Tulamayi muaba wetu wa ntendelelu ne mankenda

1. Mudimu udi nawu Nzubu wa Bukalenge mmudimu kayi?

¹ Kudi bisumbu bia Bantemu ba Yehowa bipite pa 94 000 pa buloba bujima. Bisumbu bia bungi bitu bidisangisha ku Nzubu wa Bukalenge bua kulonga Bible ne kusangila ne bena Kristo bakuabu, Nzubu wa Bukalenge ke muaba wa ntendelelu mukezuke.

2. Bua tshinyi mbimpe bua kulama Nzubu wa Bukalenge ne mankenda ne mukumbane kuleja ku bantu?

² Programe wa disukula pa tshibidilu: Mudimu wa dilongolola ne dilama Nzubu wa Bukalenge ne mankenda ntshitupa tshia mushinga tshia mudimu wetu wa tshijila. Mu mukanda wa Mudimu wetu mu dibeji dia 61 badi bamba ne: “Bana betu badi ne bua kuleja disanka mu dilongolola Nzubu wa Bukalenge, ki nganu mu disangisha makuta nkayawo to, kadi kabidi mu didifila ne budisuile bonso bua kuenza midimu idi imueneka ku Nzubu wa Bukalenge bua kuikalaye ne mankenda. Ku mmuenekelu wende wa pambelu ne wa munda, Nzubu wa Bukalenge udi ne bua kuleja mpala wa bulongolodi bua Yehowa.” Bu mudi bantu babuela mu Nzubu wa Bukalenge misangu mivule ku lumingu luonso, bidi bikengela kutekamu mankenda ne kumulongolola misangu yonso. Pa tshibidilu, bena budisuile ba mu tshisumbu anyi bisumbu bitu bidisangisha mu Nzubu wa Bukalenge ke batu benza midimu eyi. Anu bu muvuabi mu bikondo bitshivuabu bafunda Bible, tuetu Bantemu ba Yehowa tudi ne bua kudifila ne tshisumi lelu’eu mu midimu ya ‘dilongolola ne dikolesha’ muaba wetu wa ntendelelu.​—2 Kul. 34:10, MMV.

3. Mmushindu kayi udibu ne bua kuenza mudimu wa dilongolola Nzubu wa Bukalenge, ne nnganyi udi mua kuenza mudimu eu?

³ Programe wa disukula Nzubu wa Bukalenge ku lumingu luonso udi ne bua kuikala mulamika ku tshibasa tshia mamanyisha. Tusumbu tuonso tua dilonga dia mukanda tudi ne bua kulondangana mu midimu ya disukula nzubu eu lumingu luonso, tulonda liste wa malu onso adibu bafunde aditu ne bua kuenza. Bantu bonso badi ne mushindu badi ne bua kuditua mu mudimu eu udi wenzeka ku lumingu luonso wa kulama Nzubu wa Bukalenge ne mankenda ne wa kuleja ku bantu. Bana badi pabu mua kuenza mudimu eu ku bulombodi bua baledi babu, nunku dîba adi baledi badi babalongesha mua kuanyisha bua kukuatshila bakuabu mudimu mushindu eu. Nangananga padiku bisumbu bibidi anyi bivule bitu bidisangishila mu Nzubu wa Bukalenge umue, bidi bikengela biobi kueleshangana diboko bimpe ne kumvuanganabi bua se: mudimu wa mushinga wa ntendelelu wetu eu kawikadi bu bujitu pambidi anu pa bantu bakese patupu nansha.

4. Ntshinyi tshidi tshikengela kuenza bua tshisumbu kumanyatshi tshia kuenza dîba dia disukula Nzubu wa Bukalenge?

⁴ Badi mua kulamika liste wa malu adi akengela kuenza nangananga muaba udibu balamine bintu bia mudimu bikalaku mushindu. Pa liste au badi ne bua kumvuija midimu ya kuenza lumingu luonso, bu mudi diumusha dia lupuishi, matatanda a ntanda, disukula dia madidishi anyi klostra bilondeshile mudi Nzubu wa Bukalenge, dikupula mpuishi pa kontware wa mikanda, diumusha bintu bidi mu tupanza tua dielela butshiafu, dikolopa panshi ne disukula dia mmuenu. Kudi midimu idi kayiyi ikengela kuenza misangu ne misangu yonso, bu mudi dilaba dia verni ku bintu bidi bienza ne mabaya ne disukula dia nkuasa anyi bibasa, ne disukula dia rido ne miendu ya nzembu. Nsabanga yonso ne manga binudi nuenza nabi mudimu wa disukula nudi ne bua kubiteka muaba udi bana kabayi mua kubilenga ne nudi ne bua kubilamika tubeji tudi tuleja dîna ne mudimu wa tshintu ne tshintu. Bidi bikengela kufundapu diumvuija dikese dia mushindu wa kuenza mudimu ne manga aa onso.

