‘Manyisha Dîyi dia Nzambi menemene’
1 Paudi uleja ne muoyo mujima dianyisha bua tshintu tshilenga kampanda tshidibu bakupeshe, kabienaku bimuenekela ku mmuenenu uwikala nende ne ku bienzedi biebe anyi? Bidi nanku! Bua buakane ne bulenga bidi Yehowa uleja bantu, Paulo wakamba ne: ‘Tuasakidila kudi Nzambi bua kupa kuende kudi kakuyi mua kuambibua’! Ntshinyi tshitudi mua kutela mu ‘kupa kudi kakuyi mua kuambibua’ eku? Bua ‘ngasa yonso mutambe bunene wa Nzambi’ udiye mutuleje, mmumuenekele mu muanda mutambe bunene wa dipa dia Muanende bu mulambu wa kutupikula nawu ku mpekatu yetu.—2 Kol. 9:14, 15; Yone 3:16.
2 Mêyi a Paulo aa a tuasakidila avua anu a mukana patupu anyi? Tòo! Wakaleja mu mishindu ya bungi dianyisha divule. Uvua utamba kuditatshisha bua diakalenga dia mu nyuma dia bana babu bena Kristo ne kabidi uvua musue kuenza muende muonso bua kubambuluisha bua kupetabu masanka mavule bua bulenga bua Nzambi. Bua bualu buabu, Paulo wakamba ne: ‘Bualu bua tuakatamba kunusua, tuakadi ne disanka dimpe bua kunupa, ke ndumu luimpe lua Nzambi nkayalu, kadi mioyo yetu kabidi, bualu bua nuakalua banangibue kutudi.’ (1 Tes. 2:8) Bua dijinga divuaye nadi dia kuambuluisha aba bakavua mu tshisumbu musangu au bua kabafiki ku dijimija lupandu luabu, Paulo wakayisha lumu luimpe kayi utshioka, wenza ngendu mile mu njila ne ku matu bua kupeta bantu ‘bavua badiakaje bimpe bua muoyo wa kashidi.’ (Bien. 13:48, NW) Dianyisha dia Paulo bua bionso bivua Yehowa mumuenzele diakamusaka bua ‘kumanyisha dîyi dia Nzambi menemene.’—Kol. 1:25, MML.
3 Dianyisha ditudi nadi bua bionso bidi Yehowa mutuenzele kadienaku ditusaka bua kuambuluisha mu nyuma bena mu tshisumbu tshietu bonso badi dijinga ne diambuluisha anyi? (Gal. 6:10) Katuenaku tumvua muoyo wa kuyisha kuyishilamu lumu luimpe lua Bukalenge mu teritware wetu anyi?—Mat. 24:14.
4 Tshikondo tshiakane tshia kuleja dianyisha: Tshidimu tshionso Tshivulukilu tshia lufu lua Kristo tshitu tshikondo tshia pa buatshi tshia kuleja dianyisha bua tshidi Yehowa ne Yezu batuenzele. Tshibilu tshia Tshivulukilu katshitu anu tshisangilu bu bikuabu bionso anyi divuluka patupu muanda kampanda nansha. Yezu wakamba ne: ‘Enzayi nunku bua kumvuluka.’ (Luka 22:19) Tshivulukilu tshia lufu lua Kristo ntshikondo tshia kuela meji bua kumanya menemene Yezu ni uvua muntu wa mushindu kayi. Ntshikondo tshia kuvuluka ne: Yezu udi ne muoyo ne udi munkatshi mua dienza mudimu lelu’eu, ne mpindieu udi ne butumbi ne mbamupeshe bukalenge bua lulamatu ne didifila diende. Musekelelu eu udi kabidi tshikondo tshia kuleja mutudi tukokela buludiki bua Kristo, bualu yeye ke udi ulombola midimu ya mu tshisumbu tshia bena Kristo. (Kolos. 1:17-20) Bantu ba Nzambi bonso badi ne tshia bua kuikalaku mu Tshivulukilu tshia lufu lua Kristo. Tshidimu etshi Tshivulukilu netshienzeke mu Dinayi dia matuku 28 a ngondo muisatu kunyima kua dibuela dia dîba.
