Dituku dia Yehowa dikadi pabuipi
1 Bena Kristo batu bajinga dilua dia dituku dia Yehowa bikole, dituku diabutulaye ndongoluelu wa malu eu ne kupingaja pa muaba wende bulongolodi bupiabupia bua buakane. (2 Pet. 3:12, 13) Bu mutudi katuyi bamanye tshikondo tshijalame tshialua dituku adi, tudi ne bua kushala anu batabale ne kuambuluisha bakuabu bua kushalabu pabu batabale. (Yeh. 33:7-9; Mat. 24:42-44) Dielangana meji pa milayi ya mu Bible nedituambuluishe bua kukolesha ditabuja dietu dia se: ‘Dituku dinene dia Yehowa dikadi pabuipi.’—Sef. 1:14.
2 Dilondangana dia makalenge manene a buloba bujima: Anu bu mudibi bileja mu Buakabuluibua 17:9-11, mupostolo Yone udi utela ‘bakalenge muanda mutekete’ badi tshimfuanyi tshia dilondangana dia makalenge manene muanda mutekete avua ne bua kukokesha buloba bujima. Yone udi wakula kabidi bua ‘mukalenge wa muanda mukulu’ udi uleja mpindieu Bulongolodi bua Matunga Masanga. Tudi ne bua kutekemena kabidi bua bukalenge bukuabu bunene bua buloba bujima kumuenekabu anyi? Tòo, mulayi eu udi wamba ne: mukalenge wa muanda mukulu “udi uya [too ne] ku dibutuka,” ne kunyima kuende ki mbatele kabidi bakalenge bakuabu ba pa buloba apa to. Mulayi eu kawenaku ukuambuluisha bua kumona tshikondo tshitukadi mpindieu anyi?
3 Danyele 2:31-45 udi utuambuluisha bua kumvua mudi kulua kua dituku dia Yehowa. Mu mulayi eu, lupingu lunene luvua Nebukadenesâ mumone mu tshilota ludi luleja dilondangana dia makalenge manene adi makokeshe buloba bujima. Makalenge aa onso akadi mamueneke. Lelu eu tudi mu tshikondo tshia bukalenge kayi? Tudi mu tshikondo tshileja mu tshimfuanyi kudi makasa a lupingu alu. Mulayi eu udi uleja patoke tshikale mua kuenzeka pashishe. Nebabutule makalenge a bantu onso butubutu bua kushilawu ‘bukalenge bukuabu budi kabuyi bubutudibua tshiendelele’ muaba bua kukokeshabu. Kuena mumoneku ne: bualu ebu budi buleja mukadi dituku dia Yehowa disemene pabuipi anyi?
4 Tshijadiki tshikuabu: Tudi badimuenene ne etu abidi tshijadiki tshikuabu tshidi tshileja ne: dituku dia Yehowa dikadi pabuipi. Tudi tumona dikumbana dia malu avua mupostolo Paulo mudianjile kuamba bua bikadilu bia bantu ba ‘matuku a ku nshikidilu.’ (2 Tim. 3:1-5) Kabidi tudi tuyisha pa buloba bujima bu mudibi bikengela kumpala kua nshikidilu kuluaye. (Mat. 24:14) Tutungunukayi anu ne kuyisha bantu ne mitalu ya buena idi muanjelu umanyisha nayi mukenji eu wa ne: ‘Nutshine Nzambi, numutumbishe, bualu bua dîba dia dilumbuluisha diende diakulua.’—Buak. 14:6, 7.