5. Diepuka njiwu didi ne mushinga kayi, ne mbintu kayi bidi bikengela kutangilulula misangu yonso? (Tangila kazubu kadi mu dibeji 4.)

⁵ Diepuka njiwu ku Nzubu wa Bukalenge mbualu bua mushinga wa bungi menemene. (Dut. 22:8) Bua bualu ebu, kazubu kadi mu dibeji 4 kadi kaleja bimue bintu bidi bikengela kutangilulula misangu yonso bua kuepuka njiwu. Malu adibu balejamu aa ng’a kulonda bua bidi bitangila nzubu wa dilamina bintu bia midimu ya ku Nzubu wa Bukalenge.

6. Mmushindu kayi udi midimu ya dilongolola Nzubu wa Bukalenge ne bua kuenzeka?

⁶ Mudimu wa dilongolola Nzubu wa Bukalenge: Kasumbu ka bakulu kadi ne bujitu bua kulombola midimu ya dilongolola Nzubu wa Bukalenge. Pa tshibidilu batu basungula mukulu anyi musadidi kampanda wa mudimu bua kulombolaye midimu eyi. Udi ulongolola midimu ya kuenza ku dituku ne ku dituku ku Nzubu wa Bukalenge, wenza bua se: Nzubu wa Bukalenge ikale ne mankenda ne kayi ne tshintu tshidi tshinyanguke, ne kabidi bua se: bintu bia dienza nabi mudimu bikaleku. Ki mbimpe bua tshintu tshidi mua kukebesha njiwu nansha tshimue kuikalatshi munda mua Nzubu wa Bukalenge anyi pambelu nansha. Padiku bisumbu bia bungi bisangile Nzubu wa Bukalenge umue, tusumbu tua bakulu ba mu bisumbu ebi netusungule kasumbu ka bantu bikala ne bujitu bua dilongolola midimu ya dikuba bintu ne nzubu bidi mu lupangu. Midimu ya kasumbu ka bantu abu idi yenzeka ku bulombodi bua tusumbu tua bakulu.

7. (a) Ntshinyi tshidibu ne bua kuenza tshidimu tshionso bua kulama Nzubu wa Bukalenge bimpe? (b) Mbintu kayi bidi bikengela kukonkonona ku musangu ne ku mukuabu? (Tangila kazubu mu dibeji 5.)

⁷ Tshidimu tshionso badi ne bua kutangila Nzubu wa Bukalenge kumukonkonona mu bule ne mu butshiama ku diambuluisha dia formilere wa CN-14 udibu batuma kudi biro bia Luibaku lua Nzubu ya Bukalenge bidi ku Betele. Bakulu badi ne bujitu bua kuangata mapangadika bua kutamba kutabalela bintu bionso bidi bikengela kulongolola. Badi mua kulomba bamanyishi bua kufilabu diambuluisha mu midimu idi itangila bintu bidi bikengela kulongolola ne kuakaja. Bonso badi ne bua kudienzeja bua kulongolola nansha miaba idi tu-bilema tukese ne kuikala ne mitalu ya kumona bintu bidi bikengela kutabalela.

8. Ndîba kayi didi bakulu ne bua kufundila biro bia Luibaku lua Nzubu ya Bukalenge bidi ku Betele bua malu a dilongolola bintu bia ku Nzubu wa Bukalenge?

⁸ Bakulu buobu dijinga ne mibelu anyi diambuluisha mu mudimu wa dilongolola Nzubu wa Bukalenge, badi mua kufundila biro bia Luibaku lua Nzubu ya Bukalenge bidi ku Betele. Mudimu eu udi mua kuikala wa dijikija dia midimu ya dilongolola dia bimana, dilongolola dia biamu bia mpepele bidi bilembeleja mulu (bikalabiku), mushindu wa kupita ne midimu kampanda idi ilomba bibaki ne ya dilongolola dia miaba idi imata mâyi mu musaka.