5 Bua mudimu utuvua benze ne tshisumi tshionso kumpala kua Tshivulukilu tshia tshidimu tshishale, bantu bavuamu bakafika too ne ku 592 922 mu Congo-Kinshasa ne 20 258 mu Congo-Brazzaville. Kadi tshidimu etshi, bantu nebikalemu bungi kayi? Bidi bikengela ‘mudimu mukole ne kuditshinta’ kuetu bua bantu batuapeta kuluabu muomu ba bungi.—1 Tim. 4:10.
6 Pa kumusha dibuela mu Didia dia Mukelenge edi, tudi kabidi mua kuvudija mudimu wetu wa buambi. Tudi bashindike se: bana betu ba bungi nebalue bampanda-njila bambuluishi bua ngondo umue ta ya bungi. Mu bidimu bitanu bishale ebi, tshidimu tshionso tuvua ne muayene wa bampanda-njila bambuluishi 14 458 mu tshikondo tshia Tshivulukilu, kutuadijila ku ngondo muisatu too ne muitanu. Udiku mua kuakaja malu ebe bua kuikala mpanda-njila muambuluishi tshidimu etshi anyi? Atshi netshikale mushindu mulenga wa kuleja dianyisha diebe ne muoyo mujima bua dipa dia Nzambi dia mulambu wa Kristo. Udi mua kutekemena bua Yehowa kukubeneshaye, anu mudi miyuki idi ilonda eyi ileja.
7 Muanetu wa bakaji kampanda udi wenza mudimu udi umuangata dîba dia bungi wakalua mpanda-njila muambuluishi mu ngondo muisatu wa tshidimu tshishale, wakafunda ne: “Mudimu wetu wa Bukalenge wa ngondo muibidi 2001 wakakankamija bantu bonso badi ne mushindu bua kuenza bumpanda-njila buambuluishi tshikondo tshia Tshivulukilu. Bu muvua ngondo muisatu ne matuku a Disambombo atanu majima, biakakumbanangana ne programe wanyi. Nunku ngakapangadija bua kuuja dibeji dia dilomba.” Anu ngondo utshibanga yeye e kudifundila tshipatshila tshia kutuadija dilonga Bible ne muntu. Uvua mukumbaje tshipatshila atshi anyi? Eyowa, wakenza mêba 52 mu buambi ngondo au! Ntshinyi tshidiye wamba bua kujikija? “Kudi masanka mavule patudi tuenza mudimu eu ne makanda etu onso.”
8 Mmasanka kayi akapeta bena mu dîku bavua benze bumpanda-njila pamue? Dîku kampanda dia bantu banayi bavua benze mudimu eu mu ngondo muinayi wa tshidimu tshishale bakashala bavuluke anu ngondo eu. Mamu wakamba ne: “Bu mutuvua mu mudimu pamue, bushuwa tuvua ne malu mimpe a kuambilangana dituku dionso! Dilondelangana malu atuvua tumona mu mudimu wetu wa dituku dionso divua divuija tshikondo tshia kudia, tshikondo tshia disanka menemene.” Muana wakamba ne: “Mvua ne disanka dia kuenza mudimu pamue ne Tatu munkatshi mua lumingu, dîba dituye pa tshibidilu ku mudimu.” Tatu wakasakidila ne: “Mundi ku mutu kua dîku, ngakumvua disanka pa kumona ne: tuvua baditue pamue mu mudimu wa mushinga mukole udiku bua tshikondo tshietu etshi.” Bena mu dîku diebe badiku pabu mua kuenza pamue mudimu eu wa bumpanda-njila anyi? Bua tshinyi kubenga kuyukidilangana ne bena mu diebe dîku bua kumona ni kudi mushindu wa buobu bonso kuikala bampanda-njila bambuluishi mu tshikondo tshia Tshivulukilu etshi?
