Mushindu udi bulelela butupikula
1 Dimue dituku Yezu wakambila bena Yuda bavua bamuitabuja ne: “Nenumanye bulelela, bulelela pabu nebunupikule.” (Yone 8:32, MMM) Uvua wakula bua budikadidi budi bupite buonso budi bantu mua kuikala nabu, budikadidi budi bantu bonso mua kupeta; babanji ne bapele, bamanyi ba mukanda ne bantu badi kabayi balonge. Yezu uvua mulongeshe bulelela buvua mua kufila bupikudi ku mpekatu ne lufu. Anu muvua Yezu mumvuije, ‘muntu yonso udi wenza bubi udi mupika wa bubi.’ (Yone 8:34) Mmunyipu mutudi tujinga bikole tshikondo tshikala bantu bena butumike bonso ‘bapikudibue kabidi ku bupika bua dibola diabu, ne babuejibue mu budishikaminyi bua butumbi bua bana ba Nzambi.’—Lomo 8:21.
2 Bulelela pa bidi bitangila Yezu ne mudimu wende munene mu malu adi Nzambi mulongolole budi bufila budikadidi bua mushindu eu. Budi kabidi butangila dimanya pa bidi bitangila mulambu wa tshia-bupikudi uvuaye mufile yeye muine bua bualu buetu. (Lomo 3:24) Nansha mpindieu, kuitaba ne kutumikila bulelela bua mu Bible kudi kutuambuluisha bua kuikala ne budikadidi kampanda ku buôwa, ku diteketa ku muoyo, ne ku mishindu yonso ya bienzedi bidi binyanga mubidi.
3 Budikadidi ku buôwa ne diteketa ku muoyo: Katuena ne bua kuteketa ku muoyo bua nsombelu idiku lelu pa buloba nansha, bualu tudi bamanye bua tshinyi malu mabi adiku, ne bamanye kabidi ne: nebaumushe onso nkong mu katupa kîpi emu. (Mus. 37:10, 11; 2 Tim. 3:1; Buak. 12:12) Kabidi, bulelela budi butupikula ku malongesha a dishima pa bidi bitangila bafue. Tudi bamanye ne: bafue kabena mua kutuenzela bibi to, kabena babakengesha tshiendelele nansha ne Nzambi kêna ushipa bantu anu bua kubangata mu diulu bua buobu kusomba nende to.—Muam. 9:5; Bien. 24:15.
4 Bulelela bua mushindu eu buvua bukoleshe tatu mukuabu ne mukajende pavua muanabu wa balume mufue ku njiwu kampanda. Mamu wakamba ne: “Kudi disoso buashi didi muntu kayi mua kujika too ne patuamona kabidi muanetu wa balume, pakumbana tshikondo tshia kubisha bafue. Kadi tudi bamanye ne: kanyinganyinga ketu nka matuku makese tshianana.”
5 Bupikudi ku bienzedi bidi binyanga mubidi: Bulelela bua mu Bible budi mua kushintulula ngelelu wa meji wa muntu ne bumuntu buende, bifikisha ku dipikudibua ku ntatu itudi mua kuepuka. (Ef. 4:20-24) Kuenza mudimu ne muoyo mujima, kuwenza kabidi ne tshisumi kudi kuambuluisha bua kukepesha bupele. (Nsu. 13:4) Kuleja dinanga dilelela ne muoyo mujima kudi kushemeja malanda ne bakuabu. (Kolos. 3:13, 14) Kunemekela mushindu udi Nzambi mulongolole malu a bumfumu mu dîku kudi kukepeshila bena Kristo ntatu idi mua kujuka mu dîku. (Ef. 5:33–6:1) Kuepuka bukuatshiki bua maluvu, tshiendenda, dinua dia mfuanka ne diamba kudi kufila makanda a mubidi malenga.—Nsu. 7:21-23; 23:29, 30; 2 Kol. 7:1.
6 Nsongalume mukuabu uvua ne lutatu lua kulekela dinua dia diamba dikavuaye munue munkatshi mua bidimu tshitema. Dimue dituku wakasambakena ne muanetu kampanda uvua uyisha mu njila. Wakangata tshibejibeji ne kuitaba bua kuluabu kumutangila kumbelu. Bakabanga dilonga dia Bible. Ngondo ibidi pashishe wakalekela dinua dia diamba bua kashidi, ne ngondo muanda-mukulu kunyima kubangila ku dituku divuabu babange kulonga, wakatambula. Padi mukuluende wa balume ne mukajende bamona dishintuluka edi, buobu pabu kutuadija kulonga Bible.
7 Tuambuluishayi bakuabu bua kupetabu budikadidi: Bantu bakadi benze bidimu bia bungi mu bupika bua malongesha a dishima badi mua kumona bikole bua kupeta budikadidi budi Dîyi dia Nzambi difila. Bua kulenga mitshima yabu bidi mua kulomba tshisumi tshia pa buatshi kudi mulongeshi ne didilongolola dilenga. (2 Tim. 4:2, 5) Etshi ki ntshikondo tshia kujanguluka to, tuenda tukoka makasa panshi bua kuenza mudimu wetu wa “kumanyisha badi ku bupika dibapikula diabo.” (Yesh. 61:1, MMM) Budikadidi bua bena Kristo budi ne mushinga wa bungi. Kubupeta kudi kumvuija muoyo wa tshiendelele.—1 Tim. 4:16.