9. Ntshinyi tshidibu ne bua kuenza padibi bikengela kufuta muntu kampanda bua kuenzaye imue midimu ya ku Nzubu wa Bukalenge?

⁹ Mushindu wa kuenza mudimu bimpe ne mfranga ya tshisumbu: Mudimu wa bungi udibu benza bua Nzubu wa Bukalenge ne bua lupangu ludibu bamuase badi bawenza kudi bena budisuile. Didifila diabu ne biabu bionso mmushindu mukuabu muimpe wa kuleja dinanga diabu udi wambuluisha bikole bua kukepesha ditula dia makuta. Pikalabi bikengela kufuta muntu wa tshianana bua kuenzaye mudimu kampanda, bu mudi wa dishipa bishi anyi bintu kansanga bidi binyanga nzubu, dilongolola dia nkumba ya bimbotela (ya batoke peshi itubu bela mâyi) anyi diumbula dia nkumba ya patupu, bakulu nebakebe muntu udi mua kulomba mushinga mutekete. Badi banji kufunda pa dibeji malu onso mumvuija bimpe a midimu ya kuenza ne bintu bia kuyenza nabi. Pashishe badi batentula bionso bidibu bafunde abi pa mabeji makuabu baafila kudi muntu ne muntu wa ku badibu bamonangana nabu bua kubenzela midimu eyi, benza nunku bua bantu abu bikale bonso bumvue tshidibu babalomba bimpe ne mishinga yuvuanganabu bua midimu yonso. Padi bakulu bapeta mishinga mibatuila kudi yonso wa ku bantu aba, badi mpindieu mua kusungula munkatshi mua bantu abu udi mubambile mushinga muimpe bua kubenzelaye midimu. Badi ne bua kulonda ngenzelu umue umue eu nansha padi muanetu kampanda ubalomba bua kuenzaye midimu eyi anyi bua kufila bintu bidi bikengela ku mushinga kampanda.

10. Ntshinyi tshidibu ne bua kuenza bua se: makuta a tshisumbu akuate mudimu mu mushindu muimpe?

¹⁰ Miaba idibi bikumbana, bakulu badi kabidi ne bua kukumbaja malu adi akengedibua bua kupeta mukanda wa Mbulamatadi wa dibenga kufuta bitadi bia lupangu ne bintu bidimu. Padi bisumbu bivule bikale bisangile Nzubu wa Bukalenge umue, bana betu ba mu kasumbu ka midimu ya ku Nzubu wa Bukalenge nebikale ne tshibutshilu tshia makuta pa nkayatshi ne ku ngondo yonso nebikale bafila kudi tusumbu tua bakulu ba bisumbu biabu bionso luapolo lufunda lua mushindu udi makuta matuke bua bakulu bikale pabu bamanye. Bakulu ke badi ne bukokeshi bua kuanyisha ditula dia makuta a tshisumbu didi diakanyine.

11. Ntshinyi tshidi tshikengela kuenza padiku mudimu munene wa dilongolola anyi diakajilula bimue bintu ku Nzubu wa Bukalenge?

¹¹ Mudimu munene wa dilongolola ne diakajilula: Padi bana betu badi batangila midimu ya dilongoluesha bintu bamona ne: kudi mudimu kampanda mukole anyi munene udi ukengela kuenzeja bua Nzubu wa Bukalenge, badi bamanyisha tusumbu tua bakulu bualu ebu bua kubalejabu tshia kuenza. Padibu bamona ne: bidi bikengela kuenza mudimu mukole wa dilongoluesha anyi wa diakajilula muaba wa Nzubu wa Bukalenge, peshi padibi bikengela kupeta diambuluisha muaba mukuabu kabiyi mu bisumbu bitu bidisangisha mu Nzubu wa Bukalenge au, bakulu badi ne bua kufundila biro bia Luibaku lua Nzubu ya Bukalenge bia ku Betele. Bana betu bapiluke ne bamonemone malu aba nebafile ngenyi idi yambuluisha ne mushindu wa kukumbaja midimu ayi. Bikalabi bilomba makuta a bungi, nebikengele kumanya bungi bujalame bua makuta adi akengela kutula bua midimu ayi ne kulongolola mêyi a dipangadika diangata a kuleja bena mu tshisumbu bua kufilabu dianyisha diabu.​—Tangila Mandamuna ku nkonko yenu mu Mudimu wetu wa Bukalenge wa Tshimungu 1994.