9 Tudiku mua kuvuija ngondo muisatu eu wa pa buende anyi? Ku ntuadijilu kua tshidimu tshia 2000, kuvua lukonko elu mu Mudimu wetu wa Bukalenge: ‘Kudiku mushindu wa kuenza bua ngondo muinayi wa 2000 ikale ngondo wetu mutambe buimpe anyi?’ Diandamuna divua tshinyi? Mu miaba mivule, bungi abu buakavula bikole. Bampanda-njila bambuluishi bavua ba bungi ngondo au, bavua 7 964. Mêba, bibejibeji bishila bantu, ne makumbula biakavula. Utshidi muvuluke disanka divua nadi bantu mu tshisumbu tshienu bua mudimu muvule wa mu nyuma uvua muenzeke mu ngondo wa pa buende au anyi? Tudiku mua kufikisha anyi kupitshisha pa bituvua benze tshidimu atshi anyi? Tuetu badisuike bonso pamue, ngondo muisatu wa tshidimu etshi udi mua kulua “Ngondo wetu wa pa buende.” Bua tshinyi ngondo muisatu?
10 Kudi malu abidi adi ngondo muisatu ne bua kuikadila ngondo wa pa buende bua mudimu wetu wa buambi. Bua kumpala: Tshivulukilu netshienzeke lua ku ndekelu kua ngondo au, nunku netupete dîba dikumbane ku mbangilu kua ngondo bua kumona mua kubikila bantu ba bungi. Buibidi: bu mudi tshidimu etshi ngondo muisatu muikale ne matuku a Disambombo atanu ne a Dia lumingu atanu, nanku bidi mua kuambuluisha badi benza mudimu anyi balongi ba mu tulasa bua kuikala bampanda-njila bambuluishi. Bua tshinyi kubenga kusomba mpindieu ne kuenza programe mukumbanyine wa mudimu ku diambuluisha dia kalandriye kadi mu tshisakidila etshi? Kuikala mpanda-njila muambuluishi kudi mua kuikala kupepele kupita muudi mua kuikala ubielela meji. Tshilejilu, wewe muikale ne programe wa kuenza mêba 8 mu buambi ku ndekelu kua lumingu luonso lua ku mbingu itanu eyi, kudi kukushadila anu mêba dikumi patupu a kuenza mu matuku onso makuabu adi mashale aa bua kukumbaja tshipatshila tshia mêba 50.
11 Ntshinyi tshidi bakulu ba tshisumbu mua kuenza bua kuambuluisha bamanyishi bonso bua ‘kumanyishabu dîyi dia Nzambi menemene’? Fikishayi bantu ku dienza bualu ebu panudi nuenza midimu mu bisangilu ne panudi nuyikila nabu. Balombodi ba Dilonga dia Mukanda dia Tshisumbu ne bindondi biabu badi mua kuyukila ne muntu yonso wa mu kasumbu kabu ka dilonga ne kumuambuluisha. Pamu’apa mêyi makese a dinanga adi akankamija anyi ngenyi miakanyine ya kuenza nayi mudimu ke idi mua kuikala ne mushinga. (Nsu. 25:11) Bantu ba bungi nebafike ku dimona ne: buobu bakaje programe wabu, badi mua kufika ku dikala bampanda-njila bambuluishi. Mu bisumbu bia bungi, bakulu ne basadidi ba mudimu ba bungi ne bakaji babu, peshi mene bonso batu bafila tshilejilu tshilenga pa kuikala bampanda-njila mu tshikondo tshia Tshivulukilu. Dienza nunku diakakankamija bamanyishi ba bungi bua kubalonda mu nyima. Bamue bamanyishi kabakukokesha bua kuikala bampanda-njila bua masama anyi bua mianda kampanda, kadi badi mua kubakankamija bua kulejabu dianyisha pa kudifila muabu muonso mu mudimu pamue ne bena mu tshisumbu bakuabu.
