Bantu ba mishindu yonso nebasungidibue
1. Muaba utudi nawu ku mêsu kua Nzambi udi ulondeshila tshinyi?
1 Bulenga bua Nzambi budi kabuyi buakanyine bantu mbubunzuluile njila bua kupeta lupandu. Disua dia Yehowa didi ne: “bantu bonso basungidibue, bafike ku dimanya dia malu malelela.” (1 Tim. 2:3, 4) Muaba utudi nawu ku mêsu kua Nzambi udi ulondeshila ditabuja ditudi tuleja mu mulambu wa tshia-bupikudi wa Yezu, kadi ki mbilondeshile dikoba dietu, muanzu wetu, mamanya etu peshi mpala wetu nansha. (Yone 3:16, 36) Bu mutudi bena mudimu ba Nzambi, tudi ne bua kumbusha kansungasunga kuonso kadi mu mutshima wetu ka kubenga bantu badi Yehowa ukeba mua kuanyisha.
2, 3. Ntshinyi tshidi mua kutuambuluisha bua kubenga kulumbuluisha bantu bua tshimuenekelu tshiabu?
2 Katueledi bantu meji mabi: Yehowa utu utangila tshidi bantu munda muabu kayi ne meji mabi anyi kansungasunga to. (1 Sam. 16:7) Utu kabidi umona tshidibu mua kukokesha bua kukumbaja. Ke bualu kayi utu umona badi basue kumusankisha bu bintu bilengele. (Hag. 2:7) Tutuku tumona bakuabu mudi Nzambi ubamona anyi?
3 Mushindu utu bamue bantu batutu tupetangana nabu mu buambi utu pamuapa ututonda. Badi mua kuikala bavuale bitetela anyi mvuadilu mubi wa bu-raste, badi mua kuikala ne miedi bisala anyi tukanu tuela ku diulu peshi ku mishiku. Bamue badi mua kuikala kabayi ne muaba wa kulala. Bakuabu badi mua kutuamba mêyi mashile. Katuena mua kuangata bantu ba mushindu’eu bu badi kabayi mua kulua batendeledi ba Yehowa nansha, kadi tudi ne bua kuikala ne mmuenenu muimpe ‘bualu [nansha] tuetu tuakadi bapote diambedi, tuakadi ne bupidia [ne] tuakadi [bapambuke].’ (Tito 3:3) Ke bualu kayi tudi ne bua kuyisha bantu bonso, nansha aba badi ne tshimuenekelu tshitudi pamuapa tumona tshibi.
4, 5. Ntshinyi tshidi tshilejilu tshia Yezu ne tshia Paulo mua kutulongesha?
4 Bilejilu bia mu bidimu lukama bia kumpala: Yezu Kristo uvua upitshisha dîba diende bua kuambuluisha bantu bavuabu bangata bu bantu babi bavua kabayi bakumbane mua kulua batendeledi ba Yehowa. (Luka 8:26-39) Uvua mumanye ne: nansha muvuaye kayi ulengulula malu mabi, tshidibi uvua anu mumanye ne: malu mabi a bantu avua mua kubakebela njiwu. (Luka 7:37, 38, 44-48) Ke bua tshinyi uvua uditeka pa muaba wabu, ‘wakadi nabu luse, bualu bua bobu bakadi bu mikoko yakadi kayiyi ne mulami.’ (Mâko 6:34) Katuenaku mua kuidikija tshilejilu tshiende anyi?
5 Bakakuma mupostolo Paulo mabue ne kumuelabu mu buloko. (Bien. 14:19; 16:22, 23) Kadi nsombelu eyi mibi ya tshikisu yakamusakaku bua kumvua kanyinganyinga ne kuela meji ne: uvua upitshisha dîba diende patupu munkatshi mua bisamba bikuabu bia bantu anyi? Tòo. Uvua mumanye ne: bantu ba muoyo muimpe bavua mua kupeteka munkatshi mua bisamba bionso ne uvua mudisuike ne muoyo mujima bua kukeba bantu ba mushindu’eu. Ke mututu petu tumona bantu ba mu teritware wetu badi ne nsombelu ne nshidimukilu mishilashilangane anyi?
6. Mmuenenu utudi nende kudi bantu bapiabapia mu bisangilu bia tshisumbu udi mua kupatula bipeta kayi?
6 Tuakidilayi bakuabu lelu: Basadidi ba Nzambi ba bungi batu ne disanka bua muvuabu babakidile bimpe mu tshisumbu kudi bana betu ba balume ne ba bakaji bavua kabayi batangila tshimuenekelu patupu tshia bantu. Mu Ditunga dia Allemagne muntu mukuabu uvua ne muedi mulekelela, nsuki bula apa, muvuale buvualavi, wakalua mu Nzubu wa Bukalenge. Uvua ne lumu lubi be. Nansha nanku, bakamuakidila bimpe bitambe mu bisangilu bietu. Biakamukemesha bikole ne kuluaye kabidi mu bisangilu lumingu luakalonda. Matuku makese patupu, yeye kuakaja tshimuenekelu tshiende, kulekela kunua makanya ne kuelesha dibaka diende ku mikanda ya mbulamatadi. Mu matuku makese tshianana muntu eu ne mukajende ne bana bende babidi ba mapasa kubanga kusadila Yehowa mu buobumue.
7. Mmunyi mutudi mua kuidikija Nzambi wetu udi kayi ne kansungasunga?
7 Mu didikija Nzambi wetu udi kayi ne kansungasunga, tudi mua kubikila bantu bonso bua balue kupeta mabenesha a bulenga bua Nzambi budi kabuyi butuakanyine.
[Lungenyi lunene lua mu dibeji 3]
‘Nzambi kêna ne kansungasunga, kadi yeye udi witabuja wa mu tshisamba tshionso udi umutshina, udi wenza malu makane.’—Bien. 10:34, 35.