Mmunyi mutudi mua kuambuluisha bena dibaka badi kabayi Bantemu?
1 Basadidi ba bungi ba Yehowa mbaselangane ne bantu badi bulunda ne Bantemu, ne batu banange malu adi enzeka mu tshisumbu kadi eku bikale badilaminyina bua kulua basadidi ba Nzambi. Bayende wa Ntemu wa Yehowa kampanda wakamba ne: “Muanda wa kuya ku nzubu ne ku nzubu ke uvua tshipumbishi tshinene buanyi meme.” Bamue badi mua kuikala benza malu adi kaayi apetangana ne Mukanda wa Nzambi adibu ne bua kulekela, anyi badi mua kuikala bela meji ne: kabena mua kulonda programe wa malu a mudimu wa Nzambi wa buena udi bena dibaka nabu balonda to. Mmunyi mutudi mua kubambuluisha?
2 Tuleja ne: tudi tubatabalela: Kuditatshisha bua muntu ne kutabalela malu adi mamutonde kudi mua kumusaka bua kuitaba bulelela bua mu Bible. (Filip. 2:4) Aba bavua ku kale kabayi Bantemu bu bena dibaka nabu batu misangu ya bungi bakula bua muvua dibatabalela divua Bantemu bena dibaka nabu babatabalela ne dinanga dionso dibalenga ku muoyo. Mulume muena mêyi atudi batele kuulu eku udi uleja ne: “José, udi mukulu mu tshisumbu, uvua untabalela mu mushindu wa pabuawu. Ndi ngela meji ne: dinkankamija diende ke diakamfikisha ndekelu wa bionso bua kulonga Bible ne muoyo mujima.” Mulume mukuabu udi uvuluka ne: bana betu ba balume bavua baya kumusombesha bavua benza muabu muonso bua kuyikila nende pa malu avua amutangila. Wakamba ne: “Ngakashintulula mmuenenu yonso mubi umvua nende pa ntendelelu wa mukajanyi. Balunda bende bavua bantu ba meji a bungi be, ne bavua ne dimanya dia kuyikila pa biena-bualu bishilashilangane.”—1 Kol. 9:20-23.
3 Tubambuluishayi: Diambuluisha dilenga didi kabidi mua kulenga muoyo wa muena dibaka udi kayi Ntemu. (Nsu. 3:27; Gal. 6:10) Dimue dituku nsonga kampanda Ntemu wakambuluisha bayende wa Ntemu kansanga bua kulongolola mashinyi ende avua manyanguke. Mulume eu udi wamba mpindieu ne: “Bualu abu buakandenga ku muoyo bikole.” Muanetu mukuabu yeye wakenza dituku dijima bua kuambuluisha bayende wa muanetu wa bakaji mukuabu bua kukanga lupangu luende. Pavuabu benza mudimu eu pamue bavua benda bayikila, e kubafikishabi ku didia bulunda. Kunyima kua mbingu ibidi, tatu au wakambila muanetu wa balume au ne: “Dîba diakumbanyi bua meme kushintulula nsombelu wanyi. Udiku mua kuanyisha bua kulonga nanyi Bible anyi?” Muntu eu wakadiunda lukasa mu nyuma, yeye kutambula ne kulua Ntemu.
4 Patudi tuya kukeba bantu ba muoyo muimpe mu teritware wetu, tutungunukayi ne kuambuluisha kabidi aba badi mu dibaka ne bana betu bena Kristo.—1 Tim. 2:1-4.