12 Bipeta bilenga nebipeteke bilondeshile muikala bakulu mua kulongolola malu ne ntema yonso. Bisangilu bia mudimu wa buambi munkatshi mua lumingu bidi ne bua kuikala bienzeka pa dîba dikumbanyine. Kuoku kuikale mushindu, mutangidi wa mudimu udi mua kudianjila kusungula bana betu ba balume bakumbane bua kuikalabu balombola bisangilu bia mudimu wa buambi bionso. Nudi ne bua kudilongola bimpe bua bisangilu ebi kabipitshishi pa minite 10 ta 15 to, kusangishamu ne diabanya dia bantu, difila dia teritware ya dienzela mudimu ne disambila. (Tangila kazubu ka Mandamuna ku Nkonko yenu mu Mudimu wetu wa Bukalenge wa Kabitende 2001.) Numanyishe tshisumbu programe yonso wa mudimu bua ngondo mujima ne pashishe numulamike ku tshibasa tshia mamanyisha.
13 Nulongolole teritware bungi bukumbane. Mutangidi wa mudimu apetangane ne muanetu udi wambuluisha mu malu a teritware bua kulongololabu bua kuya kuenzela mudimu mu teritware itubu kabayi batamba kuyishamu. Nuimanyine bikole pa tshilumbu tshia diya kuyisha ku nzubu inutu kanuyi nusangana bantu, mu njila, ku makazen ne diyisha mu mêba a ku dilolo. Padiku mushindu, bamue bamanyishi badi mua kuyishila ku telefone.
14 Nubambuluishe bua batuadijilule kabidi: Kudiku bantu mu teritware wa tshisumbu tshienu bakadi kabatshiyi bayisha kabidi lumu luimpe anyi? Bantu ba nunku aba batshidi anu bena mu tshisumbu ne badi dijinga ne diambuluisha. (Mus. 119:176) Bu mudi bulongolodi ebu buenda busemena ku nshikidilu wabu ne bupiabupia buobu buenda busemena pabuîpi, tuenzayi muetu muonso bua kuambuluisha aba bakadi batekete mu nyuma. (Lomo 13:11, 12) Mu bidimu bitanu bishale ebi, bantu bapite bungi ku tshidimu tshionso batu bitabe diambuluisha edi ne batuadijilule kabidi ne mudimu wa buambi. Tshia kuenza ntshinyi bua bantu ba bungi bapetulule dinanga ne dieyemena dia buena divuabu nadi pakabangabu mudimu eu?—Eb. 3:12-14.
15 Kasumbu ka bakulu kadi mua kudisangisha bua kukeba tshia kuenza bua kuambuluisha aba bakadi kabatshiyi bayisha. (Mat. 18:12-14) Sekretere wa tshisumbu udi mua kutangila fishi ya bamanyishi bonso ne pashishe kufunda mêna a bonso bakadi batekete. Bakulu badi kabidi mua kulongolola bua kukankamija bantu mu makumbula a bulami enzabu. Mukulu kampanda udi mua kuanyisha bua kuya kukumbula mumanyishi kansanga bualu mbamanyangane nende katshia kuonso aku ta bualu mbalunda, anyi badi mua kulomba bamanyishi bakuabu bua kuambuluishabu pabu mu muanda eu. Pamu’apa bamanyishi abu bavua balonge ne bantu bakadi mpindieu balekele kuyisha abu ne bidi mua kubenza disanka bua kubambuluishabu mu mushindu wa pa buawu mu tshikondo etshi tshidi diambuluisha edi dikengela. Tudi batekemene se: bantu ba bungi bakadi balekele diyisha nebatuadijilule kabidi ne mudimu wa diyisha Dîyi dia Nzambi. Bu buobo mua kudikumbaja, tshikondo tshia Tshivulukilu ke tshidi tshiakanyine bua kutuadijilula mudimu eu!—Bua kupeta mamanyisha makuabu, tangila Kazubu ka Mandamuna ku Nkonko yenu kadi mu Mudimu wetu wa Bukalenge wa ngondo wa Kasuabanga 2000.
