Programe wa dîku bua bisangilu bia tshisumbu

¹ Biwikala muledi muena Kristo, udi musue bua bana bebe bakole ne basadile Yehowa ne dinanga dionso, ne ndekelu wa bionso balue kupeta muoyo wa tshiendelele mu bulongolodi bupiabupia budi Nzambi mulaye. Kadi mmunyi muudi mua kubambuluisha bua kutekabu ntendelelu wa Yehowa pa muaba wa kumpala mu nsombelu wabu? Mushindu mutanbe buimpe wa kubambuluisha ntshilejilu tshiebe tshimpe. (Nsu. 20:7) Pakavuluka muanetu mukuabu wa bakaji tshilejilu tshia mamuende uvua Ntemu wa Yehowa, wakamba ne: “Katuvua banji kuelakana nansha kakese bua kumanya ni tuvua mua kuya anyi kupanga kuya mu bisangilu nansha.” Bitu bimupeshe dilongesha didiye kayi mua kupua muoyo to.

² Bena mu dîku diebe batuku bamanye tshipatshila tshia bisangilu bia tshisumbu anyi? Malongesha atutu tupetamu atu atuambuluisha bua kuya kumpala mu dienza disua dia Nzambi ne malanda atudi nawu ne bana betu atu atukolesha bikole. (Yesh. 54:13; Lomo 1:11, 12) Kadi, tshipatshila tshinene tshia bisangilu ebi ntshia kutumbisha Yehowa ‘mu masangisha a bantu bende.’ (Mus. 26:12) Bisangilu bietu bia bena Kristo bidi bitupetesha mushindu wa kuleja dinanga ditudi nadi bua kutendelela Yehowa.

³ ‘Dimukayi’: Dianyisha dia mudi bisangilu bietu bikale ne tshipatshila tshia kutusaka ku malu a tshijila neditusake bua kuikala anu ‘badimuke’ bua kubenga kuangata ku kakese ku kakese tshibidilu tshia kupumbisha bisangilu bua malu adi kaayi ne mushinga menemene. (Ef. 5:15, 16; Eb. 10:24, 25) Panudi nuenza programe wenu wa dîku, nudi mua kutuadija ne mêba adi bisangilu bia tshisumbu bienzeka. Nuvuluke bua kubenga kuteka midimu mikuabu dîba dimue ne dia bisangilu. Nuenze bua ne: dibuela dia mu bisangilu dikale pa muaba wa kumpala mu programe wa dîku dienu.

⁴ Kabituku bitukankamija patutu tubala mudi bana betu bakuabu bakolela malu atu atamba kubapangisha bua kubuela mu bisangilu ne mu mpuilu anyi? Nansha nsombelu wenu muikale kayi mumanyike, nudi pamuapa ne yenu ntatu. Satana udi wenda anu ukolesha ntatu bua bantu ba Nzambi bapange mua kutendelela Yehowa. Kadi ikale mumanye ne: bana benu balela kabakupanga kumona didienzeja dienu dia muoyo mujima bua kubuela mu bisangilu bia tshisumbu. Bushuwa, nuenu nuenza nunku, nudi mua kubabueja tshipedi kampanda tshia mu nyuma munda muabu tshikalabu kabayi mua kulengulula nansha.