.—Filip. 4:13.
3 Tudi ne bua kudilongela: Anu bu mututu tupeta bukole patudi tudia biakudia, tudi tupeta bukole mu nyuma patudi tudidisha pa tshibidilu ne Dîyi dia Nzambi ne tulonga mikanda ya “mupika wa lulamatu ne wa budimu.” (Mat. 4:4; 24:45, NW) Pakakonkabu Stanley Jones bua kumanya tshivua tshimupeshe bukole bua kutantamena ntatu mu bidimu bionso bivuaye nkayende mu buloko mu ditunga dia Chine kayi nansha ne Bible, Jones wakamba ne: “Tudi mua kushala bashindame mu ditabuja. Bushuwa, tudi ne bua kuanji kudilongela. Patudi katuyi tudilongela, bukole kabuakuikala munda muetu to, tudi tushala tshizubuzubu patupu.”
4 Tudi ne bua kuikala tubuela mu bisangilu: Dimue edi mu tshisangilu tshia bena Kristo mu bidimu lukama bia kumpala, Yuda ne Sila ‘bakambila bantu mêyi a bungi, bakakolesha mitshima yabu.’ (Bien. 15:32) Bia muomumue lelu’eu, bitudi tuteleja mu bisangilu bidi bikolesha dianyisha dietu bua Yehowa, bikolesha ditabuja dietu ne bitusaka bua kuenza mudimu wa buambi. Bisangilu bidi biambuluisha bua tuikale tumonangana ne ‘benzejanganyi netu ba mudimu bua bukalenge bua Nzambi,’ badi bikale “ba[tu]sambi” betu.—Kolos. 4:11.
5 Tudi dijinga ne diambuluisha mu ‘bikondo bia njiwu bikole mua kupita nabi’ ebi. (2 Tim. 3:1, NW) Bua bantu badi bapetela bukole buabu kudi Yehowa, tudi batuishibue se: ‘nebabande mulu ne mapuapua bu nyunyu ya mukanku, nebanyeme lubilu ne kabena bapungila, nebende ne kabena bateketa.’—Yesh. 40:31.