16 Kudi bakuabu badi bakumbana bua kuyisha anyi? Yehowa udi utungunuka ne kubenesha bantu bende pa kulua ne ‘bintu bilengele bia mu matunga onso.’ (Hag. 2:7, NW) Tshidimu tshionso bantu binunu ne binunu badi balua bamanyishi badi kabayi banji kutambula. Mbanganyi abu? Mbana ba Bantemu ba Yehowa ne balongi ba Bible badi bakola. Mmunyi mutudi tufika ku dimanya ne: mpindieu mbakumbane bua kuikala bamanyishi ba lumu luimpe?
17 Bana ba Bantemu ba Yehowa: Bana ba bungi batu baya ne baledi babu mu buambi bua ku nzubu ne ku nzubu kukadi bidimu bia bungi, nansha mudibu kabayi banji kuikala bamanyishi badi kabayi banji kutambula. Ngondo muisatu mmumueneke muakanyine bua buobu kutuadija. Mmunyi muudi mua kujadika ne: muanebe ukadi mukumbane bua kuyisha? Mukanda wa Badilongolole bua kuenza mudimu wetu bimpe mu dibeji dia 99 udi uleja ne: ‘mpadi muana muikale ne ngikadilu wa tshitembu ujinga ne mukumbanyine bua kumanyisha ditabuja diende patoke ne dimuangalaja lumu luimpe.’ Paudi mumone ne: muanebe ukadi mukumbane, yikila ne umue wa ku bakulu ba mu Komite wa Mudimu wa Tshisumbu.
18 Balongi ba Bible bakumbane: Pakadi mulongi mupete dimanya ne mutuadije kubuela mu bisangilu kukadi matuku a bungi, udi mua kujinga bua kulua pende mumanyishi wa Bukalenge. Wewe muikale ulonga Bible ne mulongi wa mushindu eu, ela meji bua nkonko idi ilonda eyi: Udi uya kumpala, biumvuangane ne bidimu biende ne mamanya ende anyi? Utuku wambila nansha mu mpukapuka bantu bakuabu bidiye witabuja anyi? Ukadiku muvuale “bumuntu bupiabupia” anyi? (Kolos. 3:10) Udiku ukumbaja malu malomba bua bamanyishi badi kabayi batambule adi mu mukanda wa Mudimu wetu dibeji dia 97-99 anyi? Bikalabi nanku, udi mua kumanyisha Komite wa Mudimu wa Tshisumbu bua bakulu babidi bayukile ne mulongi ne wewe popamue. Bikalaye mukumbane, bakulu babidi aba nebamuambile bua kubangaye kupatuka netu mu mudimu wa buambi.
19 Kadi bua ngondo muinayi ne muitanu? Ngondo eyi neyikale payi ya pa buayi itudi mua kuvudija mudimu wetu wa buambi. Ba bungi bikala bampanda-njila bambuluishi mu ngondo muisatu badi mua kutungunuka kabidi ne mudimu eu mu ngondo muinayi ne pamuapa kuya nawu too ne mu ngondo muitanu. Mu ngondo muinayi ne muitanu, netudifile bikole mu mudimu wa diabanya Tshibumba tshia Nsentedi ne Réveillez-vous! Bibejibeji ebi bidi bushuwa biambuluisha bantu batu babibala! Mbienze mudimu munene mu ditanta dia mudimu wetu didiku lelu’eu pa buloba bujima. Netuenze mudimu wa pa buawu mu ngondo muinayi ne muitanu bua kufila bibejibeji kudi bantu ba bungi. Tuadija kudilongolola bua wadifila bikole mu mudimu eu.
