Malu adi mudimu wetu ukumbaja
1. Mmunyi mudi Yehowa umona mudimu wetu, ne mmunyi mudi ba bungi bakidila lumu luimpe?
1 Bible udi wakula bua bena Kristo bu tshisumbu tshia bantu badi baya batangile anu kumpala mu mudimu wa Yehowa bu batshimune mvita. (2 Kol. 2:14-16) Patudi tupetesha bakuabu dimanya dia Nzambi, mudimu eu udi anu bu tshintu tshia dipembu dimpe didi disankisha Yehowa. Bamue badi bitaba lumu luimpe ne disanka, eku bakuabu balubenga. Kadi nansha mudi bantu ba bungi balubenga, ebi kabiena biumvuija ne: mudimu wetu kawena ne tshidiwu upatula to. Tangila tshidiwu ukumbaja.
2. Ntshinyi tshidi mudimu wetu utuambuluisha bua kuleja patoke?
2 Udi utumbisha Yehowa: Satana udi wamba mudi bantu benzela Nzambi mudimu anu bua kupeta masanka abu nkayabu. (Yobo 1:9-11) Mudimu wetu wa buambi udi utuambuluisha bua kuleja patoke ne: didifila dietu kudi Nzambi ndilelela kadi ki ndia tshidingishilu to. Bamanyishi bavule badi batungunuka ne kutumikila mukenji wa kuyisha ne kuvuija bantu bayidi nansha padibu mu ntatu anyi padi bantu babenga kubateleja. Dinanukila dia nunku didi disankisha mutshima wa Yehowa.—Nsu. 27:11.
3. Bua tshinyi tudi ne bua kutungunuka ne kumanyisha dîna dia Nzambi ne disua diende?
3 Mudimu wetu udi kabidi ukumbaja bukuabu bualu mu malu adi Nzambi mulongolole bua kuenza. Yehowa wakamba bua tshikondo tshialuaye kubutula bena dia Satana ne: ‘Ba mu bisamba bia bantu nebamanye ne: Meme ndi Yehowa.’ (Yeh. 39:7) Bua bisamba kumanyabi bualu ebu, basadidi ba Nzambi badi ne bua kutungunuka ne kumanyisha dîna dia Nzambi ne disua diende ‘kudi ditunga dionso ne tshisamba tshionso ne muakulu wonso ne bantu bonso.’—Buak. 14:6, 7.
4. Mmunyi mudi mudimu wa kuyisha muikale tshishimikidi tshia dilumbuluisha?
4 Ntshishimikidi tshia dilumbuluisha: Mudimu wa kuyisha lumu luimpe newikale tshishimikidi tshiambuluisha bua dilumbuluisha dia bantu. Mupostolo Paulo wakamba ne: Kristo Yezu neadisombuele kudi ‘bantu badi kabayi bamanye Nzambi ne kudi badi kabayi batumikila lumu luimpe lua Mukalenge wetu Yezu.’ (2 Tes. 1:8, 9) Nebalumbuluishe bantu bilondeshile mushindu udibu bakidila lumu luimpe lelu. Etshi ntshilumbu tshinene tshidi tshitangila basadidi ba Nzambi. Bua kuepuka dibanza dia mashi, tudi ne bua kutungunuka ne kumanyisha mukenji wa lupandu wa Bukalenge bua Nzambi.—Bien. 20:26, 27.
5. Mmushindu kayi udi mudimu wetu uleja luse lua Nzambi?
5 Patudi tuenza muetu muonso bua kuambuluisha bantu netu bua kuluabu balunda ba Nzambi, tudi tuleja luse lua Yehowa. (1 Tim. 2:3, 4) Bu mutudi bamanye ne: nsombelu ya bantu itu ishintulukashintuluka, tudi ne bua kuya kudibu misangu ne misangu bua kubambuluisha bua bakebe Yehowa patshidibu ne dîba apa. Patudi tuenza nanku, tudi tuleja “mutshima wa luse wa Nzambi wetu” udi ‘kayi musue bua umue wabu ajimine, kadi musue bonso balue kukudimuna mitshima yabu.’—Luka 1:78; 2 Pet. 3:9.
6. Mmunyi mudi kuikala ne tshisumi mu mudimu wa Yehowa kutupetesha masanka?
6 Udi utuabuluisha tuetu bine: Kuikala ne tshisumi mu mudimu wa Yehowa kudi kutukuba. Udi utuambuluisha bua ‘kuendesha lukasa dilua dia dituku dia Nzambi’ mu lungenyi luetu ne kuepuka bua kubenga kupita ne ndongoluelu eu mubi wa malu. (2 Pet. 3:11-14; Tito 2:11, 12) Nunku, ‘tuikale bakole, tutantamane, tukumbaje mudimu wa Mukalenge misangu yonso’ bamanye ne: mudimu utudi tuenza mu Mukalenge kawena patupu.—1 Kol. 15:58.