Programe wa dîku bua dilonga dia mu dîku

¹ Bu muledi muena Krito, dipa ditambe bunene diudi mua kupesha bana bebe ndinanga diudi nadi bua Yehowa. Dîba dimpe diudi mua kuenza bualu ebu ‘mpawashikame mu nzubu muebe’ bua Dilonga dia Bible dia mu dîku lumingu luonso. (Dut. 6:5-7) Nansha muena dibaka nebe muikale anyi kayi mu tshitendelelu tshimue nebe, anyi biwikala muledi wa tshianza nkaya udi udikoleshila bana, udi anu mua kuambuluisha bana bebe bua kushalabu bakulamate ne bua kusemenabu pabuipi ne Yehowa pa kuikala ne tshibidilu tshia kulonga nabu pamue mu dîku.

² Tuadija dilonga dia mu dîku: Bualu bua kumpala nkuenza programe wa dilonga dia mu dîku. Biwikala kuyi mumanye dîba dimpe dia kuteka dilonga edi, yukila ne bena mu dîku diebe pa bualu ebu. (Nsu. 15:22) Wewe muikale ne bana batekete mu dîku, udi nansha mua kuenza dilonga edi dikosolola mu tutupa mu tutupa mu lumingu lujima. Sungula ngenzelu wa dilonga uudi umona ukumbanangana ne bena mu dîku diebe. Teka dilonga dîba dimpe disunguluke mu programe wenu wa dîku ne ditatshisha bua kudinemeka.

³ Mmalu kayi anudi mua kulonga? Bamue batu badilongolola ku malu ikalabu mua kulonga mu Dilonga dia Mukanda dia tshisumbu anyi mu Dilonga dia Tshibumba tshia Nsentedi. Bakuabu batu bakonkonona malu adi atangila nangananga bansonga. Tatu wa bana babidi (wa balume ne wa bakaji) wakamba ne: “Bualu bumue butu buvuija dilonga dietu muanda udi usankisha bana betu munkatshi mua lumingu mbua se: tutu tuenza manaya a malu adi mu mukanda wa Miyuki ya mu Mukanda wa Nzambi. Mushindu udi manaya aa alenga bana ku muoyo ne ngumvuilu utudi tumvua malu adimu bidi ne mushinga wa bungi kupita bungi bua bikoso bitudi tubala.”

⁴ Ikalayi nulonga lumingu luonso: Dilonga dia mu dîku didi ne bua kuenzeka lumingu luonso ne bena mu dîku bonso badi ne bua kuikala baditekemena ne disanka. Imue misangu nudi pamuapa mua kushintulula dituku ne dîba dia dilonga bua nsombelu kampanda anyi kansanga ivua kayiyi mitekemena. Nudi kabidi pamuapa mua kushintulula biena-bualu bia dilonga padibi bikengedibua. Kadi dishintuluka dia mushindu eu kadiena ne bua kukosesha programe wa dilonga dia mu dîku mumana kuteka anyi kumushintulula bua matuku a bungi to. Muana mukuabu wa bakaji wa mu dîku kampanda udi wamba ne: “Padibu bashintulula dîba dia dilonga dietu dia mu dîku, misangu yonso Tatu utu ulamika kabeji kafunda dîba dikuabu didibu bateke ku tshiibi tshia frigo wetu bua tuetu bonso tumanye dîba dienzeka dilonga edi.” Diditatshisha dia mushindu eu bua kuenza dilonga dia mu dîku pa tshibidilu ki ndikumbanyine kalumbandi anyi? Panudi nutungunuka ne kukolesha bana benu ‘ne dibela ne didimuija bia Mukalenge,’ nudi nubaleja dinanga dienu ne nuleja kabidi Tatu wetu wa mu diulu dinanga.​—Ef. 6:4.