20 Bu munudi bamane kudilongolola bua kuvudija mudimu wenu, se nudi dijinga ne bibejibeji bia bungi kupita bungi bunutu nupeta pa tshibidilu mu tshisumbu, ki mmuomu anyi? Mu tshidimu tshia mudimu tshijima, netuabanye Tshibumba tshia Nsentedi ne Réveillez-vous! mu Disambombo dionso, dituku ditudi tuangata bu dituku dietu dia bibejibeji. Kabidi, bu muikala bantu ba bungi bampanda-njila bambuluishi ne bakuabu bonso nabu mu mudimu eu wa diabanya dia bibejibeji bua ngondo yonso ibidi eyi, bidi mua kuikala bimpe bua kuvudija bungi bua bibejibeji bietu mu dilomba dia tshisumbu dituenza. Padibi bikale nanku, manyisha diakamue musadidi wa ku bibejibeji wa mu tshisumbu tshienu. Mu tshikondo tshimue tshimue atshi, musadidi wa ku mikanda udi ne bua kutangila bikala bantu bonso ne trakte wa Aimeriez-vous en savoir plus sur la Bible? bungi bukumbane.
21 Bana betu ba bungi mbanyishe bikole kazubu ka: “Mushindu wa kufila bibejibeji” kadi kapatuka mu Mudimu wetu wa Bukalenge. Utuku ulonda ngenyi ya mu kazubu aka bua kupeta mêyi a kuamba bua kufila bibejibeji anyi? Nudiku mua kulama ndambu wa minite mu dilonga dienu dia mu dîku dia lumingu luonso bua kulonga ne kudibidija bua kuenza mudimu ne ngenyi idibu bafila eyi anyi?
22 Enza muebe muonso mu tshikondo etshi tshia Tshivulukilu: Anu bu mupostolo Paulo, tulejayi Yehowa ne: tudi tuanyisha ‘kupa kuende kudi kakuyi mua kuambibua’ mu didifila dietu mu mudimu wa mu nyuma udibu balongolola bua tshikondo etshi tshia Tshivulukilu. Mu malu onso aa mudi kabidi (1) kubuela mu tshisangilu tshia mushinga mukole tshia ku tshidimu ku tshidimu, disekelela dia Didia dia Mukalenge, mu dia matuku 28 a ngondo muisatu tshidimu tshia 2002; (2) kuambuluisha bana betu bakadi balekele kuyisha bua kupetululabu “dinanga [diabu] dia ku ntuadijilu” (Buak. 2:4; Lomo 12:11); (3) kuambuluisha bana ne balongi ba Bible badi bakumbane bua kuluabu bamanyishi badi kabayi banji kutambula; ne (4) kudifila bikole mu mudimu wa diyisha bilondeshile muetu mutudi namu, pamu’apa kulua mpanda-njila muambuluishi mu ngondo muisatu ne mu ngondo mikuabu kabidi.—2 Tim. 4:5.
23 Dijinga dietu dinene didi se: yonso wa kutudi adifile bikole mu diyisha lumu luimpe lua Bukalenge mu tshikondo etshi tshia Tshivulukilu, nunku nebileje ne: tudi ne dianyisha dia bungi bua bionso bidi Yehowa mutuenzele.
[Kazubu mu dibeji 6]
Programe webe nkayebe wa buambi bua ngondo muisatu 2002
Dia lumingu Dimue Dibidi Disatu Dinayi Ditanu Disambombo
1 2
Dituku dia bibejibeji
3 4 5 6 7 8 9
Dituku dia bibejibeji
10 11 12 13 14 15 16
Dituku dia bibejibeji
17 18 19 20 21 22 23
Dituku dia bibejibeji
24 25 26 27 28 29 30
TSHIVULUKILU Dituku dia bibejibeji
KUNYIMA KUA
31 DIBUELA DIA DÎBA
Udiku mua kuenza webe programe bua kukumbaja mêba 50 pa kuitaba bua kuikala mpanda-njila muambuluishi mu ngondo muisatu anyi?