12. Mmushindu kayi utudi mua kuleja mutudi ne dianyisha bua diakalenga ditudi nadi dia kubuela mu bisangilu bidi bienzekela mu Nzubu wa Bukalenge?

¹² Tutu tuangata diakalenga ditudi nadi dia kudisangisha kaba kamue mu Nzubu wa Bukalenge ne mushinga wa bungi be! Katuena ne bua kulengulula bisangilu bietu anyi kubiangata ne mushinga mukese nansha musangu umue. Bantu bonso badi mua kuambuluisha bua bisangilu bietu kuikalabi bipita bimpe ku Nzubu wa Bukalenge bua biobi kutukankamija patudi tudifila bikole mu midimu ya dilama Nzubu wetu wa Bukalenge bimpe. Bidi bipesha ntendelelu mukezuke lumu ne bitumbishisha dîna dia Yehowa. Tuikalayi ne dipangadika dia kulama muaba wetu wa ntendelelu ne mankenda.

[Kazubu mu dibeji 4]

Bintu bia kutabalela bua kuepuka njiwu

□ Mishiku ya mbelu ikale mileja bimpe ne mikenkesha bimpe ne miendu.

□ Nzubu ya dilamina bintu ne nkumba bidi ne bua kuikala ne mankenda ne bulongame, kabiyi ne bintu bidi mua kukebesha anyi kukuata kapia lubilu, kamuikadi bintu bia bantu bilaminamu anyi bintu bia bukoya to.

□ Badi ne bua kutangila musaka ne milongoji ya ku malata a nzubu kubikonkonona ne kubilama ne mankenda misangu yonso.

□ Tujila tua makasa ne miaba ya dimanyikila mashinyi anyi makalu bidi ne bua kuikala miaba mitokesha bimpe ne nzembu, milongolola bimpe kayiyi ne busenu budi bufuane kushindisha bantu.

□ Nshinga ne biamu bia nzembu ne bia mpepele mbia kuikala kukonkonona ne kuakaja bimpe.

□ Masoso onso adi mulu nga kujika pa lukasa bua kuepuka dimata dia mâyi.

□ Nzubu wa dilamina bintu bia midimu ya ku Nzubu wa Bukalenge udi ne bua kuikala ne mankenda misangu yonso, muikale ne bulongame ne kayi ne biakudia panshi munda, bintu bia butshiafu anyi bintu bidi mua kukebesha anyi kukuata kapia to.

□ Mbimpe kukanga kumbelu ne tshikuvu padiku kakuyi muntu munda mua nzubu.

[Kazubu mu dibeji 5]

Dilama dia nzubu ne bionso bidi mu lupangu

□ Pambelu: Musaka wa nzubu, bimanu bia pambelu, mukubu udibu balabe, madidishi ne miaku mifunda idi ileja ne: eu n’Nzubu wa Bukalenge wa Bantemu ba Yehowa, bionso ebi mbilama bimpe anyi?

□ Lupangu: Lupangu ndulama bimpe anyi? tujila tua makasa, tshimanu anyi mikalu ya lupangu ne miaba ya dimanyikila mashinyi anyi makalu, mbilama pabi bimpe anyi?

□ Munda mua nzubu: Rido idi miela mu nzubu, nkuasa ne bibasa, miendu ne mukubu mulaba ku bimanu mu nzubu, bidiku bimueneka bimpe anyi?

□ Bintu: Miendu idiku ifila butoke bukumbane, biamu bia didiundisha nabi mêyi bidiku bipatula mêyi mumvuike, ne bia mpepele pabi bienda bimpe anyi?

□ Nkumba: Idi ne mankenda, kayiyi mianji kuwula anyi?

□ Mikanda ya tshisumbu: Nudiku balame mu dosiyé yenu mikanda ya lupangu anyi (Mbuena kuamba ne: Certificat d’Enregistrement, Contrat de Location, Acte de Vente)? Bikalabi bikengela kupeta mikanda ya mbulamatadi ya dibenga kufuta bitadi muaba unudi, nukadiku bakumbaje mukenji